ଟାଙ୍ଗୀ, ୦୧/୦୯ : ଜଙ୍ଗଲରେ ଜୁଆ ଆଡ୍ଡା ଚାଲିଥିବା ବେଳେ ପୋଲିସର ଚଢାଉ। ଗୁରୁବାର ବିଳମ୍ବିତ ରାତିରେ ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା କମାଗୁରୁ ବେଲପଦା ଠାରେ ଜୁଆ ଖେଳ ଚାଲିଥିବା ବେଳେ ଜଙ୍କିଆ ପୋଲିସ ଚଢାଉ କରିଥିଲା। ଏହି ସମୟରେ ୫ ଜୁଆଡ଼ିଙ୍କୁ ଗିରଫ କରାଯିବା ସହିତ ସେମାନଙ୍କ ନିକଟରୁ ୨୭୯୦ ଟଙ୍କା, ୧୦ଟି ବାଇକ, ମୋବାଇଲ ଫୋନ୍  ଜବତ ହୋଇଛି।

ସୂଚନାନୁଯାୟୀ, ଜଙ୍କିଆ ଥାନା ଅନ୍ତର୍ଗତ କମାଗୁରୁ ବେଲପଦା ଠାରେ ଜୁଆ ଖେଳ ଚାଲିଥିବା ନେଇ ପୋଲିସ କୌଣସି ସୁତ୍ରରୁ ଖବର ପାଇଥିଲା। ଖବର ପାଇ ପୋଲିସ ଘଟଣାସ୍ଥଳରେ ରେଡ୍ କରିଥିଲା। ଘଟଣାସ୍ଥଳରୁ ୫ ଜୁଆଡିଙ୍କୁ କାବୁ କରାଯାଇଥିବା ବେଳେ ଆଉ ୫ ଜୁଆଡ଼ି ଖସି ପଳାଇଥିଲେ। ତେବେ ପୋଲିସ ସେମାନଙ୍କ ବାଇକ ଜବତ କରିଛି । ଗିରଫ ଜୁଆଡି ମାନେ ହେଲେ ଟାଙ୍ଗୀ ଥାନା ଓ କଣାସ ଥାନା ଅଞ୍ଚଳର ଯୁଧିଷ୍ଠିର ନାୟକ, କାଳୁ କୁମାର ଦାଶ, ମାନସ ପ୍ରଧାନ, ସଂଗ୍ରାମ ଛୋଟରାୟ ଓ କୁମର ରାଉତ। ଏନେଇ ଜଂକିଆ ଥାନାରେ ୨୮୯/୨୩ ରେ ଏକ ମାମଲା ରୁଜୁ ହୋଇ ତଦନ୍ତ ଚାଲିଥିବା ସୂଚନା ଦେଇଛନ୍ତି ଥାନା ନିରୀକ୍ଷକ।