ନୂଆଦିଲ୍ଲୀ, ୦୨/୦୩: ସମସ୍ତ ରାଜନୈତିକ ଦଳ ପାଇଁ ଆଡଭାଇଜରି ଜାରି କରିଛନ୍ତି ନିର୍ବାଚନ ଆୟୋଗ । ୨୦୨୪ ଲୋକସଭା ନିର୍ବାଚନ ପୂର୍ବରୁ ନିର୍ବାଚନ ଆୟୋଗ ଆଡଭାଇଜରି ଜାରି କରିଛନ୍ତି । ଉସୁକାଇବା ଭଳି ଭାଷଣ ଓ ବିନା ତଥ୍ୟ ଆଧାରରେ ଦିଆ ଯାଉଥିବା ମନ୍ତବ୍ୟକୁ ନେଇ ନିର୍ବାଚନ ଆୟୋଗ କଠୋର ହୋଇଛନ୍ତି ।

ନିର୍ବାଚନ ଆୟୋଗ କହିଛନ୍ତି, ପ୍ରଚାର ବେଳେ ଜାତି-ଧର୍ମ ଆଧାରରେ ଭୋଟ୍ ମଗାଯାଇ ପାରିବ ନାହିଁ । ଆୟୋଗଙ୍କ ଅନୁସାରେ, ମନ୍ଦିର, ମସଜିଦ୍, ଚର୍ଚ୍ଚ, ଗୁରୁଦ୍ୱାର ଅଥବା ଅନ୍ୟ କୌଣସି ଧାର୍ମିକ ସ୍ଥଳକୁ ନେଇ ମନ୍ତବ୍ୟ ଦେବାରୁ ବିରତ ରୁହନ୍ତୁ । ଏସବୁର ଉଲ୍ଲଂଘନ କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ନିର୍ବାଚନ ଆୟୋଗ ।

ନିର୍ବାଚନରେ ଷ୍ଟାର ପ୍ରଚାରକଙ୍କ ବଡ଼ ଭୂମିକା ରହିଥାଏ । ଅନେକ ସମୟରେ ଆଦର୍ଶ ଆଚରଣ ବିଧି ଉଲ୍ଲଂଘନ କରିଥାନ୍ତି ଷ୍ଟାର ପ୍ରଚାରକ । କିନ୍ତୁ ଚଳିତ ନିର୍ବାଚନରେ ଆଦର୍ଶ ଆଚରଣ ବିଧି ଉଲ୍ଲଂଘନ ଷ୍ଟାର ପ୍ରଚାରକଙ୍କ ଲାଗି ସମସ୍ୟା ବଢ଼ାଇ ପାରେ । ନିର୍ବାଚନ ଆୟୋଗ କହିଚନ୍ତି, ଆଚରଣ ବିଧି ଉଲ୍ଲଂଘନ ନେଇ ପୂର୍ବରୁ ନୋଟିସ୍ ମିଳିଥିଲେ ପୁଣି ଭୁଲ୍ କଲେ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ମୁଖ୍ୟ ନିର୍ବାଚନ କମିଶନର ରାଜୀବ କୁମାର ନିକଟରେ କହିଥିଲେ, ରାଜନୈତିକ ଦଳ ଗୁଡ଼ିକ ନୈତିକ ଓ ସମ୍ମାନଜନକ ରାଜନୀତିକୁ ପ୍ରୋତ୍ସାହନ ଦେବା ଆବଶ୍ୟକ । ବ୍ୟକ୍ତିଗତ ଆକ୍ରମଣ ପରିବର୍ତ୍ତେ ବିଚାରଧାରା ବ୍ୟକ୍ତ କରନ୍ତୁ ।

ରାଜନୈତିକ ଦଳ ଗୁଡ଼ିକ ସାର୍ବଜନିକ ଶିଷ୍ଟାଚାର ବଜାୟ ରଖିବା ଲାଗି ନିର୍ବାଚନ ଆୟୋଗ ସୋସିଆଲ୍ ମିଡିଆ ଉପରେ ନଜର ରଖିବେ । ନୂଆ ଆଡଭାଇଜରିରେ ସୋସିଆଲ୍ ମିଡିଆର ଗତିବିଧିକୁ ସାମିଲ୍ କରାଯାଇଛି । ବିରୋଧୀଙ୍କୁ ବଦନାମ କରିବା, ଅପମାନିତ କଲା ଭଳି ପୋଷ୍ଟ ନ କରିବାକୁ ରାଜନୈତିକ ଦଳ ଗୁଡ଼ିକୁ କୁହାଯାଇଛି ।