ନୂଆଦିଲ୍ଲୀ: ଦୁଇରୁ ଅଧିକ ସନ୍ତାନ ଥିଲେ ସରକାରୀ ଚାକିରୀ ପାଇଁ ଅଯୋଗ୍ୟ ବିବେଚିତ ହେବେ ବ୍ୟକ୍ତି । ଏଭଳି ଏକ ନିଷ୍ପତ୍ତିକୁ ବିରୋଧ କରି ଦାଖଲ ହୋଇଥିବା ଆବେଦନକୁ ପ୍ରତ୍ୟାଖ୍ୟାନ କରିଛନ୍ତି ସୁପ୍ରିମକୋର୍ଟ । କହିଛନ୍ତି ଯେ, ଏହା ଅସାମ୍ବିଧାନିକ ନୁହେଁ । ଏଥିରେ ସମ୍ବିଧାନର ଉଲଂଘନ ହୋଇନାହିଁ ବୋଲି କହିଛନ୍ତି ସୁପ୍ରିମକୋର୍ଟ । ରାଜସ୍ଥାନ ସରକାରଙ୍କ ଦୁଇ ଶିଶୁଥିବା ନିୟମକୁ ସୁପ୍ରିମକୋର୍ଟ ଅନୁମୋଦନ ଦେଇଛନ୍ତି। ସୁପ୍ରିମକୋର୍ଟ କହିଛନ୍ତି ଯେ, ଦୁଇରୁ ଅଧିକ ପିଲା ଥିଲେ ସରକାରୀ ଚାକିରି ଦେବାକୁ ମନା କରିବା ଭେଦଭାବ ନୁହେଁ । କୁହାଯାଉଛି ଯେ ରାଜସ୍ଥାନ ସରକାରଙ୍କ ଏହି ବ୍ୟବସ୍ଥା ପଛରେ ପରିବାର ଯୋଜନାକୁ ପ୍ରୋତ୍ସାହିତ କରିବା।

ସୁପ୍ରିମକୋର୍ଟ ତାଙ୍କ ଆଦେଶରେ କହିଛନ୍ତି ଯେ ଏହି ନିୟମ ନୀତି ପରିସରକୁ ଆସିଛି। ତେଣୁ ଏଥିରେ ହସ୍ତକ୍ଷେପ କରିବାର କୌଣସି ଆବଶ୍ୟକତା ନାହିଁ । ଏହି ନିଷ୍ପତ୍ତି ଜଷ୍ଟିସ ସୂର୍ଯ୍ୟ କାନ୍ତ, ଜଷ୍ଟିସ ଦୀପଙ୍କର ଦତ୍ତ ଏବଂ ଜଷ୍ଟିସ କେ.ଭି ବିଶ୍ୱନାଥଙ୍କ ବେଞ୍ଚ ଦ୍ୱାରା ଦିଆଯାଇଛି । ଲାଇଭ ଲ ର ଏକ ରିପୋର୍ଟ ଅନୁଯାୟୀ ସୁପ୍ରିମକୋର୍ଟଙ୍କ ବେଞ୍ଚ ଅକ୍ଟୋବର ୧୨, ୨୦୨୨ ର ରାଜସ୍ଥାନ ହାଇକୋର୍ଟଙ୍କ ନିଷ୍ପତ୍ତିକୁ ସମର୍ଥନ କରିଛନ୍ତି । 

ସୂଚନାଥାଉକି,ରାମଜୀ ଲାଲ ଜଟ ରାଜସ୍ଥାନ ପୋଲିସରେ କନଷ୍ଟେବଳ ପଦ ପାଇଁ ଆବେଦନ କରିଥିଲେ, କିନ୍ତୁ ଜୁନ୍ ୧, ୨୦୦୨ ପରେ ତାଙ୍କର ଦୁଇରୁ ଅଧିକ ସନ୍ତାନ ଥିବାରୁ ଆବେଦନ ପ୍ରତ୍ୟାଖ୍ୟାନ କରାଯାଇଥିଲା । ବାସ୍ତବରେ, ଜାନୁଆରୀ ୩୧, ୨୦୧୭ ରେ ସେନାବାହିନୀରୁ ଅବସର ନେବା ପରେ ରାମଜୀ ଲାଲ ଜାଟ ୨୫ ମେ ୨୦୧୮ ରେ ରାଜସ୍ଥାନ ପୋଲିସରେ କନଷ୍ଟେବଳ ପଦ ପାଇଁ ଆବେଦନ କରିଥିଲେ । ରାଜସ୍ଥାନ ପୋଲିସ୍ ସବୋର୍ଡେଟ୍ ସର୍ଭିସେସ୍ ନିୟମ, 1989 ର ନିୟମ 24 (4) ଅନୁଯାୟୀ ତାଙ୍କ ଆବେଦନ ପ୍ରତ୍ୟାଖ୍ୟାନ କରାଯାଇଥିଲା ଯେ ଜୁନ୍ ୧, ୨୦୦୨ ପରେ ତାଙ୍କର ଦୁଇରୁ ଅଧିକ ସନ୍ତାନ ଥିବାରୁ ସେ ସରକାରୀ ଚାକିରୀ ପାଇବାକୁ ଯୋଗ୍ୟ ନୁହଁନ୍ତି ।