ଭୁବନେଶ୍ୱର, ୦୯/୦୨: ଶନିବାର ଠାରୁ କଳିଙ୍ଗ ଷ୍ଟାଡିୟମରେ ଆରମ୍ଭ ହେବାକୁ ଯାଉଛି ଏଫ୍ଆଇଏଚ୍ ପୁରୁଷ ପ୍ରୋ ଲିଗ୍ । ଆଗକୁ ପ୍ୟାରିସ ଅଲିମ୍ପିକ୍ସ । ତେଣୁ ଘରୋଇ ଗ୍ରାଉଣ୍ଡରୁ ଭାରତୀୟ ଦଳ ଶକ୍ତିଶାଳୀ ଅଷ୍ଟ୍ରେଲିଆ, ନେଦରଲାଣ୍ଡସ ଓ ସ୍ପେନ ବିପକ୍ଷରେ ପ୍ରସ୍ତୁତି ଆରମ୍ଭ କରିବ ।
ଇତିମଧ୍ୟରେ ଅଷ୍ଟ୍ରେଲିଆ, ସ୍ପେନ, ନେଦରଲାଣ୍ଡସ ଓ ଆୟର୍ଲାଣ୍ଡ ଭୁବନେଶ୍ୱର ପହଞ୍ଚି ସାରିଛନ୍ତି । ପର୍ଯ୍ୟାୟକ୍ରମିକ ଭାବେ ଘରୋଇ ଦଳ ସହ ଅନ୍ୟମାନେ କଳିଙ୍ଗ ଷ୍ଟାଡିୟମରେ ପ୍ରସ୍ତୁତି ଜାରି ରଖିଛନ୍ତି । ପୁରୁଷ ଦଳ ହାଙ୍ଗଝୌ ଏସିଆଡ୍ରେ ଚାମ୍ପିଅନ ହୋଇ ସିଧାସଳଖ ପ୍ୟାରିସ ଟିକେଟ୍ ହାସଲ କରିଥିଲା । ଗତ ଅଲିମ୍ପିକ୍ସରେ ଦଳ ୪ ଦଶନ୍ଧି ପରେ ପଦକ ଜିତିବାରେ ସଫଳ ହୋଇଥିଲା । ଏଥର ପ୍ୟାରିସରେ ମଧ୍ୟ ଦଳ ପୂର୍ବ ପ୍ରଦର୍ଶନ ଦୋହରାଇବ ବୋଲି ଆଶା ରହିଛି ।
ପ୍ରୋ ଲିଗ୍ରେ ଭାରତୀୟ ଦଳ ଆସନ୍ତା ୧୦ ତାରିଖରେ ସ୍ପେନ ବିପକ୍ଷରେ ଅଭିଯାନ ଆରମ୍ଭ କରିବ । ପରେ ୧୧ ତାରିଖରେ ନେଦରଲାଣ୍ଡସକୁ, ୧୫ରେ ଅଷ୍ଟ୍ରେଲିଆକୁ ଏବଂ ୧୬ରେ ଆୟର୍ଲାଣ୍ଡକୁ ଭେଟିବ । ଏହାପରେ ଦ୍ୱିତୀୟ ରାଉଣ୍ଡ ରାଉରକେଲାର ବିର୍ସା ମୁଣ୍ଡା ଷ୍ଟାଡିୟମରୁ ଆରମ୍ଭ ହେବ । ୧୯ରେ ଭାରତ ପ୍ରଥମ ମ୍ୟାଚ୍ରେ ସ୍ପେନକୁ, ୨୧ରେ ନେଦରଲାଣ୍ଡସକୁ, ୨୪ରେ ଅଷ୍ଟ୍ରେଲିଆକୁ ଏବଂ ୨୫ରେ ଆୟର୍ଲାଣ୍ଡକୁ ଭେଟିବ ।
ଟିକେଟ୍ ମୂଲ୍ୟ ୧୦୦ରୁ ୫୦୦
ପ୍ରୋ ଲିଗ୍ ପାଇଁ ସର୍ବନିମ୍ନ ଟିକେଟ୍ ମୂଲ୍ୟ ୧୦୦ ଏବଂ ସର୍ବାଧିକ ୫୦୦ ଟଙ୍କା ରଖାଯାଇଛି । ଷ୍ଟାଡିୟମର ପଶ୍ଚିମ ଷ୍ଟାଣ୍ଡର ପ୍ରଥମ ଫ୍ଲୋର ୫୦୦, ପୂର୍ବଷ୍ଟାଣ୍ଡର ପ୍ରଥମ ଫ୍ଲୋର ୨୦୦, ଉତ୍ତର ଷ୍ଟାଣ୍ଡର ପ୍ରଥମ ଫ୍ଲୋର ୧୦୦ ଓ ଦକ୍ଷିଣ ଷ୍ଟାଣ୍ଡର ପ୍ରଥମ ଫ୍ଲୋର ୧୦୦ ଟଙ୍କା ରଖାଯାଇଛି । ପୂର୍ବରୁ ଉଭୟ ପୁରୁଷ ଓ ମହିଳା ପ୍ରୋ ଲିଗ୍ ମ୍ୟାଚ୍ ପାଇଁ ଭୁବନେଶ୍ୱର ଓ ରାଉରକେଲା ଭେନ୍ୟୁ ସକାଶେ ଟିକେଟ୍ ବିକ୍ରି ହେବା ବିଷୟ ହକି ଇଣ୍ଡିଆ ଘୋଷଣା କରିଥିଲା । ଉଭୟ ଅନ୍ଲାଇନ କାଉଣ୍ଟରରେ ଦର୍ଶକ ଟିକେଟ୍ କିଣିପାରିବେ ।
