ନୂଆଦିଲ୍ଲୀ: ଲୋକସଭା ନିର୍ବାଚନ ପୂର୍ବରୁ ଚଣ୍ଡୀଗଡ଼ର ମେୟର ନିର୍ବାଚନକୁ ଲିଟମସ୍ ଟେଷ୍ଟ ବୋଲି କହୁଥିବା ଆମ ଆଦମୀ ପାର୍ଟି (ଆପ୍) ଏବଂ କଂଗ୍ରେସକୁ ଝଟକା ଲାଗିଛି । ଚଣ୍ଡୀଗଡ଼ ମେୟର ପଦ ଲାଗି ଆପ୍ର ପ୍ରାର୍ଥୀଙ୍କୁ ପରାଜୟର ସାମ୍ନା କରିବାକୁ ପଡ଼ିଛି । ଚଣ୍ଡୀଗଡ଼ ନିଗର ନିଗମରେ ବିଜେପି ପ୍ରାର୍ଥୀ ମନୋଜ ସୋନକର ୧୬ଟି ଭୋଟ ପାଇବା ସହ ବିଜୟ ହାସଲ କରିଛନ୍ତି । ୩୫ ଜଣ କର୍ପୋରେଟର ଏବଂ ଜଣେ ସାଂସଦ ଭୋଟ ଦେଇଥିବା ବେଳେ ଆପ୍ ପ୍ରାର୍ଥୀଙ୍କ ଖାତାକୁ ୨୦ଟି ଭୋଟ ଯାଇଥିଲା । ହେଲେ ୮ଟି ଭୋଟ ନାକୋଚ ହୋଇଥିଲା । ଫଳରେ କୁଳଦୀପ କୁମାରଙ୍କୁ ପରାଜୟ ବରଣ କରିବାକୁ ପଡ଼ିଛି । କୁଳଦୀପଙ୍କୁ କଂଗ୍ରେସର ମଧ୍ୟ ସମର୍ଥନ ଥିଲା । ଯଦି ଏହି ୮ଟି ଭୋଟ ବୈଧ ହୋଇଥାନ୍ତା ତେବେ ନିର୍ବାଚନୀ ପରିଣାମ କିଛି ଅଲଗା ହୋଇଥାନ୍ତା ।
ଶେଷରେ ଅଧିକ ଭୋଟ ପାଇଥିଲେ ହେଁ ବିଜେପିର ସୋନକରଙ୍କ ଠାରୁ କୁଳଦୀପ ପରାସ୍ତ ହୋଇଛନ୍ତି । ଚଣ୍ଡୀଗଡ଼ ନଗର ନିଗମରେ ବିଜେପିର ୧୪ ଜଣ କର୍ପୋରେଟର ଅଛନ୍ତି । ଏହା ପରେ ୧୩ ଜଣ କର୍ପୋରେଟରଙ୍କ ସହ ଆପ୍ ଦ୍ବିତୀୟ ବଡ଼ ଦଳ । ସେପଟେ କଂଗ୍ରେସ ପାଖରେ ୭ ଜଣ କର୍ପୋରେଟର ଥିବା ବେଳେ ଶିରୋମଣୀ ଅକାଳି ଦଳ ପାଖରେ ଜଣେ କର୍ପୋରେଟର ଅଛନ୍ତି ।
ଚଣ୍ଡୀଗଡ଼ ମେୟର ନିର୍ବାଚନ ଲାଗି ସ୍ଥାନୀୟ ସାଂସଦଙ୍କୁ ମଧ୍ୟ ମତଦାନ କରିବାର ଅଧିକାର ରହିଛି । ବିଜେପିର କିରଣ ଖେର ଏଠାରେ ସାଂସଦ ଅଛନ୍ତି । ଅନ୍ୟପଟେ ପରାଜୟ ପରେ ବିଜେପି ଉପରେ ଅଭିଯୋଗ ଆଣିଛନ୍ତି ଆପ୍ ମୁଖ୍ୟ ଅରବିନ୍ଦ କେଜ୍ରିଓ୍ବାଲ । ମେୟର ନିର୍ବାଚନରେ ବେଇମାନୀର ଗନ୍ଧ ବାରିଛନ୍ତି କେଜ୍ରିଓ୍ବାଲ । ଯଦି ମେୟର ନିର୍ବାଚନରେ ଏଭଳି ହେଉଛି ତେବେ ଦେଶର ନିର୍ବାଚନ ସମୟରେ କେତେ ଦୁର୍ନୀତି ନହେବ ବୋଲି ସେ ପ୍ରଶ୍ନ କରିଛନ୍ତି । ସେପଟେ ବିଜେପି ପ୍ରାର୍ଥୀଙ୍କ ବିଜୟ ପରେ ଦଳର ରାଷ୍ଟ୍ରୀୟ ସଭାପତି ଜେପି ନଡ୍ଡା ଟ୍ବିଟ୍ କରିଛନ୍ତି । ଏହାକୁ ଇଣ୍ଡିଆ ମେଣ୍ଟ ବିରୋଧରେ ପ୍ରଥମ ବିଜୟ ବୋଲି କହିଛନ୍ତି । ଇଣ୍ଡିଆ ମେଣ୍ଟ ପ୍ରଥମ ଥର ବିଜେପି ବିରୋଧରେ ନିର୍ବାଚନ ଲଢ଼ିଥିଲା ଏବଂ ପରାସ୍ତ ହୋଇଛି ବୋଲି ଟ୍ବିଟରେ ଲେଖିଛନ୍ତି ଜେପି ନଡ୍ଡା ।