ଆନନ୍ଦପୁର ୨୯/୦୨(ସନ୍ତୋଷ ରାଉତ): କେନ୍ଦୁଝର ଜିଲ୍ଲା ଘସିପୁରା ନିର୍ବାଚନ ମଣ୍ଡଳୀରେ ବଦ୍ରି ଓ ନିରଞ୍ଜନଙ୍କ ଲଢେଇ ପୁଣି ଥରେ ଦେଖିବାକୁ ମିଳିପାରେ ବୋଲି ଚର୍ଚ୍ଚାକୁ ଆସିଛି । ବିଜେଡିର ଭେଟରାନ୍ ନେତା ତଥା ବର୍ତ୍ତମାନର ଘସିପୁରା ବିଧାୟକ ବଦ୍ରିନାରାୟଣ ପାତ୍ର ୨୦୨୪ରେ ପୁଅ ଦେବାଶିଷଙ୍କୁ ନିର୍ବାଚନ ମଇଦାନକୁ ଓହ୍ଲାଇବାକୁ ରଣନୀତି ପ୍ରସ୍ତୁତ କରୁଛନ୍ତି ।
ସେହିପରି ପୁଅ ଦେବାଶିଷ ମଧ୍ୟ ବାପାଙ୍କ ଅନୁସରଣ କରି ସମାନ ଭାବେ ଲୋକଙ୍କ ନିକଟତର ହେବାକୁ ଉଦ୍ୟମ କରୁଛନ୍ତି । ଏଥର ନହେଲେ ଆଉ କେବେ ନୁହଁ ଲକ୍ଷ୍ୟରେ ପୁଅ ଦେବାଶିଷଙ୍କ ପାଇଁ ବଦ୍ରି ପୁରା ଦମ୍ରେ ଲାଗିପଡିଛନ୍ତି । ସେହିଭଳି ଭେଟେରାନ କଂଗ୍ରେସ ନେତା ତଥା ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ ମଧ୍ୟ ରାଜନୈତିକ ଗୋଟି ଚଳନାରେ କମ୍ ନୁହନ୍ତି । ସେ ଘସିପୁରା ନିର୍ବାଚନମଣ୍ଡଳୀକୁ ଭୁଲି ଯାଇ ଭଦ୍ରକ ଜିଲ୍ଲାର ଭଣ୍ଡାରିପୋଖରୀ ନିର୍ବାଚନମଣ୍ଡଳୀରେ ବ୍ୟସ୍ତ ରହୁଥିବା ଦେଖାଯାଉଛି । ୨୦୧୯ରେ ନିରଞ୍ଜନ ମାତ୍ର ୮୮୫୯ ଖଣ୍ଡ ଭୋଟ ବ୍ୟବଧାନରେ ବିଜେଡି ବିଧାୟକ ପ୍ରଫୁଲ୍ଲ ସାମଲଙ୍କ ଠାରୁ ପରାଜୟ ସ୍ୱୀକାର କରିଥିଲେ । ଏବେ କିନ୍ତୁ ଭଣ୍ଡାରିପୋଖରୀ ନିର୍ବାଚନମଣ୍ଡଳୀରେ ଅବସ୍ଥା ସୁଧୁରିବାକୁ ଲାଗିଛି ।
ଭଣ୍ଡାରିପୋଖରୀରେ ନିରଞ୍ଜନଙ୍କ ସମର୍ଥନ ବୃଦ୍ଧି ପାଇବା ଅନ୍ୟପଟେ ବିଜେଡି ବିଧାୟକ ପ୍ରଫୁଲ୍ଲ ସାମଲଙ୍କୁ ଇଡିର ଆକ୍ରମଣ ରାଜନୈତିକ ମାହୋଲକୁ ସରଗରମ କରିବାରେ ଲାଗିଛି । ରାଜନୈତିକ ସମୀକ୍ଷକଙ୍କ ମତ ଅନୁସାରେ ନିରଞ୍ଜନ ଘନ ଘନ ଭଣ୍ଡାରିପୋଖରୀ ଗସ୍ତ କରି କଂଗ୍ରେସର ସ୍ଥିତିକୁ ମଜଭୁତ କରିବା ସହିତ ଶେଷ ମୁହୂର୍ତ୍ତରେ ଏହି ଆସନ ପୁଅ ପାଇଁ ଛାଡି ପାରନ୍ତି ବୋଲି ଚର୍ଚ୍ଚା ହେଉଛି । ଭଣ୍ଡାରିପୋଖରୀରେ ପୁଅକୁ ଛାଡି ନିରଞ୍ଜନ ଘସିପୁରାରେ ରାଜନୀତିକ ମାହୋଲ ସରଗରମ କରିବା ଅପେକ୍ଷାରେ ରଣନୀତି ପ୍ରସ୍ତୁତ କରୁଥିବା ଚର୍ଚ୍ଚାକୁ ଆସିଛି । ଏପରିକି ବଦ୍ରି ପୁଅ ଦେବାଶିଷକୁ ଆସନ ଛାଡିବା ପାଇଁ ଲାଗିପଡିଥିବାବେଳେ ପୂର୍ବ ନିର୍ବାଚନ ଭଳି ନିରଞ୍ଜନ ୨୦୨୪ରେ ରାଜନୈତିକ ମଇଦାନକୁ ବଦ୍ରିଙ୍କୁ ନିର୍ବାଚନରେ ଲଢିବା ପାଇଁ ଆହ୍ୱାନ କରିପାରନ୍ତି । ୨୦୧୯ରେ ଘସିପୁରା ନିର୍ବାଚନମଣ୍ଡଳୀରେ ବଦ୍ରି ଓ ନିରଞ୍ଜନ ଲଢେଇ ଦେଖିବାକୁ ମିଳିଥିଲା । ବଦ୍ରି ୮୬୮୧୬ ଭୋଟ ଓ ନିରଞ୍ଜନ ୫୪୧୨୮ ଭୋଟ ପାଇଥିଲେ । ୩୨୬୮୮ ଖଣ୍ଡ ବ୍ୟବଧାନରେ ପରାଜୟ ସ୍ୱୀକାର କରିଥିଲେ ନିରଞ୍ଜନ ।
