ପୁରୀ,୧୪/୦୯: ଶ୍ରୀଜଗନ୍ନାଥଙ୍କ ଶ୍ରୀକୃଷ୍ଣ  ଲୀଳା ପାଇଁ ଶୁକ୍ରବାର ଶ୍ରୀକ୍ଷେତ୍ରରେ ସୃଷ୍ଟି ହୋଇଥିଲା ଭାବବିହ୍ୱଳ ପରିବେଶ । ଗୋପପୁରରୁ ମଥୁରାନଗରୀ ପର୍ଯ୍ୟନ୍ତ ସବୁଠି ଚାଲିଥିଲା ଦ୍ୱାପର  ଯୁଗର ଲୀଳାଖେଳା । ସକାଳ ପ୍ରହରୁ ଶ୍ରୀମନ୍ଦିର ଓ  ଲୀଳା ସଂପୃକ୍ତ ସେବକଙ୍କ ପରିବାର(ଗୋପପୁର)  ଥିଲା ଚଳଚଞ୍ଚଳ । ଅପରାହ୍ନରୁ ପବିତ୍ର ବଡ଼ଦାଣ୍ଡ  ମଥୁରାନଗରୀ ପାଲଟିଗଲା । ଜଗନ୍ନାଥବଲ୍ଲଭ  ମଠ ନିକଟରୁ ସିଂହଦ୍ୱାର ପର୍ଯ୍ୟନ୍ତ ଚାଲିଲା  ଶ୍ରୀକୃଷ୍ଣଙ୍କ ଦିବ୍ୟ ଲୀଳାଖେଳା । ଶ୍ରୀରାମକୃଷ୍ଣ  ମଲବଣିଖିଆ ମଣ୍ଡପରେ ବିଜେ ହୋଇ ଯଶୋଦା  ଓ ରୋହିଣୀଙ୍କ(ମହାଭୋଇ ପରିବାରର  ବୋହୂମାନଙ୍କ) ହାତରେ ଲବଣୀ ଖାଇଲେ ।  ବଡ଼ଦାଣ୍ଡରେ ମଲ୍ଲ ଓ ମହନ୍ତଙ୍କୁ ପରାସ୍ତ କରଥିଲେ ।  ଶେଷରେ ଶ୍ରୀମନ୍ଦିର ସିଂହଦ୍ୱାର ନିକଟରେ ପ୍ରବଳ  ପ୍ରତାପୀ ରାକ୍ଷସ ରାଜା କଂସଙ୍କୁ ଶ୍ରୀକୃଷ୍ଣ ବବଧ  କରିଥିଲେ । ଉଗ୍ରସେନ ଶ୍ରୀମନ୍ଦିର ପ୍ରଶାସନରୁ  ଶାଢୀ ପ୍ରାପ୍ତ ହୋଇ ରାଜା ହୋଇଥିଲେ ।  ବଡ଼ଦାଣ୍ଡରେ ଶ୍ରଦ୍ଧାଳୁମାନେ ଠାକୁରଙ୍କ ଦେବନୀତି  ଦେଖି ଧନ୍ୟ ହୋଇଥିଲେ । ତେବେ ପରମ୍ପରା  ମୁତାବକ ଶ୍ରୀନହର ସମ୍ମୁଖରେ କୁବୁଜା ଉଦ୍ଧାର  ନୀତି ନହୋଇ ବିଳମ୍ବରେ ନୀତି ପାଳନ ହେବାରେ  କିଛି ସେବକ ଅସନ୍ତୋଷ ପ୍ରକାଶ କରିଥିଲେ ।   

ମହାପ୍ରଭୁଙ୍କର କୃଷ୍ଣଲୀଳା ତଥା ଲବଣିଖିଆ, ମଥୁରାହାଟ ଯୁର ଓ କଂସ ବଧ ଆଦି ନୀତି ପାଇଁ ବଡ଼ଦେଉଳରେ ପ୍ରସ୍ତୁତି  ହୋଇଥିଲା । ଶୁକ୍ରବାର ଯଥାବିଧି ନୀତି ବଢ଼ି  ମହାଜନ ସେବକମାନେ ଶ୍ରୀକୃଷ୍ଣ-ବଳରାମଙ୍କୁ  ରତ୍ନ ସିଂହାସନକୁ ବିଜେ କରାଇଥିଲେ । ଶ୍ରୀକୃଷ୍ଣ  ଶ୍ରୀଜଗନ୍ନାଥଙ୍କ ବାଡ଼ରେ ଓ ବଳରାମ ବଡ଼ଠାକୁରଙ୍କ  ବାଡରେ ବିଜେ ହୋଇଥିଲେ । ଠାକୁରେ ଆଜ୍ଞାମାଳ  ପାଇ ବଟଦୁଆରେ ଥିବା ପାଲିଙ୍କିରେ ବିଜେ  ହେଲେ । ପଟୁଆରରେ ବିମାନବଡ଼ୁମାନେ  ପାଲିଙ୍କି ନେଇ ଶ୍ରୀମନ୍ଦିରରୁ ବାହାରି ଲବଣିଖିଆ  ମଣ୍ଡପଠାରେ ବିଜେ ହୋଇଥିଲେ । ମଣ୍ଡପରେ  ପହଞ୍ଚିବା ପୂର୍ବରୁ ମହାଭୋଇମାନେ ଠାକୁରଙ୍କ  ବାଟବରଣ କରିଥିଲେ । ମହାଭୋଇ ପରିବାରର  ବୋହୂମାନେ ଦୁଇ ବିଗ୍ରହଙ୍କୁ ଅର୍ଘ୍ୟ ବନ୍ଦାପନା  କରିଥିଲେ । ମହାଭୋଇଙ୍କ ପ୍ରଦତ୍ତ ସର,  ଲବଣୀ, ମାଖନ ଭୋଗ ଲାଗିଥିଲା । ଭିତରଛୁ  ମହାପାତ୍ରେ ବନ୍ଦାପନା କଲା ପରେ ମହାପ୍ରଭୁ  ବିମାନକୁ ବିଜେ ହୋଇ ପୁନଃ ବଡ଼ଦାଣ୍ଡ  ତଥା ମଥୁରାନଗରୀକୁ ବିଜେ କରିଥିଲେ ।  

ମରିଚି ଠାକୁରାଣୀଙ୍କ ସମ୍ମୁଖରେ ମଲ୍ଲଯୁଦ୍ଧ ପ୍ରସ୍ତାବ  ହୋଇଥିଲା । ମାଟିମଣ୍ଡପ ସାହି ଉତ୍ତର ଆଖଡ଼ାରୁ  ମାଲ(ମଲ୍ଲ), ମହନ୍ତ, ଶ୍ରୀକୃଷ୍ଣ ଓ ବଳରାମ ଚରିତ୍ର  ବାହାରି ଠାକୁରଙ୍କ ନୀତିରେ ସାମିଲ ହୋଇଥିଲେ ।  କୁବୁଜା ଉଦ୍ଧାର ନୀତି ସମ୍ପନ୍ନ ହୋଇଥିଲା ।  ଠାକୁରେ ସିଂହଦ୍ୱାର ସମ୍ମୁଖରେ ଲକ୍ଷି ଉଦର  ସାମ୍ନା କାଠ ସିଂହାସନ ଉପରେ ପାଲିଙ୍କି ସହିତ  ବିଜେ ହୋଇଥିଲେ । ସେଠାରେ କୁବଳୟା ରଜ  ପ୍ରସ୍ତାବ ଓ କଂସ ବଧ ନୀତି ଅନୁଷ୍ଠିତ ହୋଇଥିଲା।