ନୂଆଦିଲ୍ଲୀ ୨୮/୦୨: ଆସନ୍ତା ଜୁଲାଇ ୧୨ ତାରିଖରେ ଭାରତର ସବୁଠୁ ଧନୀ ବ୍ୟକ୍ତି ମୁକେଶ ଅମ୍ବାନି ଓ ତାଙ୍କ ପତ୍ନୀ ନିତା ଅମ୍ବାନିଙ୍କ ସାନ ପୁଅ ଅନନ୍ତ ଅମ୍ବାନି ବିବାହ କରିବେ । ନିଜ ପିଲାଦିନର ବନ୍ଧୁ ରାଧିକା ମର୍ଚାଣ୍ଟଙ୍କୁ ସେ ଜୀବନସାଥୀ ରୂପେ ବାଛିଛନ୍ତି । ଉଭୟଙ୍କ ବିବାହ ପୂର୍ବରୁ ଗୁଜରାଟର ଜାମନଗରଠାରେ ଏକ ୩ ଦିନିଆ ଭବ୍ୟ ପ୍ରି-ୱେଡିଂସେଲିବ୍ରେସନ୍ର ଆୟୋଜନ କରାଯାଇଛି । ଆସନ୍ତା ମାର୍ଚ୍ଚ ୧ରୁ ୩ ତାରିଖ ପର୍ଯ୍ୟନ୍ତ ଏହି ଉତ୍ସବ ଚାଲିବ । ଏ ଅବସରରେ ବିଲ୍ ଗେଟ୍ସ, ମେଲିଣ୍ଡା ଗେଟ୍ସ, ମାର୍କ ଜକରବର୍ଗ, ଇଭାଙ୍କା ଟ୍ରମ୍ପ୍, ଭୂଟାନ ରାଜାରାଣୀଙ୍କ ସମେତ ସମଗ୍ର ବିଶ୍ୱରୁ ଉଦ୍ୟୋଗ ଓ ଟେକ୍ ଦୁନିଆର ଅନେକ ନାମୀ ବ୍ୟକ୍ତିତ୍ୱ ଯୋଗ ଦେବେ । ଭବ୍ୟ ପ୍ରାକ୍-ବିବାହ ଉତ୍ସବରେ ଅତିଥିଙ୍କ ପାଇଁ ବିଳାସପୂର୍ଣ୍ଣ ପ୍ରୀତିଭୋଜନର ସ୍ୱତନ୍ତ୍ର ପ୍ରବନ୍ଧନ ହୋଇଛି ।
ରିପୋର୍ଟ ଅନୁସାରେ, ଏହି ବର୍ଣ୍ଣାଢ୍ୟ ଉତ୍ସବ ଲାଗି ଇନ୍ଦୋରରୁ ୨୫ ଜଣିଆ ଦକ୍ଷ ସେଫ୍ଙ୍କର ଏକ ଟିମ୍ ଜାମନଗରରେ ପହଞ୍ଚିବେ । ଜାର୍ଡିନ୍ ହୋଟେଲର ନିର୍ଦ୍ଦେଶକ କହିଛନ୍ତି, ଏ ଅବସରରେ ପାକ କଳାର ମୁଖ୍ୟ ଆକର୍ଷଣ ହେବ ଇନ୍ଦୋରୀ ବ୍ୟଞ୍ଜନ । ଏଥିସହିତ ପାର୍ସୀ, ଥାଇ, ମେକ୍ସିକାନ୍ ଓ ଜାପାନିଜ୍ ବ୍ୟଞ୍ଜନ ସମେତ ସମଗ୍ର ଏସିଆର ବିଭିନ୍ନ ପ୍ରକାର ସୁସ୍ୱାଦୁ ବ୍ୟଞ୍ଜନ ଜରିଆରେ ଅତିଥିଙ୍କୁ ଆପ୍ୟାୟିତ କରିବ ଅମ୍ବାନି ପରିବାର ।
୩ ଦିନିଆ ପ୍ରି-ୱେଡିଂ ସେଲିବ୍ରେସନ୍ରେ ୨୫ଶହ ପ୍ରକାର ସ୍ୱାଦିଷ୍ଟ ବ୍ୟଞ୍ଜନ ପ୍ରସ୍ତୁତ ହେବ । ୩ ଦିନ ମଧ୍ୟରେ କୌଣସି ପ୍ରକାର ବ୍ୟଞ୍ଜନର ପୁନରାବୃତ୍ତି ଯେମିତି ନ ହୁଏ, ସେଥିପ୍ରତି ପ୍ରବନ୍ଧନ ଟିମ୍ ଖାସ୍ ଧ୍ୟାନ ଦେବେ । ସକାଳ ଜଳଖିଆରେ ୭୦ରୁ ଅଧିକ ପ୍ରକାର ବ୍ୟଞ୍ଜନ ରହିବ । ତା’ପରେ ଉଭୟ ମଧ୍ୟାହ୍ନ ଭୋଜନ ଓ ରାତ୍ରି ଭୋଜନ ପାଇଁ ୨୫୦ ପ୍ରକାର ଲେଖାଏଁ ବ୍ୟଞ୍ଜନ ରହିବ । ଶୁଦ୍ଧ ଶାକାହାରୀ ଅତିଥିଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ମଧ୍ୟରାତ୍ରିରେ ଜଳଖିଆର ବ୍ୟବସ୍ଥା ମଧ୍ୟ ରହିବ । ରାତି ୧୨ଟାରୁ ଭୋର ୪ଟା ପର୍ଯ୍ୟନ୍ତ ଅତିଥିଙ୍କ ପାଇଁ ପ୍ରାୟ ୮୫ ପ୍ରକାର ଜଳଖିଆର ବ୍ୟବସ୍ଥା କରାଯିବ । ଉତ୍ସବରେ ୧୦୦୦ରୁ ଅଧିକ ଅତିଥି ଯୋଗ ଦେବାର ଅନୁମାନ କରାଯାଉଛି । ଏହି ୩ ଦିନିଆ ଭବ୍ୟ ଉତ୍ସବରେ ବିଭିନ୍ନ ପ୍ରକାର ଥିମ୍ବିଶିଷ୍ଟ କାର୍ଯ୍ୟକ୍ରମରେ ଅତିଥି ଯୋଗ ଦେବେ । ପ୍ରତ୍ୟେକ କାର୍ଯ୍ୟକ୍ରମରେ ଅତିଥିଙ୍କ ପାଇଁ ନିଆରା ଡ୍ରେସ୍ କୋଡ୍ ରହିବ । କାର୍ଯ୍ୟକ୍ରମ ବିଷୟରେ ଅତିଥିଙ୍କୁ ବୁଝାଇବା ପାଇଁ ଜଣେ ଲେଖାଏଁ ମାର୍ଗଦର୍ଶକ ରହିବେ ।
