ୱାଶିଂଟନ ୦୬/୦୨: ଆଗାମୀ ଦିନରେ ମଧ୍ୟପ୍ରାଚ୍ୟ ଅଞ୍ଚଳରେ ଯୁଦ୍ଧ ସ୍ଥିତି ବ୍ୟାପକ ହେବା ଆଶଙ୍କା ଦେଖାଦେଇଛି । ୟେମେନର ହୁତି ବିଦ୍ରୋହୀମାନେ ଲଗାତର ଆକ୍ରମଣ କରୁଥିବା ଯୋଗୁ ଆମେରିକା କ୍ଷୁବ୍ଧ ହୋଇଛି । ହୁତିଙ୍କୁ ସମର୍ଥନ କରୁଥିବା ଦେଶକୁ ଆଦୌ ଛଡ଼ାଯିବ ନାହିଁ ବୋଲି ଏହା ଚେତାବନୀ ଦେଇଛି ।
ଆମେରିକାର ଜାତୀୟ ସୁରକ୍ଷା ଉପଦେଷ୍ଟା (ଏନ୍ଏସ୍ଏ) ଜେକ୍ ସୁଲିଭାନ୍ କହିଛନ୍ତି, ୟେମେନରେ ହୁତିଙ୍କ ଉପରେ ହୋଇଥିବା ଆକ୍ରମଣକୁ ଶେଷ ବୋଲି ଧରିନେବା ଉଚିତ ନୁହେଁ । ଏହା ଆରମ୍ଭ ମାତ୍ର । ଆମେରିକା ନିଜ ଲୋକଙ୍କୁ ବିପଦରେ ପକାଇବାକୁ ଦେବନାହିଁ । ସୁଲିଭାନ୍ଙ୍କ ଏହି ବିବୃତି ଇରାନ ପାଇଁ ବି ସତର୍କଘଣ୍ଟି ବୋଲି କୁହାଯାଉଛି । କାରଣ ଇରାନ୍ ବି ହୁତିଙ୍କୁ ସମର୍ଥନ କରୁଛି । ଇରାନର ନାମ ନ ନେଇ ସେ ଚେତାବନୀ ଦେଇଛନ୍ତି ।
ବ୍ରିଟିଶ ସମ୍ବାଦପତ୍ର ‘ସନ୍’ର ରିପୋର୍ଟ ମୁତାବକ, ସୁଲିଭାନ୍ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କ ଆଭିମୁଖ୍ୟକୁ ଦୃଷ୍ଟିରେ ରଖି ଏହା କହିଛନ୍ତି । ଇରାନ ଉପରେ ଆମେରିକା ଆକ୍ରମଣ କରିପାରେ କି ବୋଲି ପ୍ରଶ୍ନର ଉତ୍ତରରେ ସୁଲିଭାନ୍ କହିଛନ୍ତି, ଏହା ଅନ୍ତ ନୁହେଁ, ବରଂ ଆରମ୍ଭ । ତାଙ୍କର ଏଭଳି ବୟାନ ବିଶେଷ ଗୁରୁତ୍ୱ ରଖୁଛି । କାରଣ ଆମେରିକା ଲୋହିତ ସାଗରରେ କୌଣସି ଜାହାଜକୁ ଟାର୍ଗେଟ୍ ନ କରୁ ବୋଲି ରବିବାର ଇରାନ ଧମକ ଦେଇଥିଲା । ଇରାନ୍ର ଏଭଳି ଧମକ ପରେ ଆମେରିକା ୟେମେନରେ ଥିବା ହୁତି ବିଦ୍ରୋହୀଙ୍କ ଶିବିର ଉପରେ ଏୟାର ଷ୍ଟ୍ରାଇକ୍ କରିଥିଲା । ଏଥିରେ ବ୍ରିଟିଶ ନୌସେନା ମଧ୍ୟ ଆମେରିକାକୁ ସହଯୋଗ କରିଥିଲା ।
