ମୁମ୍ବାଇ, ୧୦/୦୨: ଇଂଲଣ୍ଡ ବିପକ୍ଷ ଅବଶିଷ୍ଟ ୩ଟି ମ୍ୟାଚ୍ ଲାଗି ବିସିସିଆଇ ଭାରତୀୟ ଦଳ ଘୋଷଣା କରିଛି । ନୂଆ ଦଳରେ ଜଣେ ନୂଆ ଚେହେରାକୁ ସ୍ଥାନ ମିଳିଛି । ଦଳକୁ କେଏଲ୍ ରାହୁଲଙ୍କ ସହ ଫେରିଛନ୍ତି ରବୀନ୍ଦ୍ର ଜାଡ଼େଜା । ଅନ୍ତିମ ୩ଟି ଟେଷ୍ଟ ମ୍ୟାଚରେ ବିରାଟ କୋହଲି ଦଳରେ ନାହାନ୍ତି ।
ଅବଶିଷ୍ଟ ୩ ଟେଷ୍ଟ ମ୍ୟାଚ୍ ଲାଗି ବିସିସିଆଇ ୧୭ ଜଣିଆ ଦଳ ଘୋଷଣା କରିଛି । ପେସ୍ ବୋଲର୍ ବିଭାଗରେ ଦଳର ଉପଅଧିନାୟକ ଯଶପ୍ରୀତ ବୁମରା, ମହମ୍ମଦ ସିରାଜ ଓ ମୁକେଶ କୁମାରଙ୍କ ସହ ଯୁବ ଖେଳାଳି ଆକାଶ ଦୀପ ସ୍ଥାନ ପାଇଛନ୍ତି । ସେହିଭଳି ସ୍ପିନ୍ ବିଭାଗରେ ରବିଚନ୍ଦ୍ରନ ଅଶ୍ୱୀନ, ରବୀନ୍ଦ୍ର ଜାଡ଼େଜା, ଅକ୍ଷର ପଟେଲ ଓ କୁଲଦୀପ ଯାଦବଙ୍କ ସହ ୱାଂଶିଟନ ସୁନ୍ଦରଙ୍କୁ ସ୍ଥାନ ମିଳିଛି ।
ଷ୍ଟାର ବ୍ୟାଟ୍ସମ୍ୟାନ୍ ଓ ପୂର୍ବତନ ଅଧିନାୟକ ବିରାଟ କୋହଲି ଇଂଲଣ୍ଡ ବିପକ୍ଷ ବାକି ୩ଟି ଟେଷ୍ଟ ମ୍ୟାଚ୍ ଖେଳିବେ ନାହିଁ । ସେ ବ୍ୟକ୍ତିଗତ କାରଣରୁ ଇଂଲଣ୍ଡ ବିପକ୍ଷ ପ୍ରଥମ ୨ଟି ଟେଷ୍ଟ ମ୍ୟାଚରେ ସାମିଲ୍ ହୋଇ ନଥିଲେ । ସେହିଭଳି ଆହତ କାରଣରୁ ଶ୍ରେୟସ ଆୟରଙ୍କୁ ମଧ୍ୟ ଦଳରେ ସାମିଲ୍ କରାଯାଇ ନାହିଁ । ସେ ସିରିଜରୁ ବାଦ୍ ପଡ଼ିଛନ୍ତି ।
ତେବେ ରବୀନ୍ଦ୍ର ଜାଡ଼େଜା ଓ କେଏଲ୍ ରାହୁଲ୍ ଖେଳିବା ବିସିସିଆଇ ମେଡିକାଲ୍ ଟିମର ଫିଟନେସ୍ ମଞ୍ଜୁରୀ ଉପରେ ନିର୍ଭର କରେ । ଅର୍ଥାତ୍ ବିସିସିଆଇ ମେଡିକାଲ୍ ଟିମ୍ ଫିଟ୍ ଘୋଷଣା କଲେ ଜାଡ଼େଜା ଓ ରାହୁଲଙ୍କୁ ଚୂଡ଼ାନ୍ତ ଏକାଦେଶରେ ସାମିଲ୍ ହୋଇ ପାରିବେ ।
ଭାରତ-ଇଂଲଣ୍ଡ ମଧ୍ୟରେ ତୃତୀୟ ଟେଷ୍ଟ ଫେବ୍ରୁଆରୀ ୧୫ରୁ ରାଜକୋଟରେ ଖେଳା ଯିବ । ଫେବ୍ରୁଆରୀ ୨୩ରେ ରାଞ୍ଚିରେ ଚତୁର୍ଥ ଟେଷ୍ଟ, ସିରିଜର ଅନ୍ତିମ ଟେଷ୍ଟ ମାର୍ଚ୍ଚ ୭ରେ ଧର୍ମଶାଳାରେ ଖେଳାଯିବ ।
ଭାରତୀୟ ଦଳ
ରୋହିତ ଶର୍ମା (ଅଧିନାୟକ), ଯଶପ୍ରୀତ ବୁମରା (ଉପଅଧିନାୟକ), ଯଶ୍ୱସୀ ଜୟସୱାଲ୍, ଶୁଭମନ ଗିଲ୍, କେଏଲ୍ ରାହୁଲ୍, ରଜତ ପାଟିଦାର, ସରଫରାଜ ଖାନ, ଧ୍ରୁବ ଜୁରେଲ୍ (ୱିକେଟ୍ ରକ୍ଷକ), କେଏସ୍ ଭରତ (ୱିକେଟ୍ ରକ୍ଷକ), ରବିଚନ୍ଦ୍ରନ ଅଶ୍ୱିନ, ରବୀନ୍ଦ୍ର ଜାଡ଼େଜା, ଅକ୍ଷର ପଟେଲ, ୱାଶିଂଟନ ସୁନ୍ଦର, କୁଲଦୀପ ଯାଦବ, ମହମ୍ମଦ ସିରାଜ, ମୁକେଶ କୁମାର ଓ ଆକାଶ ଦୀପ ।