କଟକ,୧୧/୦୨: ଆସନ୍ତା ୨୦ରୁ ମାଟ୍ରିକ୍ ପରୀକ୍ଷା ଆରମ୍ଭ ହେଉଥିଲା ବେଳେ ଏହି ଗୋଟିଏ ସମୟରେ କଟକରେ ଅନ୍ତଃସ୍କୁଲ୍ କ୍ରିକେଟ୍ ଟୁର୍ଣ୍ଣାମେଣ୍ଟ ଅନୁଷ୍ଠିତ ହେଉଛି । ଏଭଳି ସ୍ଥିତିରେ ମାଟ୍ରିକ ପିଲାମାନେ କ୍ରିକେଟ୍ ଖେଳିବେ ନା ମାଟ୍ରିକ୍ ପରୀକ୍ଷା ଦେବେ ତାହାକୁ ନେଇ ବଡ଼ ସମସ୍ୟା ଦେଖାଦେଇଛି । ମାଟ୍ରିକ୍ ଭଳି କ୍ୟାରିଅର୍ର ଗୁରୁତ୍ୱପୂର୍ଣ୍ଣ ପରୀକ୍ଷା ସମୟରେ ଏହି ଟୁର୍ଣ୍ଣାମେଣ୍ଟ୍ ହେଉଥିବାରୁ ଏହାକୁ ନେଇ ଅନେକ ଅଭିଭାବକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ମାଟ୍ରିକ୍ ପରୀକ୍ଷା ଶେଷ ହେବା ପର୍ଯ୍ୟନ୍ତ ଏହି ଟୁର୍ଣ୍ଣାମେଣ୍ଟକୁ ସ୍ଥଗିତ ରଖିବା ଲାଗି ହାଇକୋର୍ଟରେ ମାମଲା ରୁଜୁ ହୋଇଛି । ଆସନ୍ତା ସୋମବାରକୁ ମାମଲାର ଶୁଣାଣି ପାଇଁ ଧାର୍ଯ୍ୟ ହୋଇଛି । ମୁଖ୍ୟ ବିଚାରପତିଙ୍କ କୋର୍ଟରେ ମାମଲାର ଶୁଣାଣି ହେବ ।
ତୁଳସୀପୁରର ହରେରାମ ସାହୁ ଏହି ମାମଲା ରୁଜୁ କରିଛନ୍ତି । ସେ ପିଟିସନ୍ରେ ଉଲ୍ଲେଖ କରିଛନ୍ତି ଯେ, ଓଡ଼ିଶା ଆଥ୍ଲେଟିକ୍ ଆସୋସିଏସନ୍ ପକ୍ଷରୁ ଗତ ୭ ତାରିଖରୁ ଆସନ୍ତା ୨୫ ତାରିଖ ପର୍ଯ୍ୟନ୍ତ ଅନ୍ତଃସ୍କୁଲ୍ କ୍ରିକେଟ୍ ଟୁର୍ଣ୍ଣାମେଣ୍ଟ ଅନୁଷ୍ଠିତ ହେଉଛି । ଉଭୟ ଘରୋଇ ଏବଂ ସରକାରୀ ସ୍କୁଲ ଛାତ୍ରମାନେ ଏହି ପ୍ରତିଯୋଗିତାରେ ଭାଗ ନେଇଥାନ୍ତି । କିନ୍ତୁ ଠିକ୍ ଏହି ସମୟରେ ସିବିଏସ୍ଇ ପିଲାଙ୍କ ମାଟ୍ରିକ୍ ପରୀକ୍ଷା ଆସନ୍ତା ୧୫ ତାରିଖରୁ ମାର୍ଚ୍ଚ ୧୩ ତାରିଖ ପର୍ଯ୍ୟନ୍ତ ଚାଲିବ । ସେହିପରି ବୋର୍ଡ ଦ୍ୱାରା ପରିଚାଳିତ ମାଟ୍ରିକ୍ ପରୀକ୍ଷା ୨୦ରୁ ମାର୍ଚ୍ଚ ୪ ତାରିଖ ପର୍ଯ୍ୟନ୍ତ ଚାଲିବ ।
ଏହି ମ୍ୟାଚ୍ ସକାଳ ସାଢ଼େ ୮ଟାରୁ ଆରମ୍ଭ ହେଉଥିଲାବେଳେ ମାଟ୍ରିକ୍ ପରୀକ୍ଷା ସାଢ଼େ ୧୦ଟାରେ ଆରମ୍ଭ ହେଉଛି । ଯେଉଁଦିନ ମାଟ୍ରିକ୍ ପରୀକ୍ଷା ରହିଛି ସେହିସବୁ ଦିନ ମ୍ୟାଚ୍ ପାଇଁ ଦିନ ଧାର୍ଯ୍ୟ ହୋଇଛି । ଏପରିସ୍ଥଳେ ମାଟ୍ରିକ୍ ପିଲାମାନେ ଏହି ଖେଳରେ ଭାଗନେବା ଅସମ୍ଭବ ହୋଇପଡ଼ିଛି । ତେଣୁ ଖେଳକୁ ମାଟ୍ରିକ୍ ପରୀକ୍ଷା ଶେଷ ପର୍ଯ୍ୟନ୍ତ ସ୍ଥଗିତ କରାଯାଇ ସାନି ସିଡ୍ୟୁଲ୍ ପ୍ରସ୍ତୁତ ପାଇଁ ଆବେଦନକାରୀ ପ୍ରାର୍ଥନା କରିଛନ୍ତି । ଏଥିରେ ବିସିସିଆଇ, ଓସିଏ ଏବଂ କଟକ ଜିଲ୍ଲା ଆଥ୍ଲେଟିକ୍ ଆସୋସିଏସନ୍କୁ ପକ୍ଷଭୁକ୍ତ କରାଯାଇଛି ।