ଭୁବନେଶ୍ୱର, ୧୩।୯: ହାତରେ ସାଲାଇନ ଲାଗିଛି । ବେଡ୍ରେ ଶୋଇଛନ୍ତି ରୋଗୀ । ବେଡ୍ ଚାରିପାଖେ କୁଢ଼କୁଢ଼ ପଚାସଢ଼ା ଅଳିଆ । ଡଷ୍ଟବିନ୍ ଗଡ଼ୁଛି ମୁଣ୍ଡ ପାଖରେ । ଦୁର୍ଗନ୍ଧ ଏମିତି ଯେ ପେଟରୁ ବାନ୍ତି ବାହାରି ଯାଉଛି । ଇଏ ହେଉଛି କ୍ୟାପିଟାଲ ହସ୍ପିଟାଲ ଅବସ୍ଥା । ଜଣେ କି ଦୁଇଜଣ ରୋଗୀ ଏ ଦୁର୍ଦ୍ଦଶା ଭୋଗୁନାହାନ୍ତି । ପୂରା ହସ୍ପିଟାଲ ଏମିତି ଗନ୍ଧରେ କଲବଲ ହେଉଛି । ସ୍ଥିତି ଏମିତି- ଯେଉଁ ହସ୍ପିଟାଲକୁ ରୋଗୀ ସୁସ୍ଥ ହେବାକୁ ଆସିଛନ୍ତି, ସେଠାରେ ଏବେ ସଂକ୍ରମଣ ମାଡ଼ିବା ଆଶଙ୍କା ଘାରିଲାଣି । ରୋଗୀ ସାଥୀରେ ଥିବା ସମ୍ପର୍କୀୟ ବି ରୋଗରେ ପଡ଼ିଲେଣି । ସଫେଇ କର୍ମଚାରୀଙ୍କ ଉତ୍ପାତରେ ପୂରା କ୍ୟାପିଟାଲ ହସ୍ପିଟାଲ ଡମ୍ପିଂୟାର୍ଡ ପାଲଟିଛି । ପ୍ରତି ୱାର୍ଡ, କ୍ୟାବିନ, କାଜୁଆଲିଟି, ଏମିତିକି ଅପରେସନ ଥିଏଟର ଭିତରେ ବି କୁଢ଼କୁଢ଼ ଅଳିଆ ପଡ଼ିଛି । ଡାକ୍ତରଙ୍କ ଟେବୁଲ ବି ବାଦ୍ ପଡ଼ିନି । ୪ ଦିନର ଅଳିଆକୁ ଏମିତି ଫିଙ୍ଗା ଯାଇଛି, ଯେମିତି ହସ୍ପିଟାଲ ନୁହେଁ, ଡମ୍ପିଂୟାର୍ଡ ଭଳି ଲାଗୁଛି । ୟା’ ଭିତରେ ଚାଲିଛି ରୋଗୀ ଚିକିତ୍ସା ।
କ୍ୟାପିଟାଲ ହସ୍ପିଟାଲରେ ରବିବାରଠାରୁ ଧାରଣାରତ ସଫେଇ କର୍ମଚାରୀଙ୍କ ଉତ୍ପାତ ଆଜି ସବୁ ସୀମା ଟପିଗଲା । ହସ୍ପିଟାଲରୁ ଅଳିଆ ତ ଉଠାଇଲେନି, ଓଲଟି ହସ୍ପିଟାଲ ସାରା ବୁଲି ବୁଲି ଅଳିଆ ଗଦାଇଲେ । ୱାର୍ଡରୁ କ୍ୟାବିନ ଯାଏଁ, ଯେଉଁଠି ଇଚ୍ଛା ହେଲା ପଚାସଢ଼ା ଅଳିଆ ଫିଙ୍ଗିଲେ । ଡଷ୍ଟବିନ୍ ଟେକି ନେଇ ରୋଗୀଙ୍କ ପାଖରେ ଥୋଇ ଦେଲେ । ଡାକ୍ତରଙ୍କ ଟେବୁଲକୁ ଛାଡ଼ିଲେନି । ଆଇସିୟୁ ସମ୍ମୁଖରେ ମଳ ମୂତ୍ର ପଡ଼ିରହିଛି । ପ୍ରସୂତି ୱାର୍ଡଠାରୁ ଅସ୍ତ୍ରୋପଚାର ଗୃହ ଏବଂ ଆଇସିୟୁଠାରୁ ମେଡିସିନ୍ ୱାର୍ଡ ପର୍ଯ୍ୟନ୍ତ ସବୁଠି ଅବସ୍ଥା ଅସମ୍ଭାଳ । ଗନ୍ଧରେ ନାକ ଫାଟିଯାଉଛି, ପେଟରୁ ବାନ୍ତି ବାହାରି ଯାଉଛି । ସଫେଇ କର୍ମଚାରୀମାନେ ଧାରଣା ଆଳରେ ମଙ୍ଗଳବାର କ୍ୟାପିଟାଲ ହସ୍ପିଟାଲରେ ଅରାଜକତା ଖେଳାଇଛନ୍ତି । ସକାଳୁ ସଞ୍ଜ ଯାଏଁ ସେମାନଙ୍କ କବ୍ଜାରେ ଥିଲା ପୂରା ହସ୍ପିଟାଲ । ଜିଲ୍ଲାପାଳ, ବିଧାୟକ କି ବିଏମ୍ସି କମିଶନର କାହାରିକୁ ଖାତିର୍ କଲେନି । ନାଲି ଆଖି ଦେଖାଇ ଧମକାଇଲେ । କହିଲେ, ଆମ ଦାବି ମାନ, ନହେଲେ ହସ୍ପିଟାଲରେ ଆହୁରି ଅଳିଆ ଗଦାଇବୁ । ପୂରା ହସ୍ପିଟାଲକୁ ଡମ୍ପିଂୟାର୍ଡ କରିଦେବୁ । ସଫେଇ କର୍ମଚାରୀଙ୍କ ଏଭଳି ଉତ୍ପାତରେ ରୋଗୀ ନାଚାର । ଚିକିତ୍ସା ସେବା ପାଇଁ ଆସି ନର୍କ ଯନ୍ତ୍ରଣା ପାଉଛନ୍ତି । ଡାକ୍ତର ବି ସେବା ଦେବାକୁ ଯାଇ ସମଦଶା ଭୋଗୁଛନ୍ତି । ସ୍ୱାସ୍ଥ୍ୟ କର୍ମଚାରୀ ମଧ୍ୟ ସେଥିରେ ଛଟପଟ । ରୋଗୀ ବାଧ୍ୟ ହୋଇ ଚିକିତ୍ସା ଅଧାରୁ ଛାଡ଼ି ପଳାଉଛନ୍ତି । ଗେଟ୍ରୁ ଭିତରକୁ ପଶିଲାବେଳକୁ ଏମିତି ଗନ୍ଧ ହେଉଛି, ଯେମିତି ମଲା ପଶୁ ପଡ଼ି ପଡ଼ି ସଢ଼ିଗଲାଣି ।
ଆଶ୍ଚର୍ଯ୍ୟର କଥା, ପୂରା ପ୍ରଶାସନ ହାତ ଟେକି ଦେଇଛି । ଯେମିତି ସଫେଇ କର୍ମଚାରୀଙ୍କ ଉତ୍ପାତ ଉପରେ କାହାରି କର୍ତ୍ତୃତ୍ୱ ନାହିଁ । ହସ୍ପିଟାଲର ଫାଣ୍ଡି ପୁଲିସ ସହ ବାଟାଲିଅନ ଯବାନ ମୁତୟନ ଅଛନ୍ତି । ମାତ୍ର କେହି କିଛି କରୁନାହାନ୍ତି । ପୁଲିସ ଆଖି ଆଗରେ ଆନ୍ଦୋଳନକାରୀ ସଫେଇ କର୍ମଚାରୀ ଏଭଳି କାରନାମା କରୁଛନ୍ତି । ପୁଲିସ ନା ରୋକୁଛି ନା କାର୍ଯ୍ୟାନୁଷ୍ଠାନ ନେଉଛି । ହସ୍ପିଟାଲ କର୍ତ୍ତୃପକ୍ଷ ବି ହାତ ଟେକି ଦେଇଛନ୍ତି । ମଙ୍ଗଳବାର ପୂରା ଦିନର ଚିତ୍ର ଥିଲା ଏମିତି । ସକାଳ ୭ଟାରୁ ପ୍ରଶାସନ ବିଲ୍ଡିଂ ସାମ୍ନାରେ ପୁଣି ଧାରଣା ଚାଲିଲା । କିଛି ସଫେଇ କର୍ମଚାରୀ ନାରାବାଜି ଲଗାଉଥିଲେ । କ୍ୟାପିଟାଲ ହସ୍ପିଟାଲ ଫାଣ୍ଡି ଓ ବାଟାଲିଅନ୍ ଯବାନ ସେମାନଙ୍କୁ ଜଗି ରହିଥିଲା । ଅନ୍ୟପଟେ ହସ୍ପିଟାଲ ଭିତରେ କିଛି ସଫେଇ କର୍ମଚାରୀ ଉତ୍ପାତ ଆରମ୍ଭ କରିଦେଲେ । ୨ ଦିନ ଧରି ହସ୍ପିଟାଲରେ ଗଦା ହୋଇଥିବା ଅଳିଆକୁ ଇଆଡେ ସିଆଡ଼େ ଫିଙ୍ଗିବାକୁ ଲାଗିଲେ । ହସ୍ପିଟାଲ ବିଲ୍ଡିଂ ବାହାରେ ଥିବା ଡଷ୍ଟବିନ୍କୁ ଘୋଷାଡ଼ି ନେଇ ରୋଗୀଙ୍କ ପାଖରେ ଅଜାଡ଼ିଦେଲେ । ଏମିତିକି ଅଳିଆ ଉଠାଇବାକୁ ଚେଷ୍ଟା କରୁଥିବା ରୋଗୀଙ୍କ ସମ୍ପର୍କୀୟଙ୍କୁ ଠେଲାପେଲା କଲେ । ଅଭଦ୍ର ଗାଳିରେ କମ୍ପୁଥିଲା ହସ୍ପିଟାଲ ପରିସର । ଖୋର୍ଦ୍ଧା ଜିଲ୍ଲାପାଳ କେ ସୁଦର୍ଶନ ଚକ୍ରବର୍ତ୍ତୀ ସକାଳୁ ଧାରଣାସ୍ଥଳରେ ପହଞ୍ଚି ସେମାନଙ୍କୁ ବୁଝାଇଥିଲେ । ମାତ୍ର ସେ ବୁଝାଇପାରିଲେନି, ଫେରିଗଲେ । ତା’ ପରେ ବିଧାୟକ ଅନନ୍ତ ନାରାୟଣ ଜେନା, ବିଏମସି କମିଶନର ବିଜୟ ଅମୃତ କୁଲାଙ୍ଗେ ମଧ୍ୟ ପହଞ୍ଚିଥିଲେ । ସେମାନେ ବି ପାରିଲେନି ।
କ୍ୟାପିଟାଲ ଥାନା ଅଧିକାରୀ ଓ ଅନ୍ୟ ବରିଷ୍ଠ ପୁଲିସ୍ ଅଧିକାରୀ ମଧ୍ୟ ସଫେଇ କର୍ମଚାରୀଙ୍କ ଦାଦାଗିରି ସାମ୍ନାରେ ନାଚାର୍ ଲାଗୁଥିଲେ । ସାଂସଦ ଅପରାଜିତା ଷଡ଼ଙ୍ଗୀ ବି ସେମାନଙ୍କୁ ବୁଝାଇବାକୁ ଆସିଥିଲେ । ତାଙ୍କ କଥା ବି ଶୁଣିଲେନି । ମୂଳ ବିବାଦ ରହିଛି ସଫେଇ କର୍ମଚାରୀଙ୍କ ଦାବିକୁ ନେଇ । ଆସନ୍ତା ୧୫ ତାରିଖରୁ ନୂଆ କମ୍ପାନୀ ‘କ୍ୟୁଇଜ୍ କର୍ପ ଲିଃ’ କ୍ୟାପିଟାଲ ହସ୍ପିଟାଲ୍ରେ ସଫେଇ ଓ ସୁରକ୍ଷା ଗାର୍ଡ ଏବଂ ଅନ୍ୟାନ୍ୟ ଦାୟିତ୍ୱ ନେବ । ତେବେ ଏହା ପୂର୍ବରୁ ଯେଉଁ ସଂସ୍ଥା ଦାୟିତ୍ୱରେ ଥିଲା, ତା’ର ସଫେଇ କର୍ମଚାରୀମାନେ ଆନ୍ଦୋଳନକୁ ଓହ୍ଲାଇଛନ୍ତି । ସେମାନଙ୍କ ଦାବି ହେଲା-ସମସ୍ତ କର୍ମଚାରୀଙ୍କୁ ନୂଆ କମ୍ପାନି ପୁନଃନିଯୁକ୍ତି ଦେଉ । ଦରମା ବୃଦ୍ଧି ସହ, ଇପିଏଫ୍, ଇଏସ୍ଆଇ ଲାଗୁ କରାଯାଉ । ଏସବୁ ଦାବି ନେଇ ଆନ୍ଦୋଳନ ଚଳାଇଥିବା କର୍ମଚାରୀମାନେ ଏବେ କ୍ୟାପିଟାଲ ହସ୍ପିଟାଲକୁ ପୂରା ନିଜ ଅକ୍ତିଆରକୁ ନେଇ ଯାଇଛନ୍ତି । ସେମାନେ ଯାହା ଇଚ୍ଛା, ତାହା କରୁଛନ୍ତି ।
