କଟକ,୧୬/୧୧: ଗୁରୁବାରଠାରୁ ଶ୍ରୀମନ୍ଦିର ନାଟମଣ୍ଡପ ମରାମତି କାମ ଆରମ୍ଭ ହେବ । ଏଥିପାଇଁ ଶ୍ରୀମନ୍ଦିର ପ୍ରଶାସନ ସବୁପ୍ରକାର ସହଯୋଗ ଯୋଗାଇଦେବ । ଅଭିଷେକ ଦାସଙ୍କ ପକ୍ଷରୁ ଆଗତ ମାମଲାର ଶୁଣାଣି ପରିପ୍ରେକ୍ଷୀରେ ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ଜଷ୍ଟିସ୍ ବିଦ୍ୟୁତ୍ ରଞ୍ଜନ ଷଡ଼ଙ୍ଗୀ ଏବଂ ବିଚାରପତି ଜଷ୍ଟିସ୍ ଏମ୍.ଏସ୍. ରମଣଙ୍କୁ ନେଇ ଗଠିତ ଖଣ୍ଡପୀଠ ବୁଧବାର ଏହି ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି । ହାଇକୋର୍ଟଙ୍କ ନିର୍ଦ୍ଦେଶ ଫଳରେ ୨୦୧୭ରୁ ପଡ଼ି ରହିଥିବା ନାଟମଣ୍ଡପ ମରାମତି କାମ ସଂପୂର୍ଣ୍ଣ ହେବ ବୋଲି ଆଶା କରାଯାଉଛି ।
ହାଇକୋର୍ଟଙ୍କ ନିର୍ଦ୍ଦେଶ ମୁତାବକ, ମରାମତି କାର୍ଯ୍ୟର ଅଗ୍ରଗତି ସଂକ୍ରାନ୍ତରେ ପ୍ରତି ୧୫ଦିନରେ ଆମିକସ୍କ୍ୟୁରୀ ଏକ ରିପୋର୍ଟ ଅଦାଲତରେ ଦାଖଲ କରିବେ । ପ୍ରତିଦିନ ୬ ଘଣ୍ଟା ହିସାବରେ ୧୨୦ ଦିନରେ ଏହି ମରାମତି ଶେଷ କରିବାକୁ ହାଇକୋର୍ଟ ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା(ଏଏସ୍ଆଇ)କୁ ନିର୍ଦ୍ଦେଶ ଦେଇଛନ୍ତି । ଡିସେମ୍ବର ୪ ତାରିଖକୁ ମାମଲାର ପରବର୍ତ୍ତୀ ଶୁଣାଣି ପାଇଁ ସମୟ ଧାର୍ଯ୍ୟ ହୋଇଛି।
ନାଟମଣ୍ଡପ ମରାମତି ମାମଲାରେ ବୁଧବାର ଏଏସ୍ଆଇର ଅଧୀକ୍ଷଣ ପ୍ରତ୍ନତତ୍ତ୍ୱବିତ୍ ଦିବିସଦ୍ଧା ବ୍ରଜସୁନ୍ଦର ଗଡ଼ନାୟକ ହାଇକୋର୍ଟରେ ଏକ ସତ୍ୟପାଠ ଦାଖଲ କରିଥିଲେ । ସତ୍ୟପାଠରେ ଦର୍ଶାଯାଇଥିଲା ଯେ ନାଟମଣ୍ଡପକୁ ଅଧିକ ଶକ୍ତିଶାଳୀ କରିବା ଲାଗି ଏକ ନୂତନ ଡିଜାଇନ୍ ଆସିଛି । ଏହି ପ୍ରସ୍ତାବ ଏଏସ୍ଆଇ କୋର୍ କମିଟି ପକ୍ଷରୁ ଦିଆଯାଇଛି । ଅପରପକ୍ଷରେ ଶ୍ରୀମନ୍ଦିର ମୁଖ୍ୟ ପ୍ରଶାସକ, ଏଏସ୍ଆଇ, ଆମିକସ୍କ୍ୟୁରୀ ଏବଂ ପୂର୍ତ୍ତ ବିଭାଗ ଇଞ୍ଜିନିୟର୍ ଇନ୍-ଚିଫ୍ ଏନ୍.ସି. ପାଲ୍ ପ୍ରମୁଖଙ୍କୁ ନେଇ ଏକ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା । ଯେଉଁଥିରେ ଆସନ୍ତା ୨୦୨୪ ଜାନୁଆରୀ ୨୦ ତାରିଖରୁ ନାଟମଣ୍ଡପର ମରାମତି କାର୍ଯ୍ୟ ଆରମ୍ଭ ହେବ ବୋଲି ନିଷ୍ପତ୍ତି ନିଆଯାଇଥିଲା ।
ସତ୍ୟପାଠରେ ଯେଉଁ ସମୟ ଲୋଡ଼ାଯାଇଥିଲା ତାହାକୁ ଅଦାଲତ ଅଗ୍ରାହ୍ୟ କରିଥିଲେ । ନାଟମଣ୍ଡପ ମରାମତି ପାଇଁ ଏତେ ସମୟ ଦିଆଯାଇ ପାରିବ ନାହିଁ ବୋଲି ହାଇକୋର୍ଟ କହିଥିଲେ । ଗୋଟେ ପଟେ ମନ୍ଦିର ପରିକ୍ରମା କାର୍ଯ୍ୟ ଏବଂ ଅନ୍ୟପଟେ କାର୍ତ୍ତିକ ମାସ ଥିବାରୁ ନାଟମଣ୍ଡପ ମରାମତି କାର୍ଯ୍ୟ ବିଳମ୍ବ ହେଉଛି ବୋଲି ଏଏସ୍ଆଇ ପକ୍ଷରୁ ଦର୍ଶାଯାଇଥିଲା । କିନ୍ତୁ ହାଇକୋର୍ଟ ଏହା ଉପରେ ଶ୍ରୀମନ୍ଦିର ପ୍ରଶାସନଠାରୁ ମତାମତ ଲୋଡ଼ିଥିଲେ । ଯେ କୌଣସି ସମୟରେ କାମ ଆରମ୍ଭ ହେଲେ ଶ୍ରୀମନ୍ଦିର ପ୍ରଶାସନ ସବୁପ୍ରକାର ସହଯୋଗ ଯୋଗାଇ ଦେବ ବୋଲି କୁହାଯାଇଥିଲା । ଫଳରେ ହାଇକୋର୍ଟ ଗୁରୁବାରଠାରୁ ନାଟମଣ୍ଡପ ମରାମତି କାମ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି । ଆବେଦନକାରୀଙ୍କ ପକ୍ଷରୁ ଆଇନଜୀବୀ ଆଲୋକ କୁମାର ମହାପାତ୍ର, ଶ୍ରୀମନ୍ଦିର ପ୍ରଶାସନ ପକ୍ଷରୁ ଆଇନଜୀବୀ ସୁବ୍ରତ ଶତପଥୀ ମାମଲା ପରିଚାଳନା କରୁଛନ୍ତି ।
