ପୁରୀ, ୦୭/୦୨ : ପୁରୀରେ ଅବାଧରେ ଚାଲିଛି ନିଶା କାରବାର। ତାଳବଣିଆ ଅଞ୍ଚଳରୁ ୫୦ ଲକ୍ଷ ଟଙ୍କାର ବ୍ରାଉନସୁଗର ଜବତ। ଏହା ସହ ୨ ଅଭିଯୁକ୍ତଙ୍କୁ ଗିରଫ କରିଛି ସମୁଦ୍ର କୂଳ ପୋଲିସ। ଗିରଫ ହୋଇଥିବା ୨ ଅଭିଯୁକ୍ତ ହେଲେ ଦେବାଶିଷ ଦାସ ଏବଂ ଶୁଭମ୍ ପଟ୍ଟନାୟକ। ଏନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଲେ ଏସପି ପିନାକ ମିଶ୍ର। 

ସୂଚନାଯୋଗ୍ୟ, ପୁରୀରେ ବେଆଇନ କାରବାର ଏବଂ ବ୍ରାଉନସୁଗରର ବ୍ୟବହାରକୁ ରୋକିବା ପାଇଁ ପୋଲିସ ପକ୍ଷରୁ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା। ୭ତାରିଖ ସକାଳେ ଦୁଇଜଣ ବ୍ୟକ୍ତି ବ୍ରାଉନସୁଗର ନେଇ ଏକ ମୋଟର ସାଇକେଲରେ ପୁରୀ ଆସୁଥିବା ସୂଚନା ମିଳିଥିଲା। ଏହାକୁ ତାଳବଣିଆ ହେଲିପ୍ୟାଡରେ ପହଞ୍ଚାଇବାକୁ ଯୋଜନା ହୋଇଥିଲା। ଏହି ସମୟରେ ପୂର୍ବରୁ ପ୍ରସ୍ତୁତ ହୋଇଥିବା ଟିମ୍ ଦୁଇ ଅପରାଧୀଙ୍କୁ ଗିରଫ କରିଥିଲା। ସେମାନଙ୍କ ନିକଟରୁ ୫୦ ଲକ୍ଷ ଟଙ୍କାର ବ୍ରାଉନସୁଗର ଜବତ ହୋଇଛି। ତେବେ ଅନ୍ଧାରର ସୁଯୋଗ ନେଇ ଗ୍ରାହକ ଘଟଣାସ୍ଥଳରୁ ଫେରାର୍ ହୋଇଯାଇଛି। ପୋଲିସ ଏନେଇ ଅଧିକ ତଦନ୍ତ ଚଳାଇଛି। ଅଭିଯୁକ୍ତଙ୍କ ୨ଟି ବାଇକ୍ ସହ ୨ଟି ମୋବାଇଲ ଜବତ କରାଯାଇଛି।