ନୂଆଦିଲ୍ଲୀ,୦୫/୦୯: ରୁଷ୍‌ ସହ ଯୁଦ୍ଧ ଭିତରେ ୟୁକ୍ରେନ୍‌ ରାଷ୍ଟ୍ରପତି  ଭୋଲୋଡିମିର ଜେଲେନ୍‌ସ୍କି ଦେଶର ପ୍ରତିରକ୍ଷା ମନ୍ତ୍ରୀ ଓଲେକ୍ସି ରେଜନିକୋଭଙ୍କୁ ହଟାଇଛନ୍ତି । ରୁଷ୍‌-ୟୁକ୍ରେନ୍‌ ଯୁଦ୍ଧ  ଆରମ୍ଭ ହେବାର ୩ ମାସ ପୂର୍ବରୁ ଅର୍ଥାତ ୨୦୨୧ ନଭେମ୍ବରରୁ ଓଲେକ୍ସି ପ୍ରତିରକ୍ଷା ମନ୍ତ୍ରୀ ହୋଇଥିଲେ । ତାଙ୍କ ସ୍ଥାନରେ ଏବେ ପୂର୍ବତନ ସାଂସଦ ରୁସ୍ତମ  ଉମେରୋଭ୍‌ ଦାୟିତ୍ୱ ନେବେ । 

ଟେଲିଗ୍ରାମ  ଆକାଉଣ୍ଟରେ ଜେଲେନ୍‌ସ୍କି ଏହି ଘୋଷଣା  କରି କହିଛନ୍ତି, ରେଜନିକୋଭ୍‌ ଯୁଦ୍ଧର  ୫୫୦ ଦିନ ପର୍ଯ୍ୟନ୍ତ ମନ୍ତ୍ରଣାଳୟ ଭାର ସମ୍ଭାଳିଛନ୍ତି । ଏବେ ନୂତନ ଆଭିମୁଖ୍ୟର  ଆବଶ୍ୟକତା ରହିଛି । ରେଜନିକୋଭ୍‌ଙ୍କ  ନେତୃତ୍ୱରେ ରୁଷ୍‌ର ସାମ୍ନା କରିବା ଲାଗି  ପାଶ୍ଚାତ୍ୟ ଦେଶଗୁଡ଼ିକରୁ ୟୁକ୍ରେନ୍‌କୁ  ବେଶ୍‌ ସହାୟତା ମିଳିଛି । ୪୧ ବର୍ଷୀୟ  ଉମେରୋଭ୍‌ ରୁଷ୍‌-ୟୁକ୍ରେନ୍‌ ଯୁଦ୍ଧ  ଆରମ୍ଭରେ ଶାନ୍ତି ଆଲୋଚନାବେଳେ ୟୁକ୍ରେନ୍‌ରୁ ପ୍ରତିନିଧିତ୍ୱ କରିଥିଲେ ।  ଉମେରୋଭ୍‌ କ୍ରିମିଆନ୍‌ ତାତର  କମ୍ୟୁନିଟିର ଜଣେ ସଦସ୍ୟ ।