ମୁମ୍ବାଇ, ୩୧/୦୧: ଅନଲାଇନ୍ ପେମେଣ୍ଟ ସର୍ଭିସ୍ ଯୋଗାଉଥିବା ଅନ୍ୟତମ ଲୋକପ୍ରିୟ କମ୍ପାନୀ ପେଟିଏମକୁ ଝଟକା ଲାଗିଛି । ବୁଧବାର ପେଟିଏମର ଡିଜିଟାଲ୍ ପେମେଣ୍ଟ ଏବଂ ଫାଇନାନ୍ସିଆଲ୍ ସର୍ଭିସ୍ ପ୍ରଦାନ କରୁଥିବା କମ୍ପାନୀ ଉପରେ ପ୍ରତିବନ୍ଧକ ଲଗାଇଛନ୍ତି ଆରବିଆଇ । ଏଣିକି ପେଟିଏମ୍ ପେମେଣ୍ଟ୍ସ ବ୍ୟାଙ୍କ ଲିମିଟେଡ୍ (PPBL) ଆଉ ନୂଆ ଗ୍ରାହକଙ୍କୁ ଯୋଡ଼ି ପାରିବ ନାହିଁ । ଏହି ନିର୍ଦ୍ଦେଶନାମା ତତକ୍ଷଣାତ୍ ଲାଗୁ କରାଯାଇଛି ।
ପେଟିଏମ୍ ପେମେଣ୍ଟ ବ୍ୟାଙ୍କ ନୂଆ ଗ୍ରାହକ ଯୋଡ଼ିବା ଉପରେ ପ୍ରତିବନ୍ଧକ ଲାଗିବା ସହ ଆରବିଆଇ ଆଉ ଏକ ନିର୍ଦ୍ଦେଶ ଦେଇଛନ୍ତି । ଆରବିଆଇ ନିର୍ଦ୍ଦେଶ ମୁତାବକ, ୨୦୨୪ ଫେବ୍ରୁଆରୀ ୨୯ ପରେ କୌଣସି ବି ଗ୍ରାହକଙ୍କ ଖାତା, ୱାଲେଟ୍ ଓ ଫାସଟ୍ୟାଗରେ ଜମା କିମ୍ବା ଉଠାଣ କରି ପାରିବ ନାହିଁ ପେଟିଏମ୍ ।
ଅର୍ଥାତ୍ ପେଟିଏମ୍ ପେମେଣ୍ଟ ବ୍ୟାଙ୍କରେ ଥିବା ସେଭିଂ ଆକାଉଣ୍ଟ, କରେଣ୍ଟ ଆକାଉଣ୍ଟ, ପ୍ରିପେଡ୍ ଆକାଉଣ୍ଟ, ଫାସଟ୍ୟାଗ୍ ଆଦି ଖାତା ପରିଚାଳନା ଫେବ୍ରୁଆରୀ ୨୯ ପରେ କରାଯାଇ ପାରିବ ନାହିଁ । ତେବେ ଫେବ୍ରୁଆରୀ ୨୯ ପରେ ଗ୍ରାହକ ପେଟିଏମ୍ ପେମେଣ୍ଟ ବ୍ୟାଙ୍କ ସହ ଥିବା ଆକାଉଣ୍ଟରେ ଦେଣନେଣ କରି ପାରିବେ ।
ବ୍ୟାଙ୍କିଂ ପରିଚାଳନା ନିୟମ ୧୯୪୯ ଆଧାରରେ ଆରବିଆଇ ଏହି ନିର୍ଦ୍ଦେଶ ଦେଇଛନ୍ତି । ତେବେ ଗ୍ରାହକଙ୍କୁ ମିଳିବାକୁ ଥିବା ସୁଧ ଓ କ୍ୟାସବ୍ୟାକ ମିଳିବ ହୋଲି କହିଛନ୍ତି ଆରବିଆଇ । ଆକାଉଣ୍ଟରେ ଜମା ରାଶି ଥିବା ପର୍ଯ୍ୟନ୍ତ ଗ୍ରାହକ ବିଭିନ୍ନ ମାଧ୍ୟମରେ ଅର୍ଥର ଉପଯୋଗ କରି ପାରିବେ । ତା ଉପରେ କୌଣସି ପ୍ରତିବନ୍ଧକ ନାହିଁ । ତେବେ ଫେବ୍ରୁଆରୀ ୨୯ ପରେ ବ୍ୟାଙ୍କିଂ ସେବା ବ୍ୟବହାର କରି ହେବ ନାହିଁ ।
ଆରବିଆଇ ପକ୍ଷରୁ କୁହାଯାଇଛି, ପେଟିଏମ୍ ପେମେଣ୍ଟ ବ୍ୟାଙ୍କ ସମସ୍ତ ନିୟମ ପାଳନ କରି ନାହିଁ । ଫେବ୍ରୁଆରୀ ୨୯ ସୁଦ୍ଧା କରାଯାଇଥିବା ସମସ୍ତ ନେଣଦେଣକୁ ୨୦୨୪ ମାର୍ଚ୍ଚ ୧୫ ମଧ୍ୟରେ ସେଟଲମେଣ୍ଟ କରିବାକୁ ଆରବିଆଇ ନିର୍ଦ୍ଦେଶ ଦେଇଛନ୍ତି ।
ବୁଧବାର ଆରବିଆଇ ଜାରି କରିଥିବା ପ୍ରତିବନ୍ଧକର ପ୍ରଭାବ ଗୁରୁବାର ପେଟିଏମର ସେୟାର ଉପରେ ପଡ଼ିପାରେ । ସୂଚନାଯୋଗ୍ୟ, ବିଗତ ଦିନରେ ପେଟିଏମ୍ ସେୟାର ୨୦ ପ୍ରତିଶତ ପର୍ଯ୍ୟନ୍ତ ହ୍ରାସ୍ ପାଇଥିଲା ।