ନୂଆଦିଲ୍ଲୀ, ୨୪/୦୩: ଦକ୍ଷିଣପଶ୍ଚିମ ପ୍ରଶାନ୍ତ ମହାସାଗରରେ ଥିବା ପପୁଆ ନ୍ୟୁ ଗିନିରେ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି । ୬.୯ ତୀବ୍ରତାର ଭୂମିକମ୍ପରେ ଥରିଛି ଉତ୍ତର ପପୁଆ ନ୍ୟୁ ଗିନି । ରବିବାର ଭୋର୍ ସମୟରେ ଏହି ଶକ୍ତିଶାଳୀ ଭୂମିକମ୍ପ ହୋଇଥିବା ୟୁନାଇଟେଡ୍ ଷ୍ଟେଟ ଜିଓଲୋଜିକାଲ୍ ସର୍ଭେ ସୂଚନା ଦେଇଛି ।

ଅନୁଭୂତ ହୋଇଥିବା ଭୂମିକମ୍ପର କେନ୍ଦ୍ର ଭୂପୃଷ୍ଠରୁ ୩୫ ଗଭୀର ଏବଂ ଏହା ପୂର୍ବ-ଉତ୍ତର-ପୂର୍ବରେ ୩୨ କିଲୋମିଟର ଦୂର ଅମ୍ବୁନ୍ତି ବୋଲି ଜଣାପଡ଼ିଛି । ତେବେ ଭୂମିକମ୍ପରେ କ୍ଷୟକ୍ଷତି ନେଇ ବର୍ତ୍ତମାନ ପର୍ଯ୍ୟନ୍ତ କୌଣସି ସୂଚନା ନାହିଁ । ତେବେ ପାପୁଆ ନ୍ୟୁ ଗିନିରେ ଭୂମିକମ୍ପ ଆସିବା ଏକ ସାଧାରଣ କଥା । ଏହା ‘ରିଙ୍ଗ ଅଫ୍ ଫାୟାର୍’ ଜୋନରେ ଆସୁଛି ।

ଏଠାରେ ପ୍ରାୟତଃ ଟେକ୍ଟୋନିକ୍ ପ୍ଲେଟର ଗତିବିଧି ଲାଗି ରହିଥାଏ । ଯାହାକି ଦକ୍ଷିଣପୂର୍ବ ଏସିଆରୁ ନେଇ ପ୍ରଶାନ୍ତ ମହାସାଗର ପର୍ଯ୍ୟନ୍ତ ବ୍ୟାପିଛି । ଗତବର୍ଷ ଏପ୍ରିଲ୍ ଏଠାରେ ୭ ତୀବ୍ରତାର ଭୂମିକମ୍ପ ହୋଇଥିବା ବେଳେ ପ୍ରାୟ ୭ ଜଣ ପ୍ରାଣ ହରାଇଥିଲେ ।