ନୂଆଦିଲ୍ଲୀ,୨୪/୦୫: ଟି-ଟ୍ୱେଣ୍ଟି ବିଶ୍ୱକପ୍ (୨୦୦୭) ପ୍ରଥମ ସଂସ୍କରଣରେ ଭାରତ ଚାମ୍ପିଅନ ହୋଇଥିଲା । ୨୦୦୮ରୁ ଆରମ୍ଭ ହୋଇଥିଲା ଆଇପିଏଲ । ବର୍ଷକୁ ବର୍ଷ ଏହାର ଲୋକପ୍ରିୟତା ସାରା ବିଶ୍ୱରେ ବଢ଼ି ବଢ଼ି ଚାଲିଛି । କିନ୍ତୁ ଆଇପିଏଲ ଆରମ୍ଭ ହେବା ପରେ ଭାରତ ଆଉ ଟ୍ରଫି ଜିତିବାରେ ସଫଳ ହୋଇ ପାରିନି । ଏଥର ଏହି ପ୍ରତୀକ୍ଷାର ଅନ୍ତ ଘଟିବ କି? ଏହା ଏବେ ବଡ଼ ପ୍ରଶ୍ନ ।
ଦକ୍ଷିଣ ଆଫ୍ରିକାରେ ଭାରତ ବିଶ୍ୱକପ୍ ଟ୍ରଫି ଜିତିବାର ସୌଭାଗ୍ୟ ଲାଭ କରିଥିଲା । ପୁଣି ୨୦୧୪ରେ ବାଂଲାଦେଶରେ ଦ୍ୱିତୀୟ ସୁଯୋଗ ଆସିଥିଲେ ବି ତାହା ହାତଛଡ଼ା ହୋଇଥିଲା । ଫାଇନାଲରେ ଶ୍ରୀଲଙ୍କାଠୁ ପରାଜିତ ହୋଇଥିଲା । ଏହାପରେ ୩ଟି ସଂସ୍କରଣ ଶେଷ ହୋଇଥିଲେ ବି ଫାଇନାଲକୁ ଉନ୍ନୀତ ହୋଇପାରି ନାହିଁ ଭାରତ ।
ରୋହିତଙ୍କ ନେତୃତ୍ୱକୁ ନେଇ ଆଶା
୨୦୨୨ ବିଶ୍ୱକପ୍ର ସେମି ଫାଇନାଲରେ ଅଷ୍ଟ୍ରେଲିଆଠୁ ପରାଜିତ ହେବା ପରେ ଭାରତୀୟ ଦଳର ଅଭିଯାନ ଶେଷ ହୋଇଥିଲା । ଏହାପରଠୁ ରୋହିତ ଓ ବିରାଟ କୋହଲି ଅନ୍ତର୍ଜାତୀୟ ଟି-ଟ୍ୱେଣ୍ଟିରୁ ଦୂରେଇ ରହିଥିଲେ । ଆଶା କରାଯାଉଥିଲା, ହୁଏତ ଉଭୟ ୨୦୨୪ ବିଶ୍ୱକପ୍ରେ ଅନୁପସ୍ଥିତ ରହିବେ । କିନ୍ତୁ ଗତ ଦିନିକିଆ ବିଶ୍ୱକପ୍ ପରେ ବିସିସିଆଇ ଅନୁଭବ କରିଥିଲା ଯେ ଆଗାମୀ ଟି-ଟ୍ୱେଣ୍ଟି ବିଶ୍ୱକପ୍ରେ ରୋହିତଙ୍କ ନେତୃତ୍ୱର ଆବଶ୍ୟକତା ରହିଛି । ତେଣୁ ବହୁ ପୂର୍ବରୁ ହିଁ ବିସିସିଆଇ ରୋହିତଙ୍କୁ ବିଶ୍ୱକପ୍ର ଅଧିନାୟକ ଭାବେ ଘୋଷଣା କରିଥିଲା ।
କେବଳ ବିସିସିଆଇ ନୁହେଁ, ପ୍ରଶଂସକଙ୍କର ମଧ୍ୟ ରୋହିତଙ୍କ ନେତୃତ୍ୱ ଉପରେ ଭରସା ରହିଛି । ସେ ଏଥର ପ୍ରତୀକ୍ଷାର ଅନ୍ତ ଘଟାଇବେ ଏବଂ ବିଶ୍ୱକପ୍ ଟ୍ରଫି ଧରି ସ୍ୱଦେଶ ଫେରିବେ । ତାଙ୍କ ନେତୃତ୍ୱରେ ଗତ ଦିନିକିଆ ବିଶ୍ୱକପ୍ରେ ଭାରତ ଫାଇନାଲରେ ପ୍ରବେଶ କରି ଅଷ୍ଟ୍ରେଲିଆଠୁ ପରାଜିତ ହୋଇଥିଲା ।
ଚର୍ଚ୍ଚାରେ କୋହଲିଙ୍କ ଫର୍ମ
ବିରାଟ କୋହଲି ବିଶ୍ୱ କ୍ରିକେଟରେ ଜଣେ ଅପ୍ରତିଦ୍ୱନ୍ଦ୍ୱୀ ବ୍ୟାଟର । ଏଥର ଆଇପିଏଲରେ ନିଜ ଫର୍ମକୁ ନେଇ ସେ ଚର୍ଚ୍ଚାରେ ରହିଛନ୍ତି । ପ୍ଲେ ଅଫ୍ ପର୍ଯ୍ୟନ୍ତ ସେ ୧୫ ମ୍ୟାଚ୍ ଖେଳି ୭୪୧ ରନ୍ କରିଛନ୍ତି । ଯେଉଁଥିରେ ଗୋଟିଏ ଶତକ ଏବଂ ୫ଟି ଅର୍ଦ୍ଧଶତକ ସାମିଲ ରହିଛି ।
ଯଦିଓ ମଧ୍ୟଭାଗରେ କୋହଲିଙ୍କ ଷ୍ଟ୍ରାଇକ ରେଟ୍କୁ ନେଇ ବିଶେଷଜ୍ଞମାନେ ପ୍ରଶ୍ନ ଉଠାଇଥିଲେ କିନ୍ତୁ ସେ ପରେ ଏହାର ଜବାବ ବ୍ୟାଟରେ (୧୫୪.୬୯) ଦେଇଥିଲେ । ତାଙ୍କ ଫର୍ମ ହିଁ ବିଶ୍ୱକପ୍ରେ ଭାରତୀୟ ଦଳର ପ୍ରମୁଖ ଶକ୍ତି ପାଲଟିଛି । ୨୦୧୨ ବିଶ୍ୱକପ୍ରେ ଭେଟେରାନ କୋହଲି ପଦାର୍ପଣ କରିଥିଲେ । ଏ ପର୍ଯ୍ୟନ୍ତ ସେ ୨୭ଟି ମ୍ୟାଚ୍ରୁ ୧୧୪୧ ରନ୍ (ଆଭରେଜ ୮୧.୫୦, ଷ୍ଟ୍ରାଇକରେଟ୍ ୧୩୧.୩୦) କରିଛନ୍ତି । ଅଧିନାୟକ ରୋହିତ ୩୯ ମ୍ୟାଚ୍ରୁ ୯୬୩ (ଷ୍ଟ୍ରାଇକରେଟ୍ ୧୨୭.୮୮) ରନ୍ କରିଛନ୍ତି । ସେ ଆଇପିଏଲରେ ଏଥର ୧୪ ମ୍ୟାଚ୍ରୁ ୪୧୭ ରନ୍ କରିଥିଲେ ।
ଏହି ଦୁଇ ଭରସାଯୋଗ୍ୟ ଭେଟେରାନ ବ୍ୟାଟର ଯଦି ଫର୍ମରେ ରହିବେ, ତେବେ ସେମାନଙ୍କୁ ଅଟକାଇବା ଯେକୌଣସି ଦଳ ପକ୍ଷେ ଅସମ୍ଭବ। ସେମିତି ଯଶସ୍ୱୀ ଜୈସ୍ୱାଲ, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା ମଧ୍ୟ କିଛି କମ୍ ନୁହଁନ୍ତି । ଦଳରେ ରହିଛନ୍ତି ୪ ସ୍ପିନରଙ୍କ (ଅକ୍ଷର, ଚହଲ, ଜାଡେଜା ଓ କୁଲଦୀପ) ସହ ପେସ ଯାଦୁକର ଯଶପ୍ରୀତ ବୁମରା । ତେଣୁ ଏଥର ଯେ ଭାରତ ଦ୍ୱିତୀୟ ଟାଇଟଲ ସ୍ୱପ୍ନ ପୂରା କରିପାରିବ, ସେଥିରେ କାହାର ସନ୍ଦେହ ନାହିଁ । ମାତ୍ର ସମୟ ଏବଂ ଭାଗ୍ୟ ଟିମ୍ ଇଣ୍ଡିଆକୁ କେତେ ସହାୟତା କରୁଛି ତାହା ହିଁ ବଡ଼ କଥା ।