ରାୟଗଡ଼ା,୩୦/୧୧: ଜିଲ୍ଲା ବିଜେଡି ରାଜନୀତି କେତେବେଳେ କେଉଁ ମୋଡ଼ ନେଉଛି, ଠଉରାଇବା ଏବେ କର୍ମୀଙ୍କ ପକ୍ଷେ ଅସମ୍ଭବ ହୋଇପଡିଛି । ବରିଷ୍ଠ ନେତାଏଁ ବି ଦ୍ୱନ୍ଦ୍ୱରେ ରହୁଛନ୍ତି । ଯାହାର ନିଚ୍ଛକ ଚିତ୍ର ଦେଖିବାକୁ ମିଳିଛି ଦିନକ ତଳେ ଆୟୋଜିତ ବିଜେଡି ପ୍ରଶିକ୍ଷଣ ଶିବିରରେ । ଏଥିରେ ଯୋଗ ଦେଇଥିଲେ ରାୟଗଡା ବିଧାୟକ ମକରନ୍ଦ ମୁଦୁଲି । ରାଜ୍ୟର ଏକମାତ୍ର ସ୍ୱାଧୀନ ପ୍ରର୍ଥୀ ଭାବେ ଜିତିଥିଲେ ମଧ୍ୟ ପରବର୍ତ୍ତୀ ସମୟରେ ବିଜେଡିକୁ ସେ ସମର୍ଥନ ଦେଇ ଆସୁଥିଲେ । ଆନୁଷ୍ଠାନିକ ଭାବେ ଦଳରେ ଯୋଗଦେଇନଥିଲେ ବି ବିଭିନ୍ନ କାର୍ଯ୍ୟକ୍ରମରେ ଉପସ୍ଥିତ ରହୁଥିଲେ । ଅଥଚ କେବେ ହେଲେ କର୍ମୀ ସମ୍ମିଳନୀରେ ସାମିଲ ହୋଇନଥିଲେ ।
ଏବେ ସବୁ ଆଲୋଚନାକୁ ପଛରେ ପକାଇ ମଙ୍ଗଳବାର ଖୋଲାଖୋଲି ବିଜେଡି ପ୍ରଶିକ୍ଷଣ ଶିବିରରେ ସାମିଲ ହେବା ଓ ମଞ୍ଚ ଉପରେ ରହିବା ଘଟଣା ମୁଖ୍ୟ ଚର୍ଚ୍ଚାର ବିଷୟ ହୋଇଛି । କାରଣ ଏହି ଶିବିର କେବଳ ଦଳର ସକ୍ରିୟ କର୍ମୀ ଏବଂ ନିର୍ବାଚିତ ପ୍ରତିନିଧିଙ୍କ ପାଇଁ ଆୟୋଜିତ ହୋଇଥିଲା । ଆଲୋଚନା ହେଉଛି, ଏଥର ମକରନ୍ଦ ବିଜେଡିରୁ ଟିକଟ ଦାବି କରିପାରନ୍ତି । ଦଳୀୟ ରାଜନୀତିରେ ସୃଷ୍ଟି ହୋଇପାରେ ନୂଆ ସମୀକରଣ ।
ଦଳର ଗୋଟିଏ ଗୋଷ୍ଠୀ ମକରନ୍ଦଙ୍କୁ ପ୍ରାର୍ଥୀ କରିବାକୁ ଲାଗିପଡ଼ିଛି । ଅନ୍ୟ ଏକ ଗୋଷ୍ଠୀ ଏସ୍ଡିସି ଅଧ୍ୟକ୍ଷା ଅନସୂୟା ମାଝୀଙ୍କ ସପକ୍ଷରେ ସ୍ୱର ଉଠାଉଛନ୍ତି । ଖୋଦ୍ ଅନସୂୟା ବି ନିଜ ଇଚ୍ଛା ପ୍ରକଟ କରିଛନ୍ତି । ଏସବୁ ଭିତରେ ଦଳର ବରିଷ୍ଠ ତଥା ବଡ଼ ଗୋଷ୍ଠୀ ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷ ଗଙ୍ଗାଧର ପୁଆଲାଙ୍କୁ ପ୍ରାର୍ଥୀ କରିବା ଲାଗି ହାଇକମାଣ୍ଡଙ୍କୁ ଜଣାଇସାରିଛି । ଗଙ୍ଗାଧର ଓ ଅନସୂୟାଙ୍କ ମଧ୍ୟରେ ଛକାପଞ୍ଝା ଚାଲିଥିବା ବେଳେ ମକରନ୍ଦଙ୍କ ହଠାତ ପ୍ରବେଶ ପାଣିପାଗକୁ ବଦଳାଇ ଦେଇଛି । ବିଧାୟକ ହେବା ପରେ ବହୁବାର ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି ମକରନ୍ଦ । ବିଭିନ୍ନ ସଭା ସମିତିରେ ଖୋଲାଖୋଲି ଶାସକ ଦଳକୁ ଟାର୍ଗେଟ କରିଛନ୍ତି । ଏମିତିରେ ସେ ବିଜେଡିର ପ୍ରାଥମିକ ସଦସ୍ୟ ନାହାନ୍ତି । ତଥାପି ଦଳୀୟ ଟିକଟ ପାଇଁ କିଭଳି ଆଶାବାଦୀ ଅଛନ୍ତି ବୋଲି ପ୍ରଶ୍ନ ଉଠିଛି ।
