ଭୁବନେଶ୍ୱର, ୧୮।୯: ସେପ୍ଟେମ୍ବର ୧୭ । ଜନ୍ମଦିନରେ ଜନତା ମଇଦାନକୁ ଆସିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଯାହାକୁ ସମସ୍ତେ ଅପେକ୍ଷା କରି ରହିଥିଲେ । ଶେଷରେ ସେହି ପ୍ରତୀକ୍ଷିତ ମୁହୂର୍ତ୍ତ ଆସିଲା । ମୋଦି ଆସି ସୁଇଚ୍ ଟିପିବା ମାତ୍ରେ ୨୫ଲକ୍ଷ ମହିଳାଙ୍କ ଆକାଉଣ୍ଟକୁ ଚୁଟ୍କିରେ ଆସିଲା ‘ସୁଭଦ୍ରା’ ଯୋଜନାର ପ୍ରଥମ କିସ୍ତି ଟଙ୍କା । ଏହାକୁ ନେଇ ମହିଳାଙ୍କ ଭିତରେ ଖୁସି କାହିଁରେ କ’ଣ । ସବୁଠି ଖୁସିର ଲହରୀ ଖେଳି ଯାଇଥିଲା । ଆଜି ସକାଳୁ ମଧ୍ୟାହ୍ନ ଯାଏ ଜନତା ମଇଦାନରେ ସୁଭଦ୍ରାକୁ ନେଇ ଅଭୂତପୂର୍ବ ଉତ୍କଣ୍ଠା ଦେଖିବାକୁ ମିଳିଥିଲା । କାର୍ଯ୍ୟକ୍ରମ ଆରମ୍ଭବେଳେ ବର୍ଷା ବାଧା ଦେଇଥିଲେ ବି ମହିଳାଙ୍କ ଉତ୍ସାହ କାଣିଚାଏ ଊଣା ହୋଇନଥିଲା । ଭୋର୍ରୁ ରାଜଧାନୀରେ ଭିଡ଼ ଆରମ୍ଭ ହୋଇଯାଇଥିଲା ।
ନବରଙ୍ଗପୁର, କଳାହାଣ୍ଡି, ବଲାଙ୍ଗୀର, ଗଞ୍ଜାମ, କୋରାପୁଟ, ମାଲକାନଗିରି, ମୟୂରଭଞ୍ଜ, ରାୟଗଡ଼ା, କେନ୍ଦୁଝର, ନୂଆପଡ଼ା, ଫୁଲବାଣୀ, ବୌଦ୍ଧରୁ ବସ୍ ଯୋଗେ ସୁଭଦ୍ରା ହିତାଧିକାରୀମାନଙ୍କୁ ଅଣାଯାଇଥିଲା । ରାତି ପାହିବା ଆଗରୁ ସେମାନଙ୍କ ବସ୍ ଆସି ସାଲିଆ ସାହି-ଉତ୍କଳ ହସ୍ପିଟାଲ ରାସ୍ତା ପାଶ୍ୱର୍ରେ ଅଟକିଥିଲା । ଉପକୂଳବର୍ତ୍ତୀ ସବୁ ଜିଲ୍ଲାରୁ ବସ୍ ଆସି ସକାଳୁ ସକାଳୁ ପହଞ୍ଚିଥିଲା । ଏ ସବୁ ସ୍ଥାନରୁ ଆସିଥିବା ବସ୍ଗୁଡ଼ିକ ସପ୍ତମ ବାଟାଲିୟନ ପଡ଼ିଆରେ ପାର୍କିଂ କରିଥିଲେ । ବଡ଼ ଏସି ବସ୍ ଓ ପ୍ରିମିୟମ ବସ୍ରେ ମହିଳାଙ୍କୁ ଅଣାଯାଇଥିଲା । ସମସ୍ତେ ଜଳଖିଆ ଖାଇବା ପରେ ଜନତା ମଇଦାନ ସମାବେଶସ୍ଥଳକୁ ମୁହାଁଇଥିଲେ । ସକାଳ ୯ଟା ସୁଦ୍ଧା ଜନତା ମଇଦାନର ଅଧା ଚେୟାର ପୂରି ଯାଇଥିଲା । ୧୧ଟା ବେଳକୁ ସବୁ ଚେୟାରରେ ମହିଳାମାନେ ବସି ସାରିଥିଲେ ।
ସମସ୍ତେ ମୁଣ୍ଡରେ ସୁଭଦ୍ରା ଲୋଗୋ ଥିବା ଟୋପି ପିନ୍ଧିବା ସହ ବ୍ୟାଚ୍ ଲଗାଇଥିଲେ । ପ୍ରଧାନମନ୍ତ୍ରୀ ମୋଦି ମଞ୍ଚକୁ ଆସିବା ମାତ୍ରେ ମହିଳାମାନେ ଛିଡ଼ା ହୋଇ ମୋଦି...ମୋଦି...ନାରାରେ ମଇଦାନ କମ୍ପାଇଥିଲେ । ମୋଦି ହାତ ହଲାଇ ଓ ପ୍ରଣାମ ହୋଇ ମା’ମାନଙ୍କୁ ସମ୍ମାନ ଜଣାଇଥିଲେ । ସମାବେଶ ସ୍ଥଳରେ ମୋଦି ପହଞ୍ଚିବା ପରେ ବର୍ଷା ଛେଚିଥିଲା । ପ୍ରବଳ ବର୍ଷାରେ ହ୍ୟାଙ୍ଗରର କିଛି ଜାଗାରୁ ପାଣି ଗଳିଥିଲା । ପଡ଼ିଆ ସାରା କାଦୁଅ ପଚପଚ ହୋଇଥିଲା । ଲୋକଙ୍କ ଚେୟାର ତଳେ ପାଣି ହୋଇ ଯାଇଥିଲା । ମହିଳାମାନେ ଗୋଡ଼ ଉପରକୁ କରି ବସିଥିଲେ । ଲଗାଣ ବର୍ଷା ଯୋଗୁ ସାଧାରଣ ଦର୍ଶକ ସମେତ ଭିଭିଆଇପି ଗ୍ୟାଲେରୀ, ନିମନ୍ତ୍ରିତ ଦର୍ଶକ ଗ୍ୟାଲେରୀ ଓ ଅଫିସର ଗ୍ୟାଲେରୀରେ ବସିଥିବା ଲୋକେ ଗୋଡ଼ ଟେକି ବସିବାକୁ ବାଧ୍ୟ ହୋଇଥିଲେ । କିଛି ସମୟ ପାଇଁ ଲାଗିଥିବା ଏଲ୍ଇଡି ସ୍କ୍ରିନ୍ କଟି ଯାଇଥିଲା ।
