ନୂଆଦିଲ୍ଲୀ ୨୪/୦୩: ଏସ୍ଏସ୍ ରାଜାମୌଲିଙ୍କ ନିର୍ଦ୍ଦେଶିତ ଫିଲ୍ମ ‘ଆର୍ଆର୍ଆର୍’କୁ ଜାପାନରେ ବେଶ୍ ପ୍ରଶଂସା ମିଳୁଛି । ବିଗତ ଦେଢ଼ ବର୍ଷ ହେଲା ଏହା ଜାପାନର ଥିଏଟରଗୁଡ଼ିକରେ ପ୍ରଦର୍ଶିତ ହେଉଛି । ନିକଟରେ ସେଠାକାର ଏକ ପ୍ରସିଦ୍ଧ ଥିଏଟର କଂପାନି ‘ଆର୍ଆର୍ଆର’କୁ ମ୍ୟୁଜିକାଲ୍ ଡ୍ରାମା ଭାବେ ପରିବେଷଣ କରିଥିଲା । ତାକୁ ଦେଖିବାକୁ ଫିଲ୍ମନିର୍ମାତା ରାଜାମୌଲି ନିଜେ ସେଠାରେ ଉପସ୍ଥିତ ରହିଥିଲେ ।
ଏ ସଂପର୍କରେ ଏକ ଟ୍ୱିଟ୍ କରି ରାଜାମୌଲି କହିଛନ୍ତି, ଜାପାନର ୧୦୦ ବର୍ଷ ପୁରୁଣା ଥିଏଟର କଂପାନି ତାକାରାଜୁକା ‘ଆର୍ଆର୍ଆର୍’କୁ ମ୍ୟୁଜିକାଲ୍ ଡ୍ରାମା ଭାବେ ପରିବେଷଣ କରିଛି । ତାକାରାଜୁକା ଜାପାନର ଏକ ମହିଳା ମ୍ୟୁଜିକାଲ୍ ଥିଏଟର ଟ୍ରୁପ୍ । ‘ଆର୍ଆର୍ଆର’କୁ ଡ୍ରାମା ଭାବେ ପରିବେଷଣ କରାଯିବା ଆମ ଲାଗି ଗର୍ବର କଥା । ଏହି ନାଟକକୁ ବି ଫିଲ୍ମ ଭଳି ଭଲପାଇବା ଦେଇଥିବାରୁ ଜାପାନବାସୀଙ୍କ ନିକଟରେ ମୁଁ କୃତଜ୍ଞ । ଶୋ’ରେ ସମସ୍ତ ମହିଳା କଳାକାର ଅଦ୍ଭୁତପୂର୍ବ ଶକ୍ତି ଓ ପ୍ରତିଭା ପ୍ରଦର୍ଶନ କରିଥିବା ସେ ପ୍ରକାଶ କରିଛନ୍ତି ।
Its an honour that our RRR has been adapted as a musical by the 110 year old Takarazuka company. Thank you Japanese audience for embracing the Broadway play of RRR just like the film itself. Overwhelmed by your response... Can't appreciate all the girls enough for your energy,… pic.twitter.com/QbfLPmsJxC
— rajamouli ss (@ssrajamouli) March 22, 2024
ରାଜାମୌଲି ମଧ୍ୟ ସୋସିଆଲ୍ ମିଡିଆରେ ଏହି କାର୍ଯ୍ୟକ୍ରମ ସହ ଜଡି଼ତ ଫଟୋ ଓ ଭିଡିଓକୁ ଶେୟାର କରିଛନ୍ତି । ସେଥିରେ ତାଙ୍କୁ ଦର୍ଶକଙ୍କ ମଧ୍ୟରେ ଛିଡ଼ା ହୋଇ ସେମାନଙ୍କର ଅଭିବାଦନ ଗ୍ରହଣ କରୁଥିବା ଦେଖିବାକୁ ମିଳୁଛି । ଅନ୍ୟ ଏକ ଫଟୋରେ ସେ ଥିଏଟର ଗ୍ରୁପର ସଦସ୍ୟମାନଙ୍କ ସହିତ ନଜର ଆସୁଛନ୍ତି । ରାମଚରଣ, ଜୁନିଅର ଏନ୍ଟିଆର, ଅଜୟ ଦେବଗନ ଓ ଆଲିୟା ଭଟ୍ଟଙ୍କ ଅଭିନୀତ ଫିଲ୍ମ ‘ଆର୍ଆର୍ଆର୍’ ୨୦୨୨ ମସିହା ମାର୍ଚ୍ଚ ୨୨ ତାରିଖରେ ସାରା ବିଶ୍ୱରେ ରିଲିଜ୍ ହୋଇଥିଲା । ତେବେ ଜାପାନରେ ଏହାକୁ ସେହିବର୍ଷ ଅକ୍ଟୋବର ମାସରେ ରିଲିଜ୍ କରାଯାଇଥିଲା । ସେତେବେଳେ ଫିଲ୍ମର ପ୍ରମୋସନ୍ ଲାଗି ରାଜାମୌଲି, ଜୁନିଅର ଏନ୍ଟିଆର ଓ ରାମଚରଣ ଜାପାନ ଯାଇଥିଲେ । ସେବେଠାରୁ ବିଗତ ଦେଢ଼ ବର୍ଷ ହେଲା ଏହି ଫିଲ୍ମ ସେଠାକାର ଥିଏଟରଗୁଡ଼ିକରେ ଚାଲୁଛି ।
