କୋରାପୁଟ, ୦୮/୧୧ : ଘର ଭିତରୁ ମନ୍ଦିର ପୂଜକଙ୍କ ହାତ ଗୋଡ଼ ବନ୍ଧା ଅବସ୍ଥାରେ ମୃତଦେହ ଉଦ୍ଧାର। କୋରାପୁଟ ଟାଉନ୍ ଥାନା ଅଧୀନ ବାଟମଙ୍ଗଳା ଛକ ନିକଟସ୍ଥ ବୁଢ଼ୀ ଠାକୁରାଣୀ ମନ୍ଦିର ପଛପଟେ ଥିବା ପୂଜକଙ୍କ ଘର ଭିତରୁ ମୃତଦେହ ଉଦ୍ଧାର ହୋଇଛି। ଘରର ଆସବାବପତ୍ର ଏଣେତେଣେ ପଡ଼ିଥିବାରୁ ଏହା ହତ୍ୟାକାଣ୍ଡ ବୋଲି ସନ୍ଦେହ କରାଯାଉଛି। ଖବର ପାଇ ଘଟଣାସ୍ଥଳରେ କୋରାପୁଟ ପୋଲିସ ପହଞ୍ଚି ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଛି। ସାଇଣ୍ଟିଫିକ ଟିମ୍ ସହାୟତା ନିଆଯିବ ବୋଲି ପୋଲିସ ସୂଚନା ଦେଇଛି। 

ସୂଚନାନୁଯାୟୀ, ବାଟମଙ୍ଗଳା ଛକ ନିକଟସ୍ଥ ବୁଢ଼ୀ ଠାକୁରାଣୀ ମନ୍ଦିର ପୂଜକ ରମେଶ ଚନ୍ଦ୍ର ତ୍ରିପାଠୀଙ୍କ ମୃତଦେହ ତାଙ୍କ ଘରୁ ଉଦ୍ଧାର ହୋଇଛି। ତାଙ୍କର ହାତ ଓ ଗୋଡ଼କୁ ବନ୍ଧା ଯାଇଥିବା ବେଳେ ଅର୍ଦ୍ଧ ଉଲଗ୍ନ ଭାବେ ସେ ପଡ଼ି ରହିଥିଲେ। ଏହାସହ ଘରର ସାମଗ୍ରୀ ଏଣେତେଣେ ଛିନଛତ୍ର ହୋଇ ପଡିରହିଛି। ଏଣୁ ତାଙ୍କୁ କେହି ହତ୍ୟା କରିଥିବା ପ୍ରାଥମିକ ତଦନ୍ତରୁ ପୁଲିସ ସନ୍ଦେହ କରିଛି। 

ଘଟଣା ସ୍ଥଳରେ ଡିଏସପି ସୁମିତ୍ରା ଜେନା, ଶ୍ରାବଣୀ ନାୟକ ଏବଂ ଟାଉନ୍ ଓ ସଦର ଥାନା ଅଧିକାରୀ ଉପସ୍ଥିତ ରହି ସ୍ଥାନୀୟ ଲୋକଙ୍କୁ ପଚରାଉଚୁରା କରୁଛନ୍ତି। ମୃତ ତ୍ରିପାଠୀଙ୍କ କେହି ସମ୍ପର୍କୀୟ ଏଠାରେ ନଥିବାରୁ ପୁଲିସ ତାଙ୍କ ସମ୍ପର୍କରେ ଅଧିକା ତଥ୍ୟ ସଂଗ୍ରହ କରିପାରୁନି।