ନୂଆଦିଲ୍ଲୀ: ମୁମ୍ବାଇ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି)ର ପୂର୍ବତନ ଜୋନାଲ ଡାଇରେକ୍ଟର ସମୀର ଓ୍ବାଙ୍ଖଡେଙ୍କ ବିରୁଦ୍ଧରେ ମାମଲା ରୁଜୁ କଲା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) । ସମୀର ଓ୍ବାଙ୍ଖଡ଼େଙ୍କ ବିରୁଦ୍ଧରେ ‘ପ୍ରିଭେନ୍ସନ ଅଫ୍‌ ମନି ଲଣ୍ଡରିଂ ଆକ୍ଟ’ (ପିଏମଏଲଏ ଆକ୍ଟ) ଜରିଆରେ ମାମଲା ରୁଜୁ ହୋଇଛି । 

ଏହି ମାମଲାରେ ଇଡି ପକ୍ଷରୁ ଅନ୍ୟ କେତେ ଜଣଙ୍କୁ ସମନ ମଧ୍ୟ କରାଯାଇଛି । ମନି ଲଣ୍ଡରିଂ ମାମଲାରେ ଇଡି ସେମାନଙ୍କୁ ପଚରା ଉଚରା କରିବ । ସେପଟେ ଏହି ମାମଲାରେ ଇଡି ଅନେକଙ୍କୁ ପଚରା ଉଚରା ମଧ୍ୟ କରିସାରିଛି । ଏବେ ଯେଉଁମାନଙ୍କୁ ଇଡି ସମନ କରିଛି, ସେମାନଙ୍କ ମଧ୍ୟରୁ ଅଧିକାଂଶ ଏନସିବି ସହ ଜଡ଼ିତ । ସେମାନଙ୍କୁ ପଚରା ଉଚରା କରିବା ଲାଗି ଦିଲ୍ଲୀସ୍ଥିତ କାର୍ଯ୍ୟାଳୟକୁ ଡାକିଛି ଇଡି । 

ସମୀର ଓ୍ବାଙ୍ଖଡେ ବଲିଉଡ ସୁପରଷ୍ଟାର ଶାହରୁଖ ଖାନଙ୍କ ପୁଅ ଆର୍ଯ୍ୟନ ଖାନଙ୍କୁ ଡ୍ରଗ୍ସ ମାମଲାରେ ଗିରଫ କରି ଚର୍ଚ୍ଚାକୁ ଆସିଥିଲେ । ଏହା ପୂର୍ବରୁ ସିବିଆଇ ୨୦୨୩ ମେ’ ମାସରେ ସମୀର ଏବଂ ଅନ୍ୟ ୪ ଜଣଙ୍କ ବିରୁଦ୍ଧରେ ମାମଲା ରୁଜୁ କରିଥିଲା । ଆର୍ଯ୍ୟନ ଖାନଙ୍କ ମାମଲାରେ ୨୫ କୋଟି ଟଙ୍କା ମାଗିବା ମାମଲାରେ ଏଫଆଇଆର ହୋଇଥିଲା । ମାମଲା ହୋଇଥିବା ବ୍ୟକ୍ତିମାନେ ପ୍ରଥମ କିସ୍ତିରେ ୫୦ ଲକ୍ଷ ଟଙ୍କା ହଡ଼ପ କରିଥିଲେ । ମାମଲା ରୁଜୁ କରିବା ପରେ ସିବିଆଇ ୨୯ଟି ସ୍ଥାନରେ ଚଢ଼ାଉ କରିଥିଲା ।