ୱାୟନାଡ,୦୯/୦୮: କେରଳର ୱାୟନାଡରେ ଜୁଲାଇ ୨୯ ବିଳମ୍ବିତ  ରାତିରେ ଆସିଥିବା ଭୂସ୍ଖଳନରେ ଏବେ ବି ୧୩୮ ଲୋକ ନିଖୋଜ ଅଛନ୍ତି । ବହୁ  ଖୋଜାଖୋଜି ପରେ ମଧ୍ୟ ସେମାନଙ୍କ  ପତ୍ତା ମିଳୁନାହିଁ । ଏଭଳି ସ୍ଥିତିରେ  ସେନା ଏହାର ସର୍ଚ୍ଚ ଅପରେସନ  ବନ୍ଦ କରିଦେଇଛି। ଭୂସ୍ଖଳନ ଯୋଗୁ  ମୃତ୍ୟୁ ସଂଖ୍ୟା ୪୧୩ରେ ପହଞ୍ଚିଛି ।  ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତା  ୧୦ ତାରିଖ (ଶନିବାର)ରେ ଭୂସ୍ଖଳନ ପୀଡ଼ିତଙ୍କୁ ସାକ୍ଷାତ କରିବା ପାଇଁ  ୱାୟନାଡ ଯାଇପାରନ୍ତି । 

ସୂତ୍ର ମୁତାବକ, ମୋଦି ସ୍ୱତନ୍ତ୍ର ବିମାନ ଯୋଗେ ଯାଇ  କେରଳର କନ୍ନୁରରେ ଓହ୍ଲାଇବେ । କନ୍ନୁରରୁ ପ୍ରଧାନମନ୍ତ୍ରୀ ହେଲିକପ୍ଟର ଯୋଗେ ଭୂସ୍ଖଳନ ପ୍ରଭାବିତ ଅଞ୍ଚଳ ବୁଲି ଦେଖିବେ । ଏହାପରେ ସେ  ରିଲିଫ ଶିବିରରେ ପହଞ୍ଚି ପୀଡ଼ିତମାନଙ୍କୁ  ଭେଟି ସେମାନଙ୍କ ଭଲମନ୍ଦ ପଚାରି ବୁଝିବେ । ରିଲିଫ ଶିବିରରେ ପ୍ରାୟ ୩୦ ହଜାରରୁ ଅଧିକ ଲୋକ ଆଶ୍ରୟ ନେଇଛନ୍ତି । ତେବେ ମୋଦିଙ୍କ ଗସ୍ତ  ପରେ ୱାୟନାଡ ଭୂସ୍ଖଳନକୁ ଜାତୀୟ ବିପର୍ଯ୍ୟୟ ଘୋଷଣା କରାଯାଇପାରେ । 

ରାହୁଲ ଗାନ୍ଧୀ ବୁଧବାର ୱାୟନାଡ  ଭୂସ୍ଖଳନ ଘଟଣାକୁ ଜାତୀୟ ବିପର୍ଯ୍ୟୟ ଘୋଷଣା ଲଗି ଦାବି କରିଥିଲେ । ଏହା  ପୂର୍ବରୁ ଅଗଷ୍ଟ ୧ରେ ରାହୁଲ ଏବଂ  କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ  ଭଦ୍ରା ୱାୟନାଡ ଗସ୍ତ କରିଥିଲେ।