ନୂଆଦିଲ୍ଲୀ,୧୯।୯: ଖଲିସ୍ତାନୀ ଆତଙ୍କୀ ଗୁରୁପନ୍ତଓ୍ବନ୍ତ ସିଂହ ପନ୍ନୁର ହତ୍ୟା ଷଡଯନ୍ତ୍ର ଅଭିଯୋଗରେ ଆମେରିକାର ଏକ କୋର୍ଟ ଭାରତ ସରକାରଙ୍କୁ ସମନ୍ ଜାରି କରିଛନ୍ତି। ଏହାକୁ ନେଇ ଭାରତ ସରକାର କଡା ଆପତ୍ତି ପ୍ରକାଶ କରିଛନ୍ତି। ଭାରତୀୟ ବୈଦେଶିକ ମନ୍ତ୍ରଣାଳୟ ଏହାକୁ ସମ୍ପୂର୍ଣ୍ଣ ଭୁଲ ବୋଲି କହିଛି। ବୈଦେଶିକ ସଚିବ ବିକ୍ରମ ମିସରୀ ଏ ସମ୍ପର୍କରେ କହିଛନ୍ତି, ଏହା ସମ୍ପୂର୍ଣ୍ଣ ଭୁଲ ଓ ଆମେ ଏହାକୁ ବିରୋଧ କରୁଛି। ନ୍ୟୁୟର୍କର ଦକ୍ଷିଣ ଜିଲ୍ଲାର ଡିଷ୍ଟ୍ରିକ୍ଟ କୋର୍ଡ ଏହି ସମନ୍ ଭାରତ ସରକାର, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ, ର’ର ପୂର୍ବତନ ମୁଖ୍ୟ ସାମନ୍ତ ଗୋୟଲ, ର’ ଏଜେଣ୍ଟ ବିକ୍ରମ ଯାଦବ ଓ ବ୍ୟବସାୟୀ ନିଖିଲି ଗୁପ୍ତାଙ୍କ ନାଁରେ ଜାରି କରିଛନ୍ତି। 

ଏହି ସମନ୍‌ରେ ସବୁ ପକ୍ଷକୁ ୨୧ ଦିନ ମଧ୍ୟରେ ଜବାବ୍ ଦେବାକୁ କୁହାଯାଇଛି। ବୈଦେଶିକ ସଚିବ ଆମେରିକା କୋର୍ଟର ସମନରେ କହିଛନ୍ତି, ଯେତେବେଳେ ଆମ ପାଖକୁ ଏହି ମାମଲା ଆସିଥିଲା ଆମେ ଆକ୍ସନ ନେଇଥିଲୁ। ଏହି ମାମଳାରେ ଏକ ହାଇଲେବଲ କମିଟି ଗଠିତ ହୋଇଛି, ଯାହାକି ଯାଞ୍ଚ କରୁଛି। ମୁଁ ଏବେ ସେହି ବ୍ୟକ୍ତିଙ୍କ ଆଡକୁ ଧ୍ୟନ ଦେବାକୁ ଚାହିଁବି ଯିଏକି ଏହି କେସ୍ ରୁଜୁ କରିଛନ୍ତି। ପନ୍ନୁର ଇତିହାସ ସମସ୍ତଙ୍କୁ ଜଣ, ସେ କିଭଳି ବେଆଇନ ସଂଗଠନ ସହ ଜଡିତ। ଏହା ସମସ୍ତଙ୍କୁ ଭଲ ଭାବରେ ଜଣା। 

ଉଲ୍ଲେଖନୀୟ ଯେ, ପନ୍ନୁ କଟ୍ଟରପନ୍ଥୀ ସଂଗଠନ ସିଖ୍ ଫର ଜଷ୍ଟିସର ମୁଖିଆ। ସେ ଭାରତୀୟ ନେତା ଓ ସଂସ୍ଥା ବିରୋଧରେ ବିଷ ଓଗାଳି ସାରିଛି। ଭାରତ ସରକାର ୨୦୨୦ ରେ ପନ୍ନୁକୁ ଆତଙ୍କବାଦୀ ଘୋଷିତ କରିଥିଲେ। ଗତ ବର୍ଷ ନଭେମ୍ବରରେ ବ୍ରିଟିସ୍ ଖବର କାଗଜର ଫାଇନାନ୍ସିଆଲ ଟାଇମ୍ସ ନିଜର ଏକ ରିପୋର୍ଟରେ ଦାବି କରିଥିଲେ ପନ୍ନୁଙ୍କ ହତ୍ୟା ଷଡଯନ୍ତ୍ର ଆମେରିକା ବିଫଳ କରିଛି। ପନ୍ନୁ ପାଖରେ ଆମେରିକା ଓ କାନାଡା ଉଭୟ ଦେଶର ନାଗରିକତ୍ବ ରହିଛି। ଏହି ରିପୋର୍ଟ ପରେ ଜୋ ବାଇଡେନ୍ ପ୍ରଶାସନ ମଧ୍ୟ ସୂଚନା ଦେଇଥିଲା। ଏ ସମ୍ପର୍କରେ ସୂଚନା ମିଳିବା ପରେ ବୈଦେଶିକ ମନ୍ତ୍ରଣାଳୟ କହିଥିଲା ଯେ, ଯଦି ଏଭଳି ହୋଇଥାଏ ତେବେ ଚିନ୍ତାର ବିଷୟ। ଆମେ ଏ ବିଷୟରେ ଉଚ୍ଚସ୍ତରୀୟ ବୈଠକ କରି ଯାଞ୍ଚ କରିବୁ।