ନୂଆଦିଲ୍ଲୀ, ୧୧/୦୨: ଆଗାମୀ ଲୋକସଭା ନିର୍ବାଚନରେ ଦିଲ୍ଲୀର ୭ ଆସନରେ ଆପ୍ ଏକା ଲଢ଼ିବ ନା କଂଗ୍ରେସ ସହ ଆସନ ବୁଝାମଣା କରିବ ? ତାହା ଏବେ ପର୍ଯ୍ୟନ୍ତ ସ୍ପଷ୍ଟ ହୋଇ ନାହିଁ । ସିଟ୍ ସେୟାରିଂକୁ ନେଇ ସଂଶୟ ଲାଗି ରହିଥିବା ବେଳେ ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ଦେଇଛନ୍ତି ବଡ଼ ବୟାନ ।
ପଞ୍ଜାବର ନରନତାରନ ରାଲିରେ କେଜ୍ରିୱାଲ୍ କହିଛନ୍ତି, ଦିଲ୍ଲୀବାସୀ ଏଥର ନିଷ୍ପତ୍ତି ନେଇ ସାରିଛନ୍ତି କି ଦିଲ୍ଲୀର ୭ ଲୋକସଭା ଆସନ ଆମ୍ ଆଦମୀ ପାର୍ଟିକୁ ଦେବେ । ବିଜେପି ଡରୁଛି କାଳେ କେନ୍ଦ୍ରରେ ଆପ୍ କ୍ଷମତାକୁ ଆସିଯିବ । କେଜ୍ରିୱାଲ୍ କହିଛନ୍ତି, ବିଜେପି ଏବେ ଆପକୁ ଡରୁଛି । ସମଗ୍ର ଦେଶରେ ଆମ୍ ଆଦମୀ ପାର୍ଟି ସୁଦୃଢ଼ ହେଉଛି । ଆପ୍ ଏବେ ୧୦ ବର୍ଷର ଛୁଆ, ଛୋଟ ଛୁଆ ଏତେ ବଡ଼ ଦଳର ନାକ ରଗଡ଼ି ସାରିଲାଣି । ଆପ୍ ସେମାନଙ୍କୁ ଶୋଇବାକୁ ଦେଉନି । ତାଙ୍କ ସ୍ୱପ୍ନରେ ଆପ୍ ନେତା ଭୂତ ହୋଇ ଆସୁଛନ୍ତି ।
କେଜ୍ରିୱାଲ୍ କହିଛନ୍ତି, ପଞ୍ଜାବରେ ଆମ୍ ଆଦମୀ ପାର୍ଟି ଯାହା କାମ କରୁଛି, ତାକୁ ରୋକା ଯାଉଛି । ସେଠି ଦିଲ୍ଲୀରେ ବି ଆମକୁ ଅଟକାଉଛନ୍ତି । ଆମ ସରକାର ଯାହା କରିବା ପାଇଁ ଚାହୁଁଛି କରିବାକୁ ଦିଆ ଯାଉ ନାହିଁ । ଆମେ ଛୋଟ ଦଳ ହୋଇ ୧୦ ବର୍ଷରେ ୨ ରାଜ୍ୟରେ କ୍ଷମତାକୁ ଆସିଛୁ । ପଞ୍ଜାବ ଓ ଦିଲ୍ଲୀରେ ସରକାର ଗଢ଼ିଛୁ ।
ଗୁଜରାଟ ଓ ଗୋଆରେ ଆପ୍ ବିଧାୟକ ଅଛନ୍ତି । ଯେଉଁଠି ଲଢ଼ୁଛୁ, ଭୋଟ୍ ମିଳୁଛି । ଏବେ ବିଜେପି ଡରୁଛି କାଳେ କେବେ କେନ୍ଦ୍ରରେ ଆପ୍ ସରକାର ଗଢ଼ି ଦେବ । କେଜ୍ରିୱାଲ୍ କହିଛନ୍ତି, ବିଜେପି ୩୦ ବର୍ଷ ହେଲା ଗୁଜରାଟ, ୧୫ ବର୍ଷ ଧରି ମଧ୍ୟପ୍ରଦେଶରେ ସରକାରରେ ରହିଛି । କିନ୍ତୁ ଭିତ୍ତିଭୂମି ବଦଳୁନି । ଗୋଟିଏ ବିଦ୍ୟାଳୟକୁ ଠିକ୍ କରି ପାରୁ ନାହାନ୍ତି । ଯଦି ସାହାସ ଅଛି, କାମ କରି ଦେଖାଅ ବୋଲି କହିଛନ୍ତି କେଜ୍ରିୱାଲ୍ ।
