ପାଟଣା, ୦୪/୦୧: ପୋଲିସ ଭ୍ୟାନକୁ ଧକ୍କା ମାରି ମାରି କୋର୍ଟରେ ପହଞ୍ଚାଇଲେ ଅଭିଯୁକ୍ତ । ଏ ସମ୍ପର୍କିତ ବିଡିଓ ସୋସିଆଲ୍ ମିଡିଆରେ ଭାଇରାଲ୍ ହେଉଛି । ଏ ଘଟଣା ଘଟିଛି ବିହାରରେ । ଭାଇରାଲ୍ ଭିଡିଓରେ ଦେଖା ଯାଉଛି, ୪ ଜଣ ଅଭିଯୁକ୍ତ ପୋଲିସ ଭ୍ୟାନକୁ ଠେଲି ଠେଲି ନେଉଛନ୍ତି ।
ରବିବାର ବିହାର ପୋଲିସ ମଦ୍ୟପାନ ଅଭିଯୋଗରେ ୪ ଅଭିଯୁକ୍ତଙ୍କୁ ଗିରଫ କରିଥିଲା । ପୋଲିସ ୪ ଅଭିଯୁକ୍ତଙ୍କୁ ଗିରଫ ପରେ କୋର୍ଟ ଚାଲାଣ କରିବାକୁ ନେଉଥିଲା । ହେଲେ ପୋଲିସ ଭ୍ୟାନ୍ କୋର୍ଟରେ ପହଞ୍ଚିବା ପୂର୍ବରୁ ଅଧା ବାଟରେ ସରି ଯାଇଥିଲା ତେଲ । ଆଉ ତା ପରେ ଭ୍ୟାନରେ କୋର୍ଟ ଚାଲାଣ ହେଉଥିବା ୪ ଅଭିଯୁକ୍ତ ଗାଡ଼ିକୁ ୫୦୦ ମିଟର ଠେଲି ଠେଲି ନେଇଥିଲେ ।
ବିହାରର କଚାହରି ଛକ ନିକଟରେ ଏହି ଘଟଣା ଘଟିଛି । କାର୍ଯ୍ୟରତ ପୋଲିସ ଅଧିକାରୀ ୪ ଅଭିଯୁକ୍ତଙ୍କୁ ଗାଡ଼ିକୁ ଧକ୍କା ଦେବା ପାଇଁ କହିଥିବା ସୂଚନା ମିଳିଛି । ଭାଇରାଲ୍ ଭିଡିଓରେ ଦେଖା ଯାଉଛି ପୋଲିସ ୨ ଅଭିଯୁକ୍ତଙ୍କ ଅଣ୍ଟା ସହ ଅନ୍ୟ ୨ ଅଭିଯୁକ୍ତଙ୍କ ହାତ ପାପୁଲିକୁ ରସିରେ ବାନ୍ଧି ଦେଇଛି । ପଛରେ ଜଣେ ପୋଲିସ ଅଧିକାରୀ ଗାଡ଼ିକୁ ଠେଲିବା ଲାଗି ଇସାରା କରି ଚାଲିଛନ୍ତି ।
ସୋସିଆଲ୍ ମିଡିଆରେ ଏ ସମ୍ପର୍କିତ ଭିଡିଓ ଭାଇରାଲ୍ ପରେ ଅତିରିକ୍ତ କମିଶନର ପ୍ରମୋଦିତ ନାରାୟଣ ସିଂହ କହିଛନ୍ତି, ତଦନ୍ତ ନିର୍ଦ୍ଦେଶ ଦିଆ ଯାଇଛି । ଯେଉଁ ଅଧିକାରୀ ଦୋଷୀ ପାଇବେ ତାଙ୍କ ବିରୋଧରେ ଆଇନ୍ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।