ଓ୍ବାଶିଂଟନ ଡିସି: ଆମେରିକା ରାଷ୍ଟ୍ରପତି ଜୋ ବାଇଡେନ୍ ଚୀନ୍ ରାଷ୍ଟ୍ରପତି ସି ଜିନିପିଙ୍ଗକୁ ‘ଏକଛତ୍ରବାଦୀ ଶାସକ’ ବୋଲି କହିଛନ୍ତି । ଏପିଇସି ସମ୍ମିଳନୀରେ ଦୁଇ ନେତାଙ୍କ ମଧ୍ୟରେ ୪ ଘଣ୍ଟାର ଆଲୋଚନା ପରେ ଜିନପିଙ୍ଗଙ୍କୁ ନେଇ ଏଭଳି କହିଛନ୍ତି ବାଇଡେନ୍ । ଦୀର୍ଘ ଘଣ୍ଟାର ଆଲୋଚନା ପରେ ଆପଣ ଏବେ ବି ସି ଜିନିପିଙ୍ଗଙ୍କୁ ଏକଛତ୍ରବାଦୀ ଶାସକ ବୋଲି ଭାବୁଛନ୍ତି କି ବୋଲି ବାଇଡେନଙ୍କୁ ପ୍ରଶ୍ନ କରାଯାଇଥିଲା । ଏହାର ଉତ୍ତରରେ ବାଇଡେନ୍ କହିଛନ୍ତି, ‘ହଁ ସେ ଡିକ୍ଟାଟର (ଏକଛତ୍ରବାଦୀ ଶାସକ)’ । ସେ ଆହୁରି କହିଛନ୍ତି ଯେ, ଜିନିପଙ୍ଗଙ୍କୁ ଏକଛତ୍ରବାଦୀ ଶାସକ କହିବାର ଅର୍ଥ ସେ ଏମିତି ଜଣେ ନେତା ଯିଏକି ଚଳାଉଥିବା ଦେଶ କମ୍ୟୁନିଷ୍ଟ ଶାସିତ । ଅର୍ଥାତ ଚୀନ୍ ସରକାର ଆମମାନଙ୍କ ଠାରୁ ବିଲକୁଲ ଭିନ୍ନ ।
ଏହା ପୂର୍ବରୁ ବାଇଡେନ୍ ଏବଂ ଜିନିପିଙ୍ଗଙ୍କ ମଧ୍ୟରେ ବିଭିନ୍ନ ପ୍ରସଙ୍ଗ ଉପରେ ଆଲୋଚନା ହୋଇଛି । କାଲିଫର୍ଣ୍ଣିଆର ଏକ ହୋଟେଲରେ ହୋଇଥିବା ଏହି ଆଲୋଚନାକୁ ନେଇ ଏବେ ସମଗ୍ର ବିଶ୍ବରେ ଚର୍ଚ୍ଚା ଲାଗିରହିଛି । ବାଇଡେନ୍ ଏବଂ ଜିନିପିଙ୍ଗ ଉଭୟ ଦେଶରେ ଲାଗିରହିଥିବା ମତ ପାର୍ଥକ୍ୟକୁ କମ କରିବା ସହ ସଂପର୍କକୁ ସୁଦୃଢ଼ କରିବାକୁ ରାଜି ହୋଇଛନ୍ତି । ଦୁଇ ବିକଶିତ ରାଷ୍ଟ୍ରର ରାଷ୍ଟ୍ରପତିଙ୍କ ଏହି ଆଲୋଚନା ମୁକ୍ତ ଢ଼ଙ୍ଗରେ ହୋଇଛି । ଦୁଇ ନେତାଙ୍କ ମଧ୍ୟରେ ଖୋଲାଖୋଲି ଆଲୋଚନା ହୋଇଥିବା ନେଇ ବାଇଡେନଙ୍କ ପ୍ରଶାସନର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।
ଏହି ବୈଠକରେ ଦୁଇ ନେତା ଦ୍ବିପାକ୍ଷିକ ସମ୍ବନ୍ଧ, ଆଞ୍ଚଳିକ ଏବଂ ମୁଖ୍ୟ ଅନ୍ତର୍ଜାତୀୟ ପ୍ରସଙ୍ଗ ଉପରେ ଆଲୋଚନା କରିଛନ୍ତି । ମଧ୍ୟପ୍ରାଚ୍ୟରେ ଉପୁଜିଥିବା ସଂକଟ, ୟୁକ୍ରେନ୍, ତାଇଓ୍ବାନ, ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଆର୍ଥିକ ପ୍ରସଙ୍ଗ ଉପରେ ଆଲୋଚନା ହୋଇଥିବା ବେଳେ ଆର୍ଟିଫିସିଆଲ ଇଣ୍ଟେଲିଜେନ୍ସ, ଡ୍ରଗ୍ସ ଏବଂ ଜଳବାୟୁ ପରିବର୍ତ୍ତନକୁ ନେଇ କଥା ହୋଇଛନ୍ତି ବାଇଡେନ୍ ଓ ଜିନପିଙ୍ଗ । ତେବେ ବାଇଡେନ୍ଙ୍କ ଅପିଲ କ୍ରମେ ଆମେରିକାରେ ଡ୍ରଗ୍ସ କାରବାର କରୁଥିବା ଚୀନ୍ କମ୍ପାନୀଗୁଡ଼ିକ ଉପରେ କାର୍ଯ୍ୟାନୁଷ୍ଠାନ ପାଇଁ ଜିନପିଙ୍ଗ ରାଜି ହୋଇଥିବା ଜଣାପଡ଼ିଛି ।
ଅନ୍ୟପଟେ ଦୁଇ ଦେଶ ମଧ୍ୟରେ ସୈନ୍ୟ ସ୍ତରୀୟ ଆଲୋଚନା ଆରମ୍ଭ ହେବା ଉପରେ ଦୁଇ ନେତା ରାଜି ହୋଇଛନ୍ତି । ଏହା ସହ ଦୁଇ ନେତା ଏବେ ପରଷ୍ପର ସହ ଫୋନ୍ରେ କଥା ହେବେ ବୋଲି ଜଣାପଡ଼ିଛି । ବାଇଡେନ୍ କଲ କଲେ ଜିନିପିଙ୍ଗ କଥା ହେବେ ଏବଂ ଜିନପିଙ୍ଗ ଫୋନ୍ କଲେ ଏଣିକି ବାଇଡେନ୍ କଥା ହେବେ। ଏହା ହିଁ ଉନ୍ନତ୍ତିର ପ୍ରକୃତ ମାଧ୍ୟମ ହୋଇପାରିବ ବୋଲି ବୈଠକ ପରେ ଆୟୋଜିତ ସାମ୍ବାଦିକ ସମ୍ମିଳନୀରେ କହିଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ୍ ।
