ଅନୁଗୁଳ, ୦୩/୦୩: ଅନୁଗୁଳ ବ୍ଲକ୍ ତଥା ବନ୍ତଳା ଥାନା ନୂଆଭୂଇଁ ଗ୍ରାମରେ ଏକ ଜଘନ୍ୟ ହତ୍ୟାକାଣ୍ଡ ଘଟିଛି । ଶୁକ୍ରବାର ରାତିରେ ବାପାକୁ ଠେଙ୍ଗାରେ ପିଟି ହତ୍ୟା କରିବା ପରେ ସକାଳୁ ଅଭିଯୁକ୍ତ ପୁଅ କେଉଁଆଡ଼େ ଫେରାର୍ ହୋଇଯାଇଛି । ଶନିବାର ସନ୍ଧ୍ୟାରେ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛି ।
ମିଳିଥିବା ସୂଚନା ଅନୁଯାୟୀ, ନୂଆଭୂଇଁ ଗ୍ରାମର ବଳରାମ ଭୋଇ ଓ ତାଙ୍କ ବାପା ବିପ୍ରବର ଭୋଇ ଏକାଠି ରହୁଥିଲେ । ଅନେକ ସମୟରେ ବାପ- ପୁଅଙ୍କ ମଧ୍ୟରେ ପାଟିତୁଣ୍ଡ ହୋଇଥାଏ । ବଳରାମ ବାପା ବିପ୍ରବରଙ୍କୁ ମାଡ଼ପିଟ୍ କରିଥାନ୍ତି । ଶୁକ୍ରବାର ସନ୍ଧ୍ୟାରେ ମଧ୍ୟ ବଳରାମ ତାଙ୍କ ବାପାଙ୍କ ସହିତ ଝଗଡ଼ା କରିବା ସହ ମାଡ଼ପିଟ୍ କରିଥିଲେ । ଶନିବାର ସକାଳୁ ବଳରାମଙ୍କର ଦେଖାନଥିବା ବେଳେ ବିପ୍ରବର ମଧ୍ୟ ଘରୁ ବାହାରିନଥିଲେ । ସନ୍ଧ୍ୟାରେ ତାଙ୍କ ମୃତଦେହ ଘର ଭିତରେ ପଡ଼ିଥିବା ଗାଁ’ ଲୋକ ଦେଖିଥିଲେ ।
