କାଶୀପୁର ୧୦/୧୧: କାଶୀପୁର ବ୍ଲକ ଦୁଡୁକା ବାହାଲ ପଞ୍ଚାୟତ ସଦରସ୍ଥିତ ବାବୁ ସାହି ଏବଂ ଗୌଡ଼ ସାହିର ପ୍ରାୟ ଚାଳିଶି ପରିବାର ପାଇପ ପାଣି ପାଇବାରେ ବଞ୍ଚିତ ଥିବା ଜଣା ଯାଇଛି । ଫଳରେ ସାହି ବାସିନ୍ଦା କୂଅର ଦୂଷିତ ପାଣି ବ୍ୟବହାର କରିବାକୁ ବାଧ୍ୟ ହେଉଥିବା କହିଛନ୍ତି । କୌଣସି ଏକ ସ୍ଥାନରେ ପାଇପ ଫାଟି ଥିବାରୁ ଉଠାଣିଆ ସ୍ଥାନରେ ଥିବା ଏହି ସାହିକୁ ପାଣି ଯିବାରେ ସମସ୍ୟା ହେଉଛି। ପଞ୍ଚାୟତ କର୍ତ୍ତୃପକ୍ଷଙ୍କୁ ପାଣି ସମସ୍ୟା ନେଇ ଅନେକ ଥର ଗୁହାରି କରିଥିଲେ ସୁଦ୍ଧା ପ୍ରତିକାର ବ୍ୟବସ୍ଥା କରାଯାଉ ନ ଥିବାର ଗ୍ରାମବାସୀ କହିଛନ୍ତି । ଗତ ବର୍ଷ ଦୁଡୁକା ବାହାଲ ଗ୍ରାମରେ ଡ଼ାଇରିଆ ଦେଖା ଦେବାରୁ ଜଣେ ମହିଳାଙ୍କ ମୃତ୍ୟୁ ହୋଇଥିବା ବେଳେ ପଚାଶରୁ ଅଧିକ ଜଣ ଆକ୍ରାନ୍ତ ହୋଇ ଥିଲେ  । ପାନୀୟ ଜଳ ଦୂଷିତ ହେବା କାରଣରୁ ରୋଗ ବ୍ୟାପୀ ଥିବାର ଜଣା ଯାଇଥିଲା । ତଥାପି ଏହି ଗ୍ରାମର ପାନୀୟ ଜଳର ସମସ୍ୟା ପ୍ରତି ବ୍ଲକ ପ୍ରଶାସନ ଗୁରୁତ୍ବ ନ ଦେବା  ଦୁର୍ଭାଗ୍ୟର ବିଷୟ ବୋଲି  ଅଭିଯୋଗ କରାଯାଇଛି । ସାହିରେ ଥିବା କୂଅ ନିକଟରେ ଗଛ ଲତା ଥିବାରୁ ଏହାର ଶୁଖିଲା ପତ୍ର ମାନ କୁଅ ପାଣିରେ ମିଶୁଥିବାରୁ ଜଳ ଦୂଷିତ ହେବାର ଆଶଙ୍କା ରହିଛି । ବିଭାଗୀୟ କର୍ତ୍ତୃପକ୍ଷ ତୁରନ୍ତ ଏଥିପ୍ରତି ପଦକ୍ଷେପ ଗ୍ରହଣ ନକଲେ ରାସ୍ତା ରୋକ ଆନ୍ଦୋଳନ କରିବାକୁ ବାଧ୍ୟ ହେବୁ ବୋଲି ସୁନାମଣି ରାୟ ସୁରେଖା ପାତ୍ର, ନିର୍ମଳା ପୂଜାରୀ ତୁଳସୀ ଗୌଡ଼ ପ୍ରମୁଖ ଗ୍ରାମର ମହିଳା ମାନେ କହିଛନ୍ତି ।