ନୂଆଦିଲ୍ଲୀ, ୦୯/୦୨: ସାଧାରଣତଃ ବିମାନ ଯାତ୍ରା ବେଳେ ଯାତ୍ରୀ ସାଙ୍ଗରେ ନେଉଥିବା ସାମାନକୁ ନେଇ ଚିନ୍ତିତ ଥାଆନ୍ତି । ଅଧିକ ଟଙ୍କା ହେଉ ଅବା ଅନ୍ୟ କାରଣ ଲୋକ ଭ୍ରମଣ ବେଳେ ସାଙ୍ଗରେ ସୀମିତ ଲଗେଜ୍ ନେବାକୁ ଚାହିଁ ଥାନ୍ତି । ତେବେ ବିମାନ ଯାତ୍ରା ବେଳେ ଲଗେଜ୍ ପର୍ଯ୍ୟନ୍ତ କଥା ଠିକ୍ । କିନ୍ତୁ ଏବେ ଯାତ୍ରା ପୂର୍ବରୁ ଯାତ୍ରୀ ହେବେ ଓଜନ ।
ନିକଟରେ ଏଭଳି ନିଷ୍ପତ୍ତି ନେଇଛି ଏକ ବିମାନ ସେବା ପ୍ରଦାନକାରୀ ସଂସ୍ଥା । ଲଗେଜ୍ ସହ ଏୟାରଲାଇନ୍ ଯାତ୍ରୀଙ୍କୁ ଓଜନ କରିବା ଆରମ୍ଭ କରି ଦେଇଛି । ୟୁରୋପିଆନ୍ ଏୟାରଲାଇନ୍ ଫିନଏୟାରର ଘୋଷଣା ଅନୁସାରେ, ଏଣିକି ପ୍ରତ୍ୟେକଟି ବିମାନ ଉଡ଼ାଣ ପୂର୍ବରୁ ଯାତ୍ରୀଙ୍କ ଓଜନ ମାପ କରାଯିବ ।
ଏନେଇ ଫିନ୍ଏୟାରର ମୁଖପାତ୍ର କୈସା ଟିକ୍କାନେନ୍ କହିଛନ୍ତି, ବିମାନରେ ଚଢ଼ିବା ପୂର୍ବରୁ ଯାତ୍ରୀଙ୍କୁ ଓଜନ କରାଯିବ । ଚଳିତ ସପ୍ତାହରେ ସୋମବାର ହେଲସିଙ୍କି ବିମାନବନ୍ଦରରେ ଓଜନ ମାପ କରିବା ଆରମ୍ଭ ହୋଇଛି । ଏବେ ସୁଦ୍ଧା ଏଥିରେ ୫୦୦ ଜଣ ଭାଗ ନେଇଛନ୍ତି ।
କର୍ତ୍ତୃପକ୍ଷଙ୍କ ଅନୁସାରେ, ଏହାଦ୍ୱାରା ବିମାନର ମୋଟ ଓଜନ କାଲକୁଲେଟ୍ କରାଯାଇ ପାରିବ । ଯେଉଁଥିରେ ଇନ୍ଧନ ସହ ଚେକ୍ ଇନ୍ କରାଯାଇଥିବା ସାମାନ, କାର୍ଗୋ, ବିମାନରେ ଖାଦ୍ୟ ପାନୀୟ, ପାଣି ଟାଙ୍କି ଓ ଗ୍ରାହକଙ୍କ ଓଜନ ସାମିଲ୍ । ସୁରକ୍ଷିତ ଯାତ୍ରା ଲାଗି ଏସବୁ ଜରୁରୀ ।
ଏହା ପୂର୍ବରୁ ୟୁନାଇଟେଡ୍ ଏୟାରଲାଇନ୍ସ ଯାତ୍ରୀଙ୍କ ଓଜନ ବୃଦ୍ଧି ପାଇବାରୁ କେତେକ ସିଟକୁ ବ୍ଲକ୍ କରିବା ଆରମ୍ଭ କରି ଦେଇଥିଲା । ସେତେବେଳେ କୁହା ଯାଇଥିଲା, ବିମାନ ଭିତରେ ଯାତ୍ରୀଙ୍କ ଓଜନ ବଢ଼ିବା ପରେ ସୁରକ୍ଷାକୁ ଦୃଷ୍ଟିରେ ରଖି ବସିବା ଲାଗି ବ୍ୟବସ୍ଥା କରିବାକୁ ପଡ଼ିବ । ଆଉ ଏହାର୍ ଅର୍ଥ କିଛି ସିଟ୍ ଖାଲି ରଖିବା ।
ତେବେ ପ୍ରଥମଥର ପାଇଁ କୌଣସି ଏୟାରଲାଇନ୍ ଯାତ୍ରୀଙ୍କୁ ଓଜନ କରି ନାହିଁ । ଗତବର୍ଷ ଇଜିଜେଟ୍ ଏକ ଉଡ଼ାଣରୁ ଯାତ୍ରୀଙ୍କୁ ଓହ୍ଲାଇବାକୁ କହିଥିଲା । କାରଣ ବିମାନ ଏତେ ଭାରି ହୋଇ ଯାଇଥିଲା ଯେ, ରନୱେକୁ ଯାଇ ପାରି ନଥିଲା ।