ଭୁବନେଶ୍ୱର,୨୦/୦୮: ଭାରତୀୟ ପୁରୁଷ ହକି ଦଳ ପ୍ୟାରିସ ଅଲିମ୍ପିକ୍ସରେ କ୍ରମାନ୍ୱୟରେ ଦ୍ୱିତୀୟ  ଥର ବ୍ରୋଞ୍ଜ ପଦକ ଜିତିବାରେ ସଫଳ ହୋଇଥିଲା ।  ଦୀର୍ଘ ୫୨ ବର୍ଷ ପରେ ଦଳ ଏହି ସଫଳତା ଦୋହରାଇଥିଲା । ଶେଷ ଥର ୧୯୮୦ରେ ଭାରତ  ସ୍ୱର୍ଣ୍ଣ ପଦକ ଜିତିଥିଲା । କିନ୍ତୁ ଏହା ପୂର୍ବରୁ ୧୯୬୮  ଓ ୧୯୭୨ ଅଲିମ୍ପିକ୍ସରେ କ୍ରମାନ୍ୱୟରେ ୨ ଥର ବ୍ରୋଞ୍ଜ  ଜିତିବାରେ ସଫଳ ହୋଇଥିଲା । ଭାରତ ବ୍ରୋଞ୍ଜ ଜିତିବା  ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଭାରତୀୟ  ଦଳ ପାଇଁ ଆକର୍ଷଣୀୟ ପୁରସ୍କାର ରାଶି ଘୋଷଣା  କରିଥିଲେ । କ୍ରୀଡ଼ା ବିଭାଗ ପକ୍ଷରୁ ମିଳିଥିବା ସୂଚନା  ଅନୁସାରେ, ଆସନ୍ତା ୨୧ ତାରିଖରେ ମୁଖ୍ୟମନ୍ତ୍ରୀ  ହକି ଖେଳାଳିଙ୍କୁ ସମ୍ବର୍ଦ୍ଧିତ କରିବା ସହ ଆର୍ଥିକ  ରାଶି ପ୍ରଦାନ କରିବେ । କାର୍ଯ୍ୟକ୍ରମ ଲୋକସେବା  ଭବନ ସମ୍ମିଳନୀ କକ୍ଷରେ ଆୟୋଜିତ ହେବ । 

ପୁରସ୍କାର ଘୋଷଣା କରି ମୁଖ୍ୟମନ୍ତ୍ରୀ  କହିଥିଲେ, ‘ମୁଁ ରାଜ୍ୟ ସରକାରଙ୍କ ପକ୍ଷରୁ  ପ୍ରତ୍ୟେକ ଖେଳାଳିଙ୍କୁ ୧୫ ଲକ୍ଷ ଟଙ୍କା ଏବଂ  ପ୍ରତ୍ୟେକ ସପୋର୍ଟ ଷ୍ଟାଫଙ୍କୁ ୧୦ ଲକ୍ଷ ଟଙ୍କା ଲେଖାଏଁ  ପୁରସ୍କାର ଦେବାକୁ ଘୋଷଣା କରୁଛି । ଓଡ଼ିଆ  ଖେଳାଳି ଅମିତ୍‌ ରୋହିଦାସଙ୍କୁ ୪ କୋଟି ଟଙ୍କାର  ସ୍ୱତନ୍ତ୍ର ପୁରସ୍କାର ମଧ୍ୟ ପ୍ରଦାନ କରାଯିବ ।’ 

ହକି ଇଣ୍ଡିଆର ମୁଖ୍ୟ ପ୍ରାୟୋଜକ ହେବା  ପରେ ଓଡ଼ିଶା ବାର୍ଷିକ ୨୦ କୋଟିରୁ ଊଦ୍ଧ୍ୱର୍ ଟଙ୍କା  ପ୍ରଦାନ କରି ଆସୁଛି । ଯେଉଁ ଅର୍ଥରେ ଭାରତୀୟ  ଖେଳାଳିଙ୍କୁ ଅତ୍ୟାଧୁନିକ ସୁବିଧା ସୁଯୋଗ,  ପ୍ରଶିକ୍ଷଣ ମିଳିପାରିଥିଲା ଏବଂ ଦଳର ପ୍ରଦର୍ଶନରେ  ଉନ୍ନତି ଆସିଥିଲା । ଫଳରେ ଅଲିମ୍ପିକ୍ସରେ ଦଳ  କ୍ରମାନ୍ୱୟରେ ପଦକ ଜିତି ଚାଲିଛି । 

ଗତ ଜୁନ ମାସ ୨୧ ତାରିଖରେ ନୂଆ  ମୁଖ୍ୟମନ୍ତ୍ରୀ ଶ୍ରୀ ମାଝୀ ହକି ପାଇଁ ଆଉ ଏକ ବଡ଼  ଘୋଷଣା କରିଥିଲେ । ‘ରାଜ୍ୟ ସରକାରଙ୍କ ପକ୍ଷରୁ  ୨୦୩୬ରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନର  ଶହେ ବର୍ଷ ପୂର୍ତ୍ତି ପାଳନ ହେବାକୁ ଯାଉଛି ।  ସେଥିପାଇଁ ଭାରତୀୟ ହକି ଦଳର ପ୍ରାୟୋଜକ  ଅବଧି ସମୟକୁ ୨୦୩୩ରୁ ଆଉ ତିନି ବର୍ଷ  ପାଇଁ ବୃଦ୍ଧି କରାଯିବ । ହକିର ଉନ୍ନତି ପାଇଁ  ରାଜ୍ୟ ସରକାରଙ୍କ ପକ୍ଷରୁ ସମସ୍ତ ସହଯୋଗ  ଯୋଗାଇ ଦିଆଯିବ ବୋଲି ମୁଖ୍ୟମନ୍ତ୍ରୀ କହିଥିଲେ ।