ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧୀଙ୍କ ଶକ୍ତି ବିରୁଦ୍ଧରେ ଲଢ଼େଇ ମନ୍ତବ୍ୟକୁ ନେଇ ବୁଧବାର ନିର୍ବାଚନ ଆୟୋଗଙ୍କ ଦ୍ବାରସ୍ଥ ହୋଇଛି ବିଜେପି । ରାହୁଲ ଗାନ୍ଧୀ କ୍ଷମା ମାଗନ୍ତୁ ବୋଲି ବିଜେପି ଦାବି କରିଛି । କେନ୍ଦ୍ରମନ୍ତ୍ରୀ ଏବଂ ବିଜେପିର ବରିଷ୍ଠ ନେତା ହରଦୀପ ସିଂହ ପୁରୀ ନିର୍ବାଚନ ଆୟୋଗଙ୍କ ପାଖରେ ଅଭିଯୋଗ କରିବା ପରେ କହିଛନ୍ତି ଯେ, ‘ମୁଁ ରାହୁଲ ଗାନ୍ଧୀଙ୍କ ବୟାନ ପଢ଼ିଛି । ଆପଣ ହିନ୍ଦୁଙ୍କ ଭାବନାଙ୍କୁ ଆଘାତ ଦେଇଛନ୍ତି । ଏମିତି କହିବା ଲଜ୍ଜାଜନକ ।’
ହରଦୀପ ପୁରୀ ନିଜ ଅଭିଯୋଗ ପତ୍ରରେ ଲେଖିଛନ୍ତି ଯେ, ରାହୁଲ ଗାନ୍ଧୀ ହିନ୍ଦୁ ସଂପ୍ରଦାୟଙ୍କ ଧର୍ମୀୟ ଭାବନାକୁ ଆଘାତ ଦେବାକୁ ଚେଷ୍ଟା କରିଛନ୍ତି । ଏହା ସହ ସେ ଇଭିଏମ ବିରୋଧରେ ମଧ୍ୟ ମନ୍ତବ୍ୟ ଦେଇଛନ୍ତି । ରାହୁଲ ଗାନ୍ଧୀ ଏଭଳି ମନ୍ତବ୍ୟ ଦେଇ କେତେକ ଧାର୍ମିକ ସମୁଦାୟଙ୍କୁ ଖୁସି କରିବାକୁ ଚେଷ୍ଟା କରିଛନ୍ତି । ଏହା ଦ୍ବାରା ଦେଶର ଶାନ୍ତିପୂର୍ଣ୍ଣ ପରିବେଶ ଭଙ୍ଗ ହୋଇପାରେ ବୋଲି ସେ ଲେଖିଛନ୍ତି ।
ସୂଚନାଯୋଗ୍ୟ, ଭାରତ ଯୋଡୋ ନ୍ୟାୟ ଯାତ୍ରା ସମାପନ ଅବସରରେ ମୁମ୍ବାଇର ଶିବାଜୀ ପାର୍ମାରେ ଏକ ରାଲିରେ ରାହୁଲ କହିଥିଲେ ଯେ, ‘ହିନ୍ଦୁ ଧର୍ମରେ ଶକ୍ତି ଶବ୍ଦ ରହିଛି । ଆମେ ଶକ୍ତି ବିରୁଦ୍ଧରେ ଲଢ଼େଇ କରୁଛୁ । ଗୋଟିଏ ଶକ୍ତି ସହ ଲଢ଼ୁଛୁ । ଏବେ ପ୍ରଶ୍ନ ଉଠୁଛି ସେହି ଶକ୍ତି କଣ ? କେହି ଜଣେ କହିଲେ ରାଜାଙ୍କ ଆତ୍ମା ଇଭିଏମରେ ରହିଛି । ଏହା ସତ୍ୟ ଯେ, ରାଜାଙ୍କ ଆତ୍ମା ଇଭିଏମରେ ରହିଛି । ହିନ୍ଦୁସ୍ତାନର ସବୁ ସଂସ୍ଥାରେ ରହିଛି, ଇଡିରେ ଅଛି, ସିବିଆଇରେ ଅଛି ଏବଂ ଆୟକର ବିଭାଗରେ ବି ରହିଛି । ’
