ଇସ୍ଲାମାବାଦ,୨୭/୦୨: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ବେନଜୀର ଭୁଟ୍ଟୋ ଓ ପୂର୍ବତନ ରାଷ୍ଟ୍ରପତି ଆସିଫ ଅଲ୍ଲୀ ଜର୍ଦ୍ଦାରୀଙ୍କ ସାନ ଝିଅ ଆସିଫା ରାଜନୀତିକୁ ଓହ୍ଲାଇବେ ବୋଲି ଚର୍ଚ୍ଚା ହେଉଛି । ଜିଓ ଲାଇଭ୍ ରିପୋର୍ଟ ମୁତାବକ ଆସିଫା ନ୍ୟାସନାଲ୍ ଆସେମ୍ବ୍ଲି (ସଂସଦ) ପାଇଁ ହେବାକୁ ଥିବା ଉପନିର୍ବାଚନରେ ଭାଇ ବିଲାୱଲ ଭୁଟ୍ଟୋଙ୍କ ଶହଦକୋଟ ଆସନରୁ ନିର୍ବାଚନ ଲଢ଼ିବା ଲାଗି ପ୍ରସ୍ତୁତି ଚଳାଇଛନ୍ତି ।
ବିଲାୱଲ ଏଥର ଉଭୟ ଶହଦକୋଟ ଓ ଲରକାନା ଆସନରୁ ନିର୍ବାଚନ ଲଢ଼ିଥିଲେ । ଦୁଇଟିଯାକ ଆସନରୁ ବିଜୟୀ ହୋଇଥିଲେ । ତାଙ୍କୁ ଏବେ ଗୋଟିଏ ଖାଲି କରିବାକୁ ହେବ । କୁହାଯାଉଛି ଯେ ବିଲାୱଲ ଲରକାନା ଆସନକୁ ରଖି ଶହଦକୋଟକୁ ଭଉଣୀ ଆସିଫାଙ୍କ ପାଇଁ ଛାଡ଼ିଦେବେ । ଆସିଫାଙ୍କୁ ସେ ରାଜନୀତିରେ ସାମିଲ କରାଇବାକୁ ଚାହୁଁଛନ୍ତି । ଯେ କୌଣସି ମୁହୂର୍ତ୍ତରେ ଏ ନେଇ ଘୋଷଣା ହୋଇପାରେ।
ରିପୋର୍ଟ ମୁତାବକ ଆସିଫ ଅଲ୍ଲୀ ଜର୍ଦ୍ଦାରୀ ଏବଂ ବିଲାୱଲ ଆସିଫାଙ୍କୁ ରାଜନୀତିରେ ସାମିଲ କରାଇବା ପାଇଁ ଚୂଡ଼ାନ୍ତ ନିଷ୍ପତ୍ତି ନେଇସାରିଛନ୍ତି । ଆସିଫାଙ୍କଠାରେ କିଛି ଲୋକ ବେନଜୀରଙ୍କ ଝଲକ ଦେଖିବାକୁ ପାଉଥିବା କହିଛନ୍ତି । ତାଙ୍କ ଭାଷଣକୁ ବି ଅନେକ ଲୋକ ପସନ୍ଦ କରୁଛନ୍ତି । ତା’ଛଡ଼ା ଲଣ୍ଡନରେ ରହି ସୁଦ୍ଧା ଆସିଫା ପାକିସ୍ତାନ ରାଜନୀତିକୁ ନେଇ ସକ୍ରିୟ ରହିଛନ୍ତି । ଆହୁରି କୁହାଯାଉଛି ଯେ ନୱାଜ ଶରିଫଙ୍କ ଦଳକୁ ସମର୍ଥନ କରିବାକୁ ବିଲାୱଲ ପ୍ରଥମେ ଚାହୁଁ ନ ଥିଲେ । ଏଥିପାଇଁ ଆସିଫା ହିଁ ତାଙ୍କୁ ମନାଇଥିଲେ ।