ନୂଆଦିଲ୍ଲୀ: ଛତିଶଗଡ ବିଧାନସଭା ନିର୍ବାଚନ ଫଳାପଳର ଧାରା ଅନୁଯାୟୀ, ଏଠାରେ ଭାରତୀୟ ଜନତା ପାର୍ଟିର ସରକାର ଗଠନ ହେବା ଏକ ପ୍ରକାର ସ୍ପଷ୍ଟ । ଖବର ଲେଖିବା ପର୍ଯ୍ୟନ୍ତ ଦଳ ୫୫ ଟି ଆସନରେ ଆଗରେ ଥିଲା । ଯେଉଁଠାରେ କଂଗ୍ରେସ ୩୩ ଏବଂ ଅନ୍ୟାନ୍ୟ ମାନେ ୨ ଟି ଆସନରେ ଆଗରେ ରହିଛନ୍ତି । ଏସବୁ ମଧ୍ୟରେ ପ୍ରଶ୍ନ ଉଠିଛି ଯେ ଯଦି ରାଜ୍ୟରେ ବିଜେପି ସରକାର ଗଠନ ହୁଏ, ତେବେ କିଏ ହେବ ମୁଖ୍ୟମନ୍ତ୍ରୀ ?
ରାଜ୍ୟରେ ବରିଷ୍ଠ ବିଜେପି ନେତା ତଥା ପୂର୍ବତନ ସିଏମ ରମଣ ସିଂ ଏହି ପ୍ରସଙ୍ଗରେ ସ୍ପଷ୍ଟ ଭାବେ କହିଛନ୍ତି ଯେ, ନିର୍ବାଚନ ତାଙ୍କ ଅଧୀନରେ ନୁହେଁ ବରଂ ସାମୂହିକ ନେତୃତ୍ୱରେ ହୋଇଛି । ଏଭଳି ପରିସ୍ଥିତିରେ ରମଣ ସିଂ ନିଜେ ଏହି ଦୌଡ଼ରୁ ଓହରି ଯାଇଛନ୍ତି ବୋଲି ବିଶ୍ୱାସ କରାଯାଉଛି । ସେ ଆହୁରି ମଧ୍ୟ କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦୀଙ୍କ ଗ୍ୟାରେଣ୍ଟି ଉପରେ ଜନସାଧାରଣ ବିଶ୍ବାସ କରିଛନ୍ତି ଏବଂ ଭୁପେଶ ବାଘେଲଙ୍କ କଥା ଉପରେ ବିଶ୍ୱାସ କରିନାହାଁନ୍ତି । ପ୍ରଥମ ପର୍ଯ୍ୟାୟର ଧାରାରେ ଏହା ସ୍ପଷ୍ଟ ଭାବରେ ଦୃଶ୍ୟମାନ ହେଉଛି । ନିଶ୍ଚିତ ଭାବେ ବିଜେପି ଜାତୀୟ ନେତୃତ୍ୱର ଆଶୀର୍ବାଦ ପାଇଛି । ନିର୍ବାଚନ ଆୟୋଗଙ୍କ ଅନୁଯାୟୀ ବିଜେପି ୫୫ ଟି ଆସନ ଏବଂ କଂଗ୍ରେସ ୩୩ ଟି ଆସନରେ ଆଗୁଆ ରହିଛି।
ନିର୍ବାଚନ ଆୟୋଗଙ୍କ ଅନୁଯାୟୀ, ମୁଖ୍ୟମନ୍ତ୍ରୀ ଭୁପେଶ ବାଗେଲ ପାଟନ ଆସନରେ ୧୮୭ ଭୋଟରେ ବିଜେପିର ବିଜୟ ବାଗେଲଙ୍କ ଠାରୁ ଆଗରେ ଅଛନ୍ତି । ଲର୍ମି ଆସନରେ ରାଜ୍ୟ ବିଜେପି ସଭାପତି ଅରୁଣ ସାଭ କଂଗ୍ରେସର ଥାନେଶ୍ୱର ସାହୁଙ୍କ ଠାରୁ ଆଗରେ ଅଛନ୍ତି ।
୯୦ ସଦସ୍ୟ ବିଶିଷ୍ଟ ଛତିଶଗଡ ବିଧାନସଭା ନିର୍ବାଚନରେ ଭୋଟ୍ ଗଣନା ରବିବାର ସକାଳ ୮ ଟାରୁ ଆରମ୍ଭ ହୋଇଛି । ରାଜ୍ୟର ୩୩ ଟି ଜିଲ୍ଲାର ଗଣନା କେନ୍ଦ୍ରରେ ସୁରକ୍ଷା କର୍ମୀମାନେ କଡ଼ା ନଜର ରଖିଛନ୍ତି । ନଭେମ୍ବର ୭ ଏବଂ ୧୭ ରେ ଦୁଇଟି ପର୍ଯ୍ୟାୟରେ ରାଜ୍ୟରେ ମତଦାନ ଅନୁଷ୍ଠିତ ହୋଇଥିଲା । ଭୋଟ୍ ହାର ୭୬.୩୧ ପ୍ରତିଶତ ଥିଲା ।
ଆଜି ମୁଖ୍ୟମନ୍ତ୍ରୀ ଭୁପେଶ ବାଗେଲ, ଉପ ମୁଖ୍ୟମନ୍ତ୍ରୀ ଟି.ଏସ୍ ସିଂଦେବ (ଉଭୟ କଂଗ୍ରେସ) ଏବଂ ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ (ବିଜେପି)ଙ୍କ ସମେତ ରାଜ୍ୟରେ ମୋଟ ୧୧୮୧ ଜଣ ପ୍ରାର୍ଥୀଙ୍କ ନିର୍ବାଚନ ଭାଗ୍ୟ ସ୍ଥିର ହେବ ।
