ରାଞ୍ଚି: ଝାଡ଼ଖଣ୍ଡର ରାଜନୀତିରେ ହାଇଡ୍ରାମା ଜାରି ରହିଛି । ଜେଏମଏମ ବିଧାୟକ ଚମ୍ପାଇ ସୋରେନ ଦୁଇ ଦୁଇ ଥର ରାଜ୍ୟପାଳଙ୍କୁ ଅନୁରୋଧ କରିଥିଲେ ହେଁ ଏଯାଏଁ ରାଜଭବନରୁ ଆମନ୍ତ୍ରଣ ଆସିନାହିଁ । ସେପଟେ ଘୋଡ଼ା ବେପାର ଭୟରେ ମହାମେଣ୍ଟର ବିଧାୟକ ରାଞ୍ଚିରୁ ହାଇଦ୍ରାବାଦ ଚାଲିଯିବାକୁ ପ୍ରସ୍ତୁତ ହେଉଥିଲେ। ହେଲେ ସବୁକିଛି ବିଗାଡ଼ି ଦେଇଛି ଘନ କୁହୁଡ଼ି ।
ଦୁଇଟି ଚାଟାର୍ଡ ପ୍ଲେନ୍ ରାଞ୍ଚି ଏୟାରପୋର୍ଟରେ ଉଡ଼ାଣ ଭରିବାକୁ ପ୍ରସ୍ତୁତ ଥିବା ବେଳେ କୁହୁଡ଼ି ସମସ୍ତ ବିଧାୟକଙ୍କୁ ନିରାଶ କରିଛି। କାରଣ ବିମାନକୁ ଉଡ଼ାଣ ଲାଗି ଅନୁମତି ମିଳିପାରି ନାହିଁ । ବିମାନ ବାତିଲ ହେବା ପୂର୍ବରୁ ମହାମେଣ୍ଟର ୪୦ରୁ ଅଧିକ ବିଧାୟକ ରାଞ୍ଚିର ସର୍କିଟ ହାଉସରୁ ଏୟାରପୋର୍ଟରେ ପହଞ୍ଚିଥିଲେ । ଏପରିକି ସେମାନେ ବିମାନରେ ମଧ୍ୟ ବସିସାରିଥିଲେ । ହେଲେ ବିମାନ ଉଡ଼ାଣ ବାତିଲ ହେବା ପରେ ସବୁ ବିଧାୟକ ପୁଣି ଥରେ ସର୍କିଟ ହାଉସକୁ ଫେରିଆସିଛନ୍ତି ।
ସେପଟେ ଚମ୍ପାଇ ସୋରେନ ୪ ଜଣ ବିଧାୟକଙ୍କୁ ନେଇ ରାଜ୍ୟପାଳଙ୍କୁ ଭେଟିବା ସହ ସରକାର ଗଢ଼ିବାକୁ ଦାବି କରିଛନ୍ତି । ଏହି ସମୟରେ ତାଙ୍କ ସପକ୍ଷରେ ୪୭ ଜଣ ବିଧାୟକ ଥିବା ନେଇ ଦାବି କରିବା ସହ ୪୩ ବିଧାୟକଙ୍କ ହସ୍ତାକ୍ଷର ଥିବା ଦାବି ପତ୍ର ଦେଇଛନ୍ତି ଚମ୍ପାଇ ସୋରେନ୍ ।
