ସାନଖେମୁଣ୍ଡି,୨୬।୫ : ସୁନା ରୂପା ଗହଣା ଟଙ୍କା ପଇସା ଗାଡି ଚୋରି ହେବା କଥା ଶୁଣିଥିବେ କିନ୍ତୁ ଆଜି ଯାହା ଚୋରି  ହୋଇ ବନ୍ଧା ହୋଇ ଜେଲ ଯାଇଛନ୍ତି ଅଭିଯୁକ୍ତ ତାହା ଶୁଣିଲେ ଆପଣ ଆଶ୍ଚର୍ଯ୍ୟ ହେବେ । ସେ ଆଉ କିଛି ନୁହେଁ ତାହା ହେଉଛି କୁକୁଡ଼ା ଚୋରି। ତେବେ ଏହି କୁକୁଡ଼ା ଚୋରି କରି ଜଣେ ଯୁବକ ନୁହେଁ ଚାରି ଚାରି ଜଣ ଯୁବକ ବନ୍ଧା ହୋଇ ଜେଲ ଯାଇଛନ୍ତି । ଏହି ଭଳି ଘଟଣା ଦେଖିବାକୁ ମିଳିଛି ପାଟପୁର ଥାନା ରାମଚନ୍ଦ୍ରପୁର ଗ୍ରାମରେ । ଗାଁ ମୁହଁ ରେ ଥିବା ଏକ ଦେଶୀ କୁକୁଡ଼ା ଫାର୍ମ ରେ ଚାରି ଜଣ ପଶି କବାଡ ଭାଙ୍ଗି ୩୦ ଟି କୁକୁଡ଼ା ଚୋରି କରି ନେବା ସହ ପାଣି ମୋଟର ଚୋରି କରିଥିବା ଅଭିଯୋଗ ହୋଇଛି । ଅଭିଯୋଗ ପରେ ପାଟପୁର ଥାନା ପୋଲିସ ଚାରି ଜଣ ଙ୍କୁ ଗିରଫ କରି କୋର୍ଟ ଚାଲାଣ କରିଛି ।

ସୂଚନା ପ୍ରକାରେ ରାମଚନ୍ଦ୍ରପୁର ଗ୍ରାମର ସଞ୍ଜୟ ଜେନା ନାମକ ଜଣେ ଲୋକର ଏକ କୁକୁଡ଼ା ଫାର୍ମ ରେ ଗତ ୧୬ ତାରିଖ ରେ କୁକୁଡ଼ା ଚୋରି ହୋଇଥିଲା । ସେ ଏନେଇ ଗତ କାଲି ପାଟପୁର ଥାନା ଅଭିଯୋଗ ପରେ ପୋଲିସ ତଦନ୍ତ କରି ଚାରି ଜଣଙ୍କୁ ଗିରଫ କରିଛି । ଅଭିଯୁକ୍ତ ମାନେ ଦେଶୀ କୁକୁଡ଼ା ଗୁଡିକୁ ଚୋରି କରି ତାକୁ କାଟି ତାର ମାଂସ କୁ ଫ୍ରିଜ ରେ ରଖି କିଛି କିଛି ବାହାର କରି ରୋଷେଇ କରି ଖାଇ ଆସୁଥିଲେ । ପୋଲିସ ପାଖରେ ଅଭିଯୋଗ ପହଁଚିଲା ବେଳକୁ ଅଭିଯୁକ୍ତ ମାନେ ସମସ୍ତ କୁକୁଡ଼ା ମାଂସ କୁ ରୋଷେଇ କରି ଖାଇ ସାରିଥିଲେ। ତେବେ ରବିବାର ପାଟପୁର ପୋଲିସ ଚାରି ଅଭିଯୁକ୍ତ ଗିରଫ କରି କୋର୍ଟ ଚାଲାଣ କରିଥିବା ବେଳେ ଅଞ୍ଚଳ ରେ କୁକୁଡ଼ା ଚୋରି କୁ ନେଇ ଚର୍ଚ୍ଚ ଜୋର ଧରିଛି ।