ନୂଆଦିଲ୍ଲୀ,୨୯।୧୧: ରାଜସ୍ଥାନ ଭିଓ୍ବଣ୍ଡିର ଅଞ୍ଜୁ ପ୍ରାୟ ୫ ମାସ ପରେ ପାକିସ୍ତାନରୁ ଭାରତ ଫେରିଛନ୍ତି। ଅଞ୍ଜୁଙ୍କ ସ୍ବାମୀ ନସରୁଲ୍ଲାହ ତାଙ୍କୁ ଓ୍ବାଘା ବର୍ଡରରେ ଛାଡିବାକୁ ପହଞ୍ଚିଥିଲେ। ସେ କହିଛନ୍ତି, ଅଞ୍ଜୁ ତାଙ୍କ ପିଲାଙ୍କୁ ଦେଖା କରିବାକୁ ଭାରତ ଯାଉଛନ୍ତି। ଏହା ଭିତରେ ବିଭିନ୍ନ ସୁତ୍ରରୁ ଖବର ମିଳିଛି ଯେ, ଅଞ୍ଜୁଙ୍କୁ ବିଭିନ୍ନ ତଦନ୍ତକାରୀ ଏଜେନ୍ସିର ପ୍ରଶ୍ନର ସାମନା କରିବାକୁ ପଡିପାରେ। ଏଜେନ୍ସି ଗୁଡିକ ପକ୍ଷରୁ ତାଙ୍କୁ ପଚରା ଉଚରା କରାଯିବ। ନସରୁଲ୍ଲାହ ଏହା ମଧ୍ୟ କହିଛନ୍ତି ଯେ, ପିଲାଙ୍କୁ ଭେଟିବା ପରେ ଅଞ୍ଜୁ ପୁଣିଥରେ ପାକିସ୍ତାନ ଫେରି ଆସିବେ। ଉଲ୍ଲେଖନୀୟ ଯେ, ଚଳିତ ବର୍ଷ ଜୁଲାଇରେ ଅଞ୍ଜୁ ପାକିସ୍ତାନ ଚାଲିଯାଇଥିଲେ, ସେଠାରେ ସେ ଇସଲାମ ଧର୍ମକୁ ଗ୍ରହଣ କରି ନସରୁଲ୍ଲା ନାମକ ଜଣେ ଯୁବକଙ୍କୁ ବିବାହ କରିଥିଲେ।
ଅଞ୍ଜୁ ପାକିସ୍ତାନରେ ଇସଲାମ୍ ଗ୍ରହଣ କରି ନସରୁଲ୍ଲାଙ୍କୁ ବିବାହ କରି ନିଜର ନାଁ ବଦଳାଇ ଦେଇଥିଲେ। ସେ ନିଜ ନାଁ ଫାତିମା ରଖିଥିଲେ। ଆଶଙ୍କା ରହିଛି ଯେ, ଅଞ୍ଜୁଙ୍କର ତାଙ୍କ ପୂର୍ବତନ ସ୍ବାମୀ ଅରବିନ୍ଦଙ୍କ ସହ ବିବାଦ ବଢିପାରେ। ବିବାଦ ବଢିଲେ ଅରବିନ୍ଦ ପୋଲିସର ସାହାଯ୍ୟ ନେବେ ବୋଲି କହିଛନ୍ତି। ଅଞ୍ଜୁ ଓ ଅରବିନ୍ଦଙ୍କର ଦୁଇଟି ସନ୍ତାନ ଅଛନ୍ତି। ପିଲାମାନେ ଏବେ ଅରବିନ୍ଦଙ୍କ ପାଖରେ ଅଛନ୍ତି। ଅରବିନ୍ଦ କହିଛନ୍ତି ସେ ପିଲାଙ୍କୁ ଅଞ୍ଜୁଙ୍କ ସହ ଦେଖା କରାଇ ଦେବେନି।
ଅରବିନ୍ଦ ନିଜ ପିଲାଙ୍କ ପାଇଁ ପୂର୍ବରୁ ପୋଲିସ ପାଖକୁ ଯାଇ ସାରିଛନ୍ତି। ସ୍ଥାନୀୟ ପୋଲିସ ଓ ତଦନ୍ତକାରୀ ଏଜେନ୍ସି ଅଞ୍ଜୁଙ୍କୁ ପଚରା ଉଚରା କରିପାରେ। ବର୍ତ୍ତମାନ ଅଞ୍ଜୁଙ୍କ ବୟାନ ସାମନାକୁ ଆସିନାହିଁ। ଭାରତରେ ତାଙ୍କର କ’ଣ କାର୍ଯ୍ୟ ରହିଛି ତାହା ମଧ୍ୟ ଏବେ ଦେଖିବାର ଅଛି। ଅଞ୍ଜୁଙ୍କ ପାକିସ୍ତାନୀ ସ୍ବାମୀ ପୂର୍ବରୁ ଏହା ମଧ୍ୟ ଦାବି କରିଛନ୍ତି ଯେ, ଅଞ୍ଜୁ ତାଙ୍କୁ ବିବାହ ପ୍ରସ୍ତାବ ରଖିଥିଲ। ଭାରତରେ ବିନା ଛାଡପତ୍ରରେ ଦ୍ବିତୀୟ ବିବାହ ବେଆଇନ ବୋଲି କୁହାଯାଏ। ଏଭଳି ସ୍ଥିତିରେ ଅଞ୍ଜୁଙ୍କୁ ଆଇନଗତ କାର୍ଯ୍ୟାନୁଷ୍ଠାନର ସାମନା କରିବାକୁ ପଡିପାରେ।
