ଭୁବନେଶ୍ୱର,୨୪/୦୨: ଭୁବନେଶ୍ୱରରେ ରହି ଅନ୍ଲାଇନ୍ରେ ଲୋକଙ୍କୁ ଠକୁଥିବା ଜଣେ ସାଇବର ଠକ ଧରାପଡିଛି । ଲକ୍ଷ୍ମୀସାଗର ଥାନା ପୁଲିସ୍ ସହଯୋଗରେ ରାମା ଭ୍ରମା ଆପାର୍ଟମେଣ୍ଟରୁ ଠକକୁ ଉଠାଇ ନେଇଛି ଦିଲ୍ଳୀ ସାଇବର ପୁଲିସ । ଠକ ଜଣଙ୍କ ହେଲେ ସୌରଭ ଦେହୁରୀ । ସେ ୫ କୋଟିରୁ ଅଧିକ ଟଙ୍କା ଠକେଇ କରିଥିବା ଜଣାପଡିଛି ।
ସୌରଭ କିଛି ଦିନ ହେବ ରାମା ଭ୍ରମା ଆପାର୍ଟମେଣ୍ଟର ଫ୍ଲାଟ୍ ନମ୍ବର ୨୦୩ରେ ଭଡ଼ା ନେଇ ରହୁଥିଲେ । ତାଙ୍କ ସହ ଅନ୍ୟ ୩ ଜଣ ଯୁବକ ଥିଲେ । ରାଜ୍ୟ ବାହାରର କିଛି ଯୁବତୀଙ୍କ ସହ ଏମାନଙ୍କ ଲିଙ୍କ୍ ଥିଲା । ଏହି ଯୁବତୀମାନେ ସୋସିଆଲ୍ ମିଡିଆରେ ଲୋକଙ୍କ ସହ ନିବିଡ଼ତା ବଢ଼ାଇ ଅଶ୍ଳୀଳ ଭିଡିଓ ଚାଟ୍ କରୁଥିଲେ । ସେ ସବୁ ଚାଟ୍ର ସ୍କ୍ରିନ୍ ସଟ୍ ଓ ସ୍କ୍ରିନ୍ ରେକର୍ଡିଂ ଆସୁଥିଲା ରାମା ଭ୍ରମା ଆପାର୍ଟମେଣ୍ଟକୁ । ମାଷ୍ଟରମାଇଣ୍ଡ ସୌରଭ ଓ ତାର ସହଯୋଗୀ ଏଠାରେ ରହି ସେମାନଙ୍କୁ ବ୍ଲାକ୍ମେଲିଂ କରୁଥିଲେ । ଦାବି ମୁତାବକ ଟଙ୍କା ନ ଦେଲେ ଭିଡିଓ ଭାଇରାଲ୍ ପାଇଁ ଧମକ ଦେଉଥିଲେ ।
ଗତ କିଛି ଦିନ ମଧ୍ୟରେ ଏମାନେ ୫ କୋଟିରୁ ଅଧିକ ଟଙ୍କା ଠକେଇ କରିଥିଲେ । ଗତ ସପ୍ତାହରେ ଦିଲ୍ଳୀର ଜଣେ ଟାୟାର ବ୍ୟବସାୟୀ ଏହି ଗ୍ୟାଙ୍ଗ୍ର ପଞ୍ଝାରେ ପଡ଼ି ୪୦ ଲକ୍ଷ ଟଙ୍କା ହାରାଇଥିଲେ । ଏନେଇ ସେ ଦିଲ୍ଲୀ ସାଇବର ଥାନାରେ ଅଭିଯୋଗ କରିଥିଲେ । ଦିଲ୍ଳୀ ପୁଲିସ୍ ଘଟଣାର ତଦନ୍ତ କରି ମୂଳ ଲିଙ୍କ୍ ଓଡ଼ିଶାରେ ଥିବା ଠାବ କରିଥିଲା ।
ଶୁକ୍ରବାର ଅପରାହ୍ଣରେ ଟିମ୍ ଭୁବନେଶ୍ୱର ଆସି ଡିସିପି ପ୍ରତୀକ ସିହଂଙ୍କୁ ଭେଟି ଘଟଣା ବିଷୟରେ ଜଣାଇଥିଲେ । ଡିସିପିଙ୍କ ନିର୍ଦ୍ଦେଶ ପରେ ଲକ୍ଷ୍ମୀସାଗର ଥାନା ପୁଲିସ୍ ଓ ଦିଲ୍ଳୀ ସାଇବର ଥାନା ପୁଲିସ୍ ଉକ୍ତ ଫ୍ଲାଟ୍ରେ ଚଢ଼ଉ କରିଥିଲେ । ଏହି ସମୟରେ ସେଠାରେ ସୌରଭ ଏକା ଥିଲେ । ପୁଲିସ୍ ତାଙ୍କୁ ଗିରଫ କରି ଦିଲ୍ଳୀ ନେଇଛି । ତାଙ୍କଠାରୁ ଲାପଟ୍ପ, ମୋବାଇଲ୍, ଏକାଧିକ ସିମ୍ କାର୍ଡ ଓ କିଛି କାଗଜପତ୍ର ଜବତ କରିଛି ବୋଲି ଲକ୍ଷ୍ମୀସାଗର ଥାନା ପୁଲିସ୍ କହିଛି ।
