ଭୁବନେଶ୍ୱର ୦୧/୦୯: ସ୍ୱୟଂ ସହାୟକ ଗୋଷ୍ଠୀ (ଏସ୍ଏଚ୍ଜି) ମାନଙ୍କୁ ସରକାରଙ୍କର ବିନା ସୁଧରେ କୌଣସି ଋଣ ଦେବାର ବ୍ୟବସ୍ଥା ନାହିଁ। ଶନିବାର ବିଧାନସଭାରେ ବିଧାୟକ ପବିତ୍ର ସାଉଁନ୍ତାଙ୍କ ଏ ସମ୍ପର୍କିତ ପ୍ରଶ୍ନରେ ଉତ୍ତର ରଖିଛନ୍ତି ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ।
ସେ ଗୃହରେ ସୂଚନା ଦେଇଛନ୍ତି, ଏସ୍ଏଚ୍ଜିମାନେ ବ୍ୟାଙ୍କରୁ ଋଣ ନେଇ ସୁଧ ସହିତ ଫେରସ୍ତ କରୁଛନ୍ତି । ନିୟମିତ ଋଣ ପରିଶୋଧ କରୁଥିବା ଏସ୍ଏଚ୍ଜି ମାନଙ୍କୁ ମିଶନ ଶକ୍ତି ଋଣ ତଥା ସୁଧ ଫେରସ୍ତ କାର୍ଯ୍ୟକ୍ରମ ଅଧୀନରେ ସମସ୍ତ ସୁଧ ଫେରସ୍ତ କରାଯାଉଛି । ଆର୍ଥିକ ବର୍ଷ ୨୦୨୩- ୨୪ରେ ମୋଟ୍ ୪ ଲକ୍ଷ ୧୩ ହଜାର ୬୪୫ଟି ଏସ୍ଏଚ୍ଜିଙ୍କୁ ୧୬ ହଜାର ୫୮୬ କୋଟି ୭୬ ଲକ୍ଷ ଟଙ୍କାର ବ୍ୟାଙ୍କ ଋଣ ପ୍ରଦାନ କରାଯାଇଛି । ବ୍ୟାଙ୍କ ଋଣ ନେଇଥିବା ଏସ୍ଏଚ୍ଜି ଗୁଡ଼ିକ ଋଣ କିସ୍ତି ସମ୍ପୃକ୍ତ ବ୍ୟାଙ୍କକୁ ପରିଶୋଧ କରିଥାନ୍ତି । ନିୟମିତ ଋଣ ପରିଶୋଧ କରୁଥିବା ଏସ୍ଏଚ୍ଜି ଗୁଡ଼ିକୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ବ୍ୟାଙ୍କ ଋଣ ଉପରେ ସୁଧ ଫେରସ୍ତ ହେଉଛି ବୋଲି ଉପ ମୁଖ୍ୟମନ୍ତ୍ରୀ ଶ୍ରୀମତୀ ପରିଡ଼ା ସୂଚନା ଦେଇଛନ୍ତି । ଏଥିସହ ରାଜ୍ୟରେ ମିଶନ ଶକ୍ତି ଅଧୀନରେ ୬ ଲକ୍ଷ ୨ ହଜାର ୧୩ଟି ଏସ୍ଏଚ୍ଜିରେ ୭୦ ଲକ୍ଷ ୧୦ ମହିଳା ସାମିଲ ହୋଇଛନ୍ତି ।
ରାଜ୍ୟ ସରକାର ଗତ ୫ ବର୍ଷ ମଧ୍ୟରେ ୧ ଲକ୍ଷ ୧୦ ହଜାର ୨୪ଟି ଏସ୍ଏଚ୍ଜିଙ୍କୁ ବିଭିନ୍ନ ସରକାରୀ ବିଭାଗ ମାଧ୍ୟମରେ ୧୧ ହଜାର ୪୨୬ କୋଟି ୭୭ ଲକ୍ଷ ଟଙ୍କାର ସରକାରୀ ବ୍ୟବସାୟ ଯୋଗାଇ ଦେଇଛନ୍ତି ବୋଲି ଉପ ମୁଖ୍ୟମନ୍ତ୍ରୀ ଶ୍ରୀମତୀ ପରିଡ଼ା ସୂଚନା ଦେଇଛନ୍ତି ।
