ନୀଳଗିରି,୨/୬ : ବାଲେଶ୍ଵର ଜିଲ୍ଲା ନୀଳଗିରି ଅଞ୍ଚଳକୁ ପଶି ଆସିଥିବା ଝାଡ଼ଖଣ୍ଡ ହାତୀପଲ ଗତକାଲି ଫେରି ଯାଉଥିବାବେଳେ ପୁଣି ଅଧା ରାସ୍ତାରୁ ଫେରି ଆସିଛନ୍ତି । ତେବେ ହାତୀ ଭୟରେ ଭାଲୁ କୂଅକୁ ଡେଇଁବା ଘଟଣା ଜଣାପଡିଛି । ନୀଳଗିରି ଅଞ୍ଚଳକୁ ଗତ ଗୁରୁବାର ସକାଳୁ ୪୬ଟି ଝାଡ଼ଖଣ୍ଡ ହାତୀପଲ ଆସିଥିଲେ। 

ଗୋପାଳପୁର ସଂରକ୍ଷିତ ଜଙ୍ଗଲରେ ରହି ଜଡ଼ିବାଲି ଓ ଆଖପାଖ ଜଙ୍ଗଲରେ ଉପଦ୍ରବ ଚଳାଇଥିଲେ । ଏବେ ଆଖ ପାଖରେ କିଛି ଖାଦ୍ୟ ପାଇଁ ଚାଷ ନ ଥିବାରୁ ହାତୀପଲ ଭୋକରେ ଆଉଟୁପାଉଟୁ ଡାକୁଥିଲେ । ବନବିଭାଗର ପାଟ୍ରୋଲିଂ ସାଙ୍ଗକୁ ଟ୍ରେଞ୍ଜ ପାଇଁ ଗାଁ ଭିତରକୁ ପଶି ନ ପାରି ଶେଷରେ ଗତକାଲି ରାତିରେ ମୟୁରଭଞ୍ଜ ଜିଲ୍ଲା ବେତନଟୀ ନଡ଼ପୁର ଜଙ୍ଗଲକୁ ଫେରିଯାଉଥିବାବେଳେ ପୁଣି କାଠପାଳ ନିକଟରୁ ଫେରିଆସିଛନ୍ତି । 

ହାତୀପଲ ଗୁଡିକ ଜଙ୍ଗଲରୁ ବାହାରି ମହିସାପଟ୍ଟା ଗାଁ ଆଡ଼କୁ ମୁହଁଇଥିଲେ । ଫଳରେ ଗ୍ରାମବାସୀ ହାତୀ ଉପଦ୍ରବ ପାଇଁ ଆତଙ୍କିତ ହୋଇପଡିଥିଲେ । ହାତୀ ଭୟରେ ଭାଲୁଟି କୂଅକୁ ଡିଆଁ ମାରିବା ଜଣାପଡିଛି । ତେବେ ଗ୍ରାମବାସୀଙ୍କ ସହାୟତାରେ ଭାଲୁଟିକୁ ଉଦ୍ଧାର କରାଯାଇଥିଲା । ଭାଲୁଟି ଦୌଡ଼ି ପାଖ ବାଉଁଶ ବୁଦା ମୂଳରେ ଲୁଚି ରହିଥିବା ଜଣାପଡିଛି ।