ନୂଆଦିଲ୍ଲୀ, ୧୭/୦୯: ସଂସଦର ପୁସ୍ତକାଳୟ ଭବନରେ ସର୍ବଦଳୀୟ ବୈଠକ ଆରମ୍ଭ ହୋଇଯାଇଛି । ଏହି ବୈଠକରେ କେନ୍ଦ୍ରମନ୍ତ୍ରୀ ରାଜନାଥ ସିଂହଙ୍କ ସମେତ ବହୁ ବିରୋଧୀ ଦଳର ନେତା ସାମିଲ ହୋଇଛନ୍ତି । ସଂସଦର ସ୍ବତନ୍ତ୍ର ଅଧିବେଶନ ପୂର୍ବରୁ ଏହି ସର୍ବଦଳୀୟ ବୈଠକକୁ ନେଇ ଚର୍ଚ୍ଚା ଲାଗିରହିଛି । ସଂସଦର ସ୍ପେଶାଲ୍ ସେସନ୍ ସେପ୍ଟେମ୍ବର ୧୮ରୁ ଆରମ୍ଭ ହେବାକୁ ଯାଉଛି ।
ତେବେ ଆଜିର ଏହି ବୈଠକରେ ଜାମ୍ମୁକାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ନ୍ୟାସନାଲ କନଫରେନ୍ସ ନେତା ଫାରୁଖ ଅବଦୁଲ୍ଲା, ଡିଏମକେ ମୁଖ୍ୟ ତିରୁଚି ଏନ ଶିବା ଏବଂ ଭାରତୀୟ କମ୍ୟୁନିଷ୍ଟ ପାର୍ଟି ମୁଖ୍ୟ ଶିବଦାସନ ସରକାରଙ୍କ ଦ୍ବାରା ଡକାଯାଇଥିବା ସର୍ବଦଳୀୟ ବୈଠକରେ ଯୋଗ ଦେଇଛନ୍ତି । ଏହା ପୂର୍ବରୁ ବୁଧବାର ଦିନ କେନ୍ଦ୍ରମନ୍ତ୍ରୀ ପ୍ରହଲ୍ଲାଦ ଯୋଶୀ କହିଥିଲେ, ୧୮-୨୫ରେ ସେପ୍ଟେମ୍ବର ହେବାକୁ ଥିବା ସଂସଦର ସ୍ବତନ୍ତ୍ର ଅଧିବେଶନର ଗୋଟିଏ ଦିନ ପୂର୍ବରୁ ଅର୍ଥାତ ୧୭ ସେପ୍ଟେମ୍ବରରେ ସର୍ବଦଳୀୟ ବୈଠକ ଲାଗି କୁହାଯଇଛି ।
ଏହି ବୈଠକ ପାଇଁ ଇମେଲ୍ ଯୋଗେ ସମସ୍ତ ନେତାଙ୍କୁ ନିମନ୍ତ୍ରଣ କରାଯାଇଛି ବୋଲି ସେ କହିଥିଲେ । ତେବେ ସଂସଦରେ ହେବାକୁ ଥିବା ସ୍ବତନ୍ତ୍ର ଅଧିବେଶନରେ ସଂସଦର ୭୫ ବର୍ଷର ଯାତ୍ରା ସଂପର୍କରେ ଆଲୋଚନା ହେବ । ଗଣେଶ ଚତୁର୍ଥୀରେ ନୂଆ ସଂସଦ ଭବନରେ ଗୃହପ୍ରବେଶ ହେବ ବୋଲି ସର୍ବଦଳୀୟ ବୈଠକରେ କୁହାଯାଇଛି । ଏନେଇ ଏପସିପି ନେତା ପ୍ରଫୁଲ ପଟେଲ କହିଛନ୍ତି । ସେପଟେ ବୈଠକରେ ସମସ୍ତ ବିରୋଧୀ ଦଳ ମହିଳା ସଂରକ୍ଷଣ ବିଲ ପାରିତ କରିବାକୁ ଦାବି କରିଥିବା ନେଇ କହିଛନ୍ତି କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ ।
