କଟକ,୧୧/୦୯: ସୋସିଆଲ୍ ମିଡିଆର ଚର୍ଚ୍ଚିତ ଚେହେରା ତଥା ଓଲିଉଡ୍ର ଜଣେ ନବାଗତ ନାୟିକାଙ୍କ ଭିଡିଓକୁ ଆପତ୍ତିଜନକ ଭାଷାରେ ରୋଷ୍ଟିଂ କରିବା ଅଭିଯୋଗରେ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଯେଉଁ ଯୁବକଜଣକ ୟୁଟ୍ୟୁବ୍ ପେଜ୍ରେ ରୋଷ୍ଟିଂ ଭିଡିଓ ପୋଷ୍ଟ କରିଥିଲା ତାକୁ କଟକ ସାଇବର ଥାନା ପୁଲିସ ଗିରଫ କରିଛି । ଅଭିଯୁକ୍ତ ଜଣକ ହେଲା କେନ୍ଦୁଝର ଘଷିପୁରା ଥାନା ଅନ୍ତର୍ଗତ କଂସ କେନ୍ଦୁଆ ଗ୍ରାମର ରାଜେନ୍ଦ୍ର ଜେନାଙ୍କ ପୁଅ ବାବୁ ଓରଫ ଶ୍ରୀତମ ଜେନା(୨୦) । ତା’ନିକଟରୁ ଏକ ମୋବାଇଲ ଫୋନ୍ ଜବତ ହୋଇଛି । ଅଭିଯୁକ୍ତକୁ କୋର୍ଟଚାଲାଣ କରାଯାଇଥିବା ଡିସିପି ପିନାକ୍ ମିଶ୍ର ସୂଚନା ଦେଇଛନ୍ତି ।
ୟୁଟ୍ୟୁବ୍ରେ ‘ଆଇ ଆମ୍ ଇଣ୍ଡିଆ ଡନ୍ ଅଫିସିଆଲ୍’ ନାମରେ ଶ୍ରୀତମ୍ ଏକ ପେଜ୍ ତିଆରି କରିଛି । ଏହି ପେଜ୍ ମାର୍ଚ୍ଚ ୨୦୨୧ରୁ ଆରମ୍ଭ ହୋଇଛି । ଏଥିରେ ଶତାଧିକ ଭିଡିଓ ରହିଛି । ମାସକ ତଳେ ଏହି ପେଜ୍ରେ ଏକ ରୋଷ୍ଟିଂ ଭିଡିଓ ପୋଷ୍ଟ କରାଯାଇଥିଲା । ୬ ମିନିଟ୍ର ଏହି ଭିଡିଓରେ ସୋସିଆଲ୍ ମିଡିଆର ଜଣେ ଚର୍ଚ୍ଚିତ ଚେହେରା ତଥା ଓଲିଓଡ୍ର ଜଣେ ନାବାଗତା ନାୟିକାଙ୍କର ୟୁଟ୍ୟୁବ୍ ଓ ଇନ୍ଷ୍ଟାଗ୍ରାମ୍ ଭିଡିଓ ନେଇ ରୋଷ୍ଟିଂ କରାଯାଇଛି । ଏଥିରେ ଶ୍ରୀତମ ଅତିଆପତ୍ତିଜନକ ଭାଷା ପ୍ରୟୋଗ କରିଛି । ସଂପୃକ୍ତ ଯୁବତୀ ଜଣକ କଟକ ସିଡିଏରେ ରହୁଛନ୍ତି । ସେ ଏହି ରୋଷ୍ଟିଂ ଭିଡିଓକୁ ଦେଖିବା ପରେ ମାନସିକ ଆଘାତ ପାଇବା ସହ କଟକ ସାଇବର ଥାନାରେ ଗତ ୧ ତାରିଖରେ ଏତଲା ଦାଏର କରିଥିଲେ । ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଭିଡିଓ ସଂପର୍କରେ ୟୁଟ୍ୟୁବ୍ରୁ ତଥ୍ୟ ଆସିବା ପରେ ଉକ୍ତ ପେଜ୍ଟି କେନ୍ଦୁଝର ଘଷିପୁରା ଅଞ୍ଚଳର ବାବୁ ଓରଫ ଶ୍ରୀତମ ଜେନାର ବୋଲି ଜଣାପଡ଼ିଲା । ପୁଲିସ ଆଜି ଘଷିପୁରାରୁ ଅଭିଯୁକ୍ତ ବାବୁକୁ ଗିରଫ କରି କୋର୍ଟଚାଲାଣ କରିଛି ।
ପୁଲିସର କହିବାନୁସାରେ, ବାବୁର ଶିକ୍ଷାଗତ ଯୋଗ୍ୟତା ମାଟ୍ରିକ୍ ଫେଲ୍ । ୟୁଟ୍ୟୁବ୍ରେ ଅନ୍ୟ ଯୁବକମାନେ ବହୁ ରୋଷ୍ଟିଂ ଭିଡିଓ କରି ଫଲୋଅର ବଢ଼ାଇ ଟଙ୍କା ରୋଜଗାର କରୁଥିବା ଜାଣିବା ପରେ ସେ ପ୍ରାୟ ଅଢ଼େଇ ବର୍ଷ ହେବ ରୋଷ୍ଟିଂ ଭିଡିଓ କରି ୟୁଟ୍ୟୁବ୍ରେ ପୋଷ୍ଟ୍ କରୁଛି । ଏଯାବତ୍ ସେ ୩୦ରୁ ଅଧିକ ଚର୍ଚ୍ଚିତ ଚେହେରାଙ୍କର ଭିଡିଓକୁ ନେଇ ଆପତ୍ତିଜନକ ରୋଷ୍ଟିଂ ଭିଡିଓ କରି ପୋଷ୍ଟ କରିଛି । ମାତ୍ର କେବେ କେହି ଏଭଳି ଭିଡିଓ ନେଇ ପୁଲିସ ପାଖରେ ଅଭିଯୋଗ କରିନଥିଲେ । ପ୍ରଥମ ଥର ଏଭଳି ଅଭିଯୋଗ ହେବା ପରେ ପୁଲିସ ଉକ୍ତ ଭିଡିଓକୁ ୟୁଟ୍ୟୁବ୍ରୁ ଡିଲିଟ୍ କରିବା ସହ ବାବୁକୁ ଗିରଫ କରିଛି ।
