ଖଲ୍ଲିକୋଟ, ୧୧/୪ : ଖଲ୍ଲିକୋଟ ଥାନା ଅନ୍ତର୍ଗତ ୧୬ନମ୍ବର ଜାତୀୟ ରାଜପଥର ଡିମିରିଆ ଛକ ନିକଟରେ ଆଜି ସକାଳ ସାଢ଼େ ୯ ଟା ସମୟରେ ଏକ ବୋଲେରୋ ଗାଡ଼ି ଧକ୍କାରେ ଗୋଟିଏ ଫଳ ବୋଝେଇ ଡାଲା ଅଟୋ ଓଲଟି ପଡ଼ିଥିବାବେଳେ ଅଟୋ ଚାଳକ ଗୁରୁତର ହୋଇଛନ୍ତି । 

ସୂଚନା ଅନୁଯାୟୀ,ବ୍ରହ୍ମପୁରରୁ ଭୁବନେଶ୍ୱର ଅଭିମୁଖେ ଆସୁଥିବା ଏକ ବୋଲେରୋ ଗାଡ଼ି ନମ୍ବର ଓଡି ୦୨ ସିକେ ୨୨୭୬ହଠାତ ଡିମିରିଆ ଛକ ନିକଟରେ ଏକ ଫଳ ବୋଝେଇ ଡାଲା ଅଟୋ ନମ୍ବର ଓଡି ୦୭ ଏଚ୍ ୨୦୬୯ପଛକୁ ଧକ୍କା ଦେବା ଫଳରେ ଅଟୋଟି ଓଲଟି ପଡ଼ିଥିଲା । ଫଳରେ ଅଟୋ ଚାଳକ ଗୁରୁତର ହୋଇଥିଲେ ଏବଂ ଚାରିଆଡେ ଫଳ ଗୁଡିକ ବିଛାଡି ହୋଇ ପଡିଥିଲା।ଖବରପାଇ ହାଇୱେ ପାଟ୍ରୋଲିଂ ଏସଆଇ ସିମାଞ୍ଚଳ ସାହୁ ଓ ଡ୍ରାଇଭର ଲିଙ୍ଗରାଜ ବେହେରା ଦୁର୍ଘଟଣାସ୍ଥଳରେ ପହଂଚି ଦୁର୍ଘଟଣା ଘଟାଇ ଥିବା ବୋଲେରୋ ଗାଡ଼ିକୁ ଜବତ କରି ଖଲ୍ଲିକୋଟ ଥାନା ପୋଲିସକୁ ହସ୍ତାନ୍ତର କରିବା ସହ ଗୁରୁତର ଆହତ ଅଟୋ ଚାଳକକୁ ସ୍ଥାନୀୟ ଲୋକଙ୍କ ସହାୟତାରେ ଉଦ୍ଧାର କରି ଚିକିତ୍ସା ପାଇଁ ଖଲ୍ଲିକୋଟ ମେଡ଼ିକାଲକୁ ନେଇ ଯାଇଥିଲେ । ସେଠାରେ  ପ୍ରାଥମିକ ଚିକିତ୍ସା କରାଯାଇ ତାଙ୍କୁ ବ୍ରହ୍ମପୁର ବଡ଼ ମେଡ଼ିକାଲ କୁ ସ୍ଥାନାନ୍ତର କରାଯାଇଛି। ପୋଲିସ ବୋଲେରୋ ଗାଡ଼ିଟିକୁ ଥାନାରେ ଅଟକ ରଖି ଘଟଣାର ତଦନ୍ତ ଚଳାଇଥିବା ସୂଚନା ମିଳିଛି ।