ବାହାନଗା,୦୫/୦୨: ବାହାନଗା ବ୍ଲକ କସବାଜୟପୁର ପଞ୍ଚାୟତ ଜିରତାଳ ଗ୍ରାମର ଯୁବକ ମହେଶ୍ୱର ମଲିକ ମହାନତା ଦେଖାଇଛନ୍ତି । ପ୍ରେମ କେବେ, କେଉଁଠି, କେତେବେଳେ ହୋଇଥାଏ ତାହା ସମସ୍ତଙ୍କୁ ଅଗୋଚର । ଜାତି, ଗୋତ୍ର ବି ଦେଖେନା । ଯାହାକି ଦେଖିବାକୁ ମିଳିଛି ଜିରତାଳ ଗ୍ରାମରେ ।
କୋଚିଆକୋଇଲି ଗ୍ରାମର ବାବୁ ମଲିକଙ୍କ ଝିଅ ରୁକ୍ମିଣୀ ମଲିକ ଜନ୍ମରୁ ମୂକ-ବଧିର । ଦୁଇ ବର୍ଷ ପୂର୍ବେ ଏକ ବିବାହ ଉତ୍ସବରେ ମହେଶ୍ୱରଙ୍କ ସହ ରୁକ୍ମିଣୀଙ୍କର ଦେଖା ହୋଇଥିଲା । ଠରାଠରିରୁ ପରସ୍ପରଙ୍କ ମଧ୍ୟରେ ଗଢି ଉଠିଲା ପ୍ରେମ ସମ୍ପର୍କ । ଉଭୟ ପରିବାର ଲୋକ ଜାଣିବା ପରେ ସମସ୍ତଙ୍କ ସହମତି କ୍ରମେ ରୀତିନୀତି ଅନୁସାରେ ରବିବାର ଉଭୟ ବିବାହ ବନ୍ଧନରେ ବାନ୍ଧି ହେଲେ । ବାହାନଗାସ୍ଥିତ ଲକ୍ଷ୍ମୀନାରାୟଣ ଦୁର୍ଗା ମନ୍ଦିରରେ ଉଭୟ ପରିବାରର ସମସ୍ତ ସଦସ୍ୟଙ୍କ ଉପସ୍ଥିତିରେ ବିବାହ ସମ୍ପନ୍ନ ହୋଇଛି । ମହେଶ୍ୱର, ରୁକ୍ମିଣୀଙ୍କୁ ଗ୍ରାମବାସୀମାନେ ଆଶୀର୍ବାଦ କରିଛନ୍ତି ।