ପୁରୀ, ୦୩/୦୨: ମହାପ୍ରଭୁଙ୍କ ନିକଟରେ ଲାଗିଲା ଅର୍ପଣ ରଥ ଚାଉଳରୁ ପ୍ରସ୍ତୁତ କାନେକା, ଖେଚୁଡ଼ି ଓ ସାଦା ଅନ୍ନ । ଯାହାକୁ ଶ୍ରୀମନ୍ଦିର ଭିତରେ ବ୍ରାହ୍ମଣମାନଙ୍କୁ ମାଗଣାରେ ବିତରଣ କରାଯାଇଛି । ସୁଆର ମହାସୁଆର ନିଯୋଗ ଗତ ୪ ଦିନ ତଳେ ଗୁଣ୍ଡିଚା ମନ୍ଦିରରେ ମହଜୁଦ୍ ଅର୍ପଣ ରଥ ଚାଉଳରୁ ୪ କେଜି ଚାଉଳ ଆଣି ଏହାକୁ ଶ୍ରୀମନ୍ଦିର ରୋଷଶାଳାରେ ରାନ୍ଧି ମହାପ୍ରଭୁଙ୍କ ନିକଟରେ ସମର୍ପଣ କରିଛନ୍ତି ।
ଆଜିଠୁ ପ୍ରତିଦିନ ପ୍ରାୟ ୨୦ ବସ୍ତା ଚାଉଳକୁ ଶ୍ରୀମନ୍ଦିର ରୋଷଶାଳାରେ ଖେଚୁଡ଼ି ଓ କନେକା ଭାବେ ରାନ୍ଧି ୩ ଦ୍ୱାର ନିକଟରେ ଭକ୍ତଙ୍କୁ ମାଗଣା ବଣ୍ଟନ କରାଯିବ । ଏନେଇ ଶୁକ୍ରବାର ଅର୍ପଣ ରଥ ଚାଉଳ ବ୍ୟବହାର ନେଇ ବସିଥିବା ନୀତି ସବ୍ କମିଟି ବୈଠକରେ ସୂଚନା ଦେଇଛନ୍ତି ସୁଆର ମହସୁଆର ନିଯୋଗର ସମ୍ପାଦକ ନାରାୟଣ ମହାସୁଆର । ଶ୍ରୀମନ୍ଦିର ଅତିରିକ୍ତ ମୁଖ୍ୟ ପ୍ରଶାସକ ସମର୍ଥ ବର୍ମାଙ୍କ ଅଧ୍ୟକ୍ଷତାରେ ହୋଇଥିବା ବୈଠକରେ ଶ୍ରୀମନ୍ଦିର ପରିଚାଳନା କମିଟିର ସେବାୟତ ସଦସ୍ୟ, ସୁଆର ମହାସୁଆର ନିଯୋଗର ସମ୍ପାଦକ, ସଭାପତି ଓ ପ୍ରଶାସନିକ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ । ତେବେ ଶ୍ରୀ ବର୍ମା ଗଣମାଧ୍ୟମକୁ ଏବାବଦରେ କୌଣସି ସୂଚନା ଦେଇନାହାନ୍ତି ।
ସୂଚନା ମୁତାବକ ଏହି ଚାଉଳକୁ ପରୀକ୍ଷା କରି ରୋଷଶାଳାରେ ରାନ୍ଧିବା ନିମନ୍ତେ ଏକ କମିଟି କରିବାକୁ ବୈଠକରେ ନିଷ୍ପତ୍ତି ହୋଇଛି । ଏହି କମିଟିରେ ଶ୍ରୀମନ୍ଦିର ପରିଚାଳନା କମିଟିର ସେବାୟତ ସଦସ୍ୟଙ୍କ ସମେତ ସୁଆରମହାସୁଆର ନିଯୋଗର ୫ଜଣ ରହିବେ। ସେମାନେ ପ୍ରତିଦିନ ଶ୍ରୀଗୁଣ୍ଡିଚା ମନ୍ଦିରରେ ଗଛିତ ହେଉଥିବା ଅର୍ପଣ ଚାଉଳକୁ ଆଣି ପରୀକ୍ଷା କରିବେ । ଏହାକୁ କମିଟି ଓ ଅମୁଣିଆ ପରିଛା ସେବକ ଠିକ୍ ବୋଲି କହିଲେ ମହାପ୍ରଭୁଙ୍କ ନିମନ୍ତେ ରୋଷଶାଳାରେ ରନ୍ଧା ଯାଇ ଭୋଗ ଲଗାଯିବ ।
ତେବେ ଶ୍ରୀଗୁଣ୍ଡିଚା ମନ୍ଦିରରେ ପହଞ୍ଚି ସାରିଥିବା ପ୍ରାୟ ୫ ହଜାର ପ୍ୟାକେଟ ଚାଉଳର ବିଭିନ୍ନ ପ୍ୟାକେଟରୁ ଚାଉଳ ବାହାର କରି ସୁଆରମହାସୁଆର ନିଯୋଗ ପରୀକ୍ଷା କରିଥିଲା । ଏହା ଠିକ୍ ଥିବାରୁ ମହାପ୍ରଭୁଙ୍କ ନିମନ୍ତେ ଖେଚୁଡ଼ି ରାନ୍ଧି ଭୋଗ କରିଥିଲା । ତେଣୁ ରବିବାରଠାରୁ ଖେଚୁଡ଼ି ପ୍ରସ୍ତୁତ କରି ମହାପ୍ରଭୁଙ୍କ ନିକଟରେ ଲାଗି ପରେ ଶ୍ରୀମନ୍ଦିର ତିନି ଦ୍ୱାରରେ ଶ୍ରଦ୍ଧାଳୁଙ୍କୁ ବାଣ୍ଟିବା ନିମନ୍ତେ ଶ୍ରୀମନ୍ଦିର ପ୍ରଶାସନ ପକ୍ଷରୁ ସୁଆରମହାସୁଆର ନିଯୋଗକୁ ଦାୟିତ୍ୱ ଦିଆଯାଇଛି ।
ସୁଆର ମହାସୁଆର ନିଯୋଗ ସମ୍ପାଦକ ନାରାୟଣ ମହାସୁଆର କହିଛନ୍ତି, ଗଠିତ ହୋଇଥିବା ଚାଉଳ ଯାଞ୍ଚ କମିଟିର ବୈଠକ ଆସନ୍ତାକାଲି ବସି ଚୂଡ଼ାନ୍ତ ନିଷ୍ପତ୍ତି ହେବ । ନାଟମଣ୍ଡପ ମରାମତି କରିବା ନିମନ୍ତେ ମଙ୍ଗଳବାରଠାରୁ ଶ୍ରୀମନ୍ଦିରରେ ସମସ୍ତ ନୀତି ସଅଳ ଆରମ୍ଭ କରି ସଅଳ ଶେଷ କରିବାକୁ ନିଷ୍ପତ୍ତି ହୋଇଛି । ତେଣୁ ଦ୍ୱିତୀୟ ଭୋଗମଣ୍ଡପ ପରେ ଶେଷ ଭୋଗ ଭାବେ ଅର୍ପଣ ଚାଉଳକୁ ବ୍ୟବହାର କରି ଖେଚୁଡ଼ି ଓ କାନେକା ରନ୍ଧାଯାଇ ଠାକୁରଙ୍କୁ ସମର୍ପଣ କରାଯିବ ବୋଲି ପ୍ରଶାସନକୁ ପ୍ରସ୍ତାବ ଦିଆଯାଇଛି । ରାତିରେ ପ୍ରସ୍ତୁତ ଏହି ଖେଚୁଡ଼ି ଶ୍ରୀମନ୍ଦିର ୩ ଦ୍ୱାରରେ ଶ୍ରଦ୍ଧାଳୁଙ୍କୁ ବଣ୍ଟାଯିବ । ବଳିଲେ ପରଦିନ ପୁଣି ସକାଳୁ ଶ୍ରୀମନ୍ଦିର ତିନି ଦ୍ୱାରରେ ବଣ୍ଟାଯିବ ।
ଭୋଗ ମଣ୍ଡପ ପୂର୍ବରୁ ପ୍ରସ୍ତୁତ ଏହି ଭୋଗ ପ୍ରସ୍ତୁତ କଲେ ଏହା ଆନନ୍ଦ ବଜାରରେ ମହାପ୍ରସାଦ ଚାହିଦା ଉପରେ କୁପ୍ରଭାବ ପକାଇବ । ତେଣୁ ଶେଷରେ ଏହି ଖେଚୁଡ଼ି ଓ କନେକା ଭୋଗ କରିବାକୁ ପ୍ରଶାସନକୁ କୁହାଯାଇଛି । ଶ୍ରୀଗୁଣ୍ଡିଚା ମନ୍ଦିରରେ ବସ୍ତା ମରାଯାଇଥିବା ପ୍ରାୟ ୫ ହଜାର ପ୍ୟାକେଟ ଚାଉଳ ଭିତରୁ କିଛିକିଛି ବାହାର କରି ପରୀକ୍ଷା କରାଯାଇଥିଲା । ଯାହା ମହାପ୍ରଭୁଙ୍କ ନିକଟରେ ଭୋଗ ଲଗାଇବାକୁ ଯୋଗ୍ୟ ହେବା ପରେ ୪ ଦିନ ତଳେ ଖେଚୁଡ଼ି କରି ସମର୍ପଣ ହୋଇଥିଲା । ତେଣୁ ଆଗକୁ ଚାଉଳ ପରୀକ୍ଷା କରି ମହାପ୍ରସାଦ ରାନ୍ଧିବା ନିମନ୍ତେ ଏକ କମିଟି କରାଯାଇଛି । ଯେଉଁଥିରେ ସୁଆର ମହାସୁଆର ନିଯୋଗର ସଭାପତି, ସମ୍ପାଦକଙ୍କ ସମେତ ଅନ୍ୟ ୩ ଜଣ ଓ ପରିଚାଳନା କମିଟିର ସେବାୟତ ସଦସ୍ୟ ରହିବେ । କମିଟି ବୈଠକ ପରେ ଚୂଡ଼ାନ୍ତ ନିଷ୍ପତ୍ତି ହେବ । ପ୍ରଶାସନ ଆସନ୍ତାକାଲି ଭୋଗ କରି ବାଣ୍ଟିବାକୁ କହିଥିଲା, ମାତ୍ର ସୁଆରମହାସୁଆର ନିଯୋଗ ଏଥିପାଇଁ ଗୋଟିଏ ଦିନ ସମୟ ମାଗିଥିଲା । ନିଯୋଗ ସ୍ୱଳ୍ପ ପାରିଶ୍ରମିକ ନେଇ ଏହି ଭୋଗ ରାନ୍ଧି ବାଣ୍ଟିବ ।
ତେବେ ଅର୍ପଣ ରଥକୁ ମିଳିଥିବା ପ୍ରାୟ ୧୨ ହଜାର କ୍ୱିଣ୍ଟାଲ ଚାଉଳକୁ ରାନ୍ଧି ବାଣ୍ଟିବାକୁ ପ୍ରାୟ ୫ ବର୍ଷ ଲାଗିଯିବ ଓ ଏଥିପାଇଁ ମିଳିଥିବା ଚାଉଳକୁ ସୁରକ୍ଷିତ ରଖିବା ସମ୍ଭବ ନୁହେଁ ବୋଲି କହି ଅନ୍ୟ ସେବାୟତ ସଦସ୍ୟମାନେ କହିଛନ୍ତି । ଚାଉଳକୁ ଶୀଘ୍ର ଭୋଗ ନିମନ୍ତେ ବ୍ୟବହାର କରି ବିଭିନ୍ନ ଜିଲ୍ଲାରୁ ପୁରୀ ଆସୁଥିବା ବସ୍ ଯୋଗେ ଭକ୍ତଙ୍କ ନିକଟକୁ ପଠାଇ ଦେବାକୁ ମଧ୍ୟ ସେବାୟତ ସଦସ୍ୟମାନେ ପ୍ରଶାସନକୁ ପ୍ରସ୍ତାବ ଦେଇଛନ୍ତି । ଏଥିସହ ମିଳିଥିବା ପ୍ରଚୁର ପରିମାଣର ନଡ଼ିଆ ଓ ଗୁଆକୁ କିପରି ଖରାପ ହେବା ପୂର୍ବରୁ ବ୍ୟବହାର କରାଯିବ ସେନେଇ ପଦକ୍ଷେପ ନେବାକୁ ମଧ୍ୟ ଶ୍ରୀମନ୍ଦିର ଅତିରିକ୍ତ ମୁଖ୍ୟ ପ୍ରଶାସକଙ୍କୁ ସେବାୟତ ସଦସ୍ୟମାନେ ନିବେଦନ କରିଛନ୍ତି । ପ୍ରତିଦିନ ପ୍ରାୟ ୩୦ ହାଣ୍ଡି କାନେକା ଖେଚୁଡ଼ି କିମ୍ବା କାନେକା ରନ୍ଧି ବାଣ୍ଟିବାକୁ ଯୋଜନା ଥିବାରୁ ଏଥିନିମନ୍ତେ ଆବଶ୍ୟକ ହାଣ୍ଡି ଓ ଜାଳେଣୀ କାଠ ଯୋଗାଇ ଦେବାକୁ ଶ୍ରୀମନ୍ଦିର ପ୍ରଶାସନକୁ ନିବେଦନ କରାଯାଇଥିଲା । ଆବଶ୍ୟକ ପରିମାଣର କାଠ ଓ ହାଣ୍ଡି ଯୋଗାଇ ଦେବାକୁ ପ୍ରଶାସନ ସମ୍ମତି ପ୍ରକାଶ କରିଥିବା ସେବାୟତ ସଦସ୍ୟମାନେ ସୂଚନା ଦେଇଛନ୍ତି।
