ଦ୍ୱାରକା : ଘରେ ଏସି ଲଗାଇ ଶୋଉ ଥିଲେ ସାବଧାନ। ଗୁଜରାଟର ଦେବଭୂମି ଦ୍ୱାରକା ଜିଲ୍ଲାର ଦ୍ୱାରକା ସିଟିରୁ ଆସିଛି ଏମିତି ଏକ ଖବର। ଏକ କୋଠାରେ ଏସି ଓଭରହିଟ୍ ହେବାରୁ ନିଆଁ ଲାଗି ଯାଇଥିଲା। ତତ୍କ୍ଷଣାତ୍ ଏହି ନିଆଁ ପୂରା ଘରେ ବ୍ୟାପି ଯାଇଥିଲା ଏବଂ ଧୂଆଁରେ ଅଣ ନିଶ୍ୱାସୀ ହୋଇ ଗୋଟିଏ ପରିବାରରୁ ୪ ଜଣ ଲୋକଙ୍କ ମୃତ୍ୟୁ ହୋଇ ଯାଇଛି। ସେପଟେ ଜଣଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ଅନେକ ଚେଷ୍ଟା ପରେ ନିଆଁକୁ କାବୁ କରାଯାଇଛି।
ପୁଲିସ ରବିବାର ଦିନ ଏହି ବିଷୟରେ ସୂଚନା ଦେଇ କହିଛି ଯେ, ଗୁଜରାଟର ଦେବଭୂମି ଦ୍ୱାରକା ଜିଲ୍ଲାରେ ଏକ କୋଠାରେ ନିଆଁ ଲାଗିବାରୁ ଜଣେ ପିଲା ସହ ଗୋଟିଏ ପରିବାରର ୪ ଜଣ ସଦସ୍ୟଙ୍କ ନିଶ୍ୱାସ ବନ୍ଦ ହୋଇ ଯିବାରୁ ମୃତ୍ୟୁ ହୋଇଛି। ମୃତକମାନେ ହେଲେ ପବନ ଉପାଧ୍ୟାୟ (୩୯) , ତାଙ୍କ ପତ୍ନୀ ତିଥି (୨୯), ଝିଅ ଧ୍ୟାନା ଓ ମାଆ ଭବାନୀବେନ୍ (୬୯)। ପୁଲିସ ସବୁ ଶବକୁ ପୋଷ୍ଟମର୍ଟମ ପାଇଁ ପଠାଇ ଦେଇଛି। ପୁଲିସ ମାମଲା ରୁଜୁ କରି ଯାଞ୍ଚ ଆରମ୍ଭ କରି ଦେଇଛି।
ପୁଲିସ ଇନ୍ସପେକ୍ଟର ଟି.ସି ପଟେଲ କହିଛନ୍ତି ଯେ, ଦ୍ୱାରକା ସହରରେ ଆଦିତ୍ୟ ରୋଡ୍ ସ୍ଥିତ କୋଠାର ପ୍ରଥମ ମହଲାରେ ରବିବାର ସକାଳେ ସମୟ ସାଢେ ୩ଟାରେ ନିଆଁ ଲାଗି ଥିଲା, ଏହି ସମୟରେ ପରିବାରର ୫ଜଣ ସଦସ୍ୟ ଶୋଇ ଥିଲେ। ସେ କହିଛନ୍ତି ଯେ, ନିଆଁ ଲାଗିବା ପରେ ଘରର ବିଦ୍ୟୁତ୍ କଟି ଯିବା କାରଣରୁ ପରିବାରର ଲୋକେ ଅନ୍ଧାର କାରଣରୁ ଡୋର୍କୁ ଆଉ ଖୋଜି ପାଇ ନଥିଲେ। ଯେଉଁଥି ପାଇଁ ସମସ୍ତେ ଘର ଭିତରୁ ଆଉ ବାହାରି ପାରି ନଥିଲେ।
ଦମକଳ କର୍ମିଙ୍କ ଦ୍ୱାରା ଅନେକ ପରିଶ୍ରମ ପରେ ନିଆଁକୁ ଆୟତ୍ତ କରାଯାଇଥିଲା। ଏହି ସମୟରେ ଘରେ ଧୂଆଁ ଭର୍ତ୍ତି ହୋଇ ଯିବାରୁ କୋଠାର ପ୍ରଥମ ମହଲାରେ ଜଣେ ବ୍ୟକ୍ତି , ତାଙ୍କର ପତ୍ନୀ , ତାଙ୍କର ୮ ମାସର ଝିଅ ଓ ତାଙ୍କ ମାଆ ଚେତାଶୂନ୍ୟ ହୋଇ ପଡ଼ି ଥିଲେ। ସେମାନଙ୍କୁ ସରକାରୀ ହସ୍ପିଟାଲ ନିଆଗଲା, ଯେଉଁଠି ଡାକ୍ତରମାନେ ତାଙ୍କୁ ମୃତ ଘୋଷିତ କରି ଥିଲେ।
