ନୂଆଦିଲ୍ଲୀ,୧୩/୦୫: ଉତ୍ତରପ୍ରଦେଶ ଲୋକସଭା ନିର୍ବାଚନରେ ଯେଉଁ ଗୋଟିଏ ଆସନକୁ ନେଇ ସର୍ବାଧିକ ଆଲୋଚନା ହେଉଛି ତାହା ହେଉଛି କୈସରଗଞ୍ଜର ଆସନ। ଏହାର କାରଣ ଏଠାକାର ସାଂସଦ ବ୍ରିଜ ଭୂଷଣ ଶରଣ ସିଂ ଏବଂ ତାଙ୍କ ଉପରେ ମହିଳା କୁସ୍ତିଯୋଦ୍ଧାଙ୍କ ଯୌନ ଉତ୍ପୀଡ଼ନ ଅଭିଯୋଗ। ସିଂଙ୍କ ଟିକେଟ ବାତିଲ କରାଯାଇଥିଲା କିନ୍ତୁ ତାଙ୍କ ପୁଅ ନିର୍ବାଚନରେ ଅଛନ୍ତି। ବ୍ରିଜଭୂଷଣ ଶରଣ ସିଂ ତାଙ୍କ ବିବୃତ୍ତି ପାଇଁ ଅନେକ ସମୟରେ ହେଡଲାଇନରେ ରହିଆସିଛନ୍ତି। ଗୋଣ୍ଡାରେ ଏକ ସାଧାରଣ ସଭାରେ ବିଜେପି ସାଂସଦଙ୍କ ବିଦ୍ରୋହୀ ମନୋଭାବ ଦେଖିବାକୁ ମିଳିଥିଲା, ଯାହାକୁ ନେଇ ବର୍ତ୍ତମାନ ଚର୍ଚ୍ଚା।
ପୁଅର ପ୍ରଚାର ଅଭିଯାନ ସମୟରେ ସେ ସିଧାସଳଖ ସିଏମ୍ ଯୋଗୀଙ୍କୁ ଟାର୍ଗେଟ କରିଥିଲେ। ବ୍ରିଜ ଭୂଷଣ ଶରଣ ସିଂ କହିଛନ୍ତି ଯେ ସେ ବୁଲଡୋଜର ନୀତିର ବିରୋଧ କରିବେ। ଅତୀତରେ ସେ ବୁଲଡୋଜର ଉପରେ ମଧ୍ୟ ନିଜର ଭିନ୍ନ ମତ ପ୍ରକାଶ କରିଛନ୍ତି। ଏଥର ସିଂ କହିଛନ୍ତି, “କାହାର ଘର ନିର୍ମାଣ କରିବା ଅତ୍ୟନ୍ତ କଷ୍ଟକର ଏବଂ ମୁଁ ସମସ୍ତଙ୍କ ଯନ୍ତ୍ରଣା ଓ ଦରଦ ବୁଝେ, ସେଥିପାଇଁ ବୁଲଡୋଜନର ନୀତିକୁ ମୁଁ ବିରୋଧ କରେ।
ତରବଗଞ୍ଜ ଅଞ୍ଚଳର ସୋନୌଲି ମହମ୍ମଦପୁରରେ ଆୟୋଜିତ ଏକ କାର୍ଯ୍ୟକ୍ରମରେ ସିଂ ଏହା କହିଛନ୍ତି। ତାଙ୍କ ପୁଅ ବିଷୟରେ ସିଂ କହିଛନ୍ତି, “ତାଙ୍କ ପୁଅ ଭାରତୀୟ କୁସ୍ତିଯୋଦ୍ଧା ସଂଘର ସଭାପତି ହେବା ପାଇଁ ସ୍ଥିର କରାଯାଇଥିଲା। କଂଗ୍ରେସ ଷଡଯନ୍ତ୍ର କରିଛି ଏବଂ ବର୍ତ୍ତମାନ ସେ ସାଂସଦ ହେବାକୁ ଯାଉଛନ୍ତି। ” ସୂଚନାଯୋଗ୍ୟ ଯେ ବ୍ରିଜ ଭୂଷଣ ଶରଣ ସିଂ ଉତ୍ତରପ୍ରଦେଶର କୈସିଆରଗଞ୍ଜ ଲୋକସଭା ଆସନରୁ ୬ ଥର ସାଂସଦ ଭାବରେ ନିର୍ବାଚିତ ହୋଇଛନ୍ତି। ଏଥିମଧ୍ୟରୁ ସେ ଭାରତୀୟ ଜନତା ପାର୍ଟି ଟିକେଟରେ ୫ ଥର ଏବଂ ସମାଜବାଦୀ ପାର୍ଟି ନିର୍ବାଚନୀ ଚିହ୍ନରେ ସାଂସଦ ହୋଇଛନ୍ତି।
କୈସରଗଞ୍ଜ ଲୋକସଭା ଆସନରେ ପଞ୍ଚମ ପର୍ଯ୍ୟାୟରେ ମତଦାନ ମେ ୨୦ ତାରିଖରେ ଅନୁଷ୍ଠିତ ହେବ। ଏଥର ବ୍ରିଜ ଭୂଷଣ ଶରଣ ସିଂଙ୍କୁ ନେଇ ବିବାଦ ଥିବାରୁ ଭାରତୀୟ ଜନତା ପାର୍ଟି ତାଙ୍କ ପୁଅ କରଣ ଭୂଷଣ ସିଂଙ୍କୁ ପ୍ରାର୍ଥୀ କରିଛି। କୈସରଗଞ୍ଜ ଆସନ ଅଯୋଧ୍ୟା ନିକଟରେ ଅଟେ ଏବଂ ଏହି ଆସନରେ ଦୀର୍ଘବର୍ଷ ହେବ ବ୍ରିଜ ଭୂଷଣ ଶରଣ ସିଂଙ୍କ ଦବଦବା ରହିଆସିଛି। ସିଂହ ଉତ୍ତରପ୍ରଦେଶର ଠାକୁର ନେତା ଭାବରେ ଜଣାଶୁଣା। ଗତ ବର୍ଷ ତାଙ୍କୁ ଭାରତୀୟ କୁସ୍ତି ମହାସଂଘର ଅଧ୍ୟକ୍ଷ ପଦରୁ ଇସ୍ତଫା ଦେବାକୁ ପଡ଼ିଥିଲା। ସେବେଠାରୁ ସେ ଗୁରୁତର ମାମଲାରେ ବିଚାରର ସମ୍ମୁଖୀନ ହୋଇଥିଲେ।