ଭୁବନେଶ୍ୱର,୧୬/୦୪: କଂଗ୍ରେସର ଗୋଷ୍ଠୀ କନ୍ଦଳ ଥମିବାର ନାଁ ନେଉନି । ନିର୍ବାଚନ ଯେତେ ପାଖୋଉଛି, ଗୋଷ୍ଠୀ କନ୍ଦଳ ସେତେ ତୀବ୍ର ହେଉଛି । ଜଟଣୀରେ ସନ୍ତୋଷ ଜେନା ଓ ଧର୍ମଶାଳାରେ କିଶାନ ପଣ୍ଡାଙ୍କୁ ଦଳ ପ୍ରାର୍ଥୀ କରିବା ପରେ ଗୋଷ୍ଠୀ କନ୍ଦଳ ପଦାରେ ପଡ଼ିଛି । ଟଙ୍କା ଦେଲେ କଂଗ୍ରେସ ଟିକଟ ମିଳୁଛି ବୋଲି ଏହି ନିର୍ବାଚନମଣ୍ଡଳୀର ଆଶାୟୀମାନେ ଅଭିଯୋଗ କରିଛନ୍ତି । କିଛି ଅସନ୍ତୁଷ୍ଟ କଂଗ୍ରେସ ନେତା ହୋହଲ୍ଲା ବି କରିଛନ୍ତି ।
ଅନ୍ୟପକ୍ଷରେ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି ପିସିସି ସଭାପତି ଶରତ ପଟ୍ଟନାୟକ । ସେ କହିଛନ୍ତି, କଂଗ୍ରେସରେ ଯିଏ ଯୋଗ୍ୟ ତାଙ୍କୁ ପ୍ରାର୍ଥୀ କରାଯାଇଛି । ଜିତିବାର ସମ୍ଭାବନାକୁ ଅଧିକ ଗୁରୁତ୍ୱ ଦିଆଯାଇଛି । ଏ ସମସ୍ତ ନିଷ୍ପତ୍ତି ଏଆଇସିସି ନେଇଛି । ଟଙ୍କା ନେଇ ଟିକଟ ଦେବା ଅଭିଯୋଗ ସମ୍ପୂର୍ଣ୍ଣ ମିଛ । ଯଦି ପ୍ରମାଣିତ କରିଦେବେ, ରାଜନୀତିରୁ ସନ୍ୟାସ ନେଇଯିବି ବୋଲି ଶରତ କହିଛନ୍ତି ।
ରବିବାର ୭୫ଟି ଆସନରେ କଂଗ୍ରେସ ବିଧାୟକ ପ୍ରାର୍ଥୀ ଘୋଷଣା କରିଥିଲା । ଜଟଣୀ ପାଇଁ ସନ୍ତୋଷ ଜେନାଙ୍କ ନାମ ଘୋଷଣା ପରେ ଦୌଡ଼ରେ ଥିବା ଅନ୍ୟତମ ଆଶାୟୀ ତଥା ପୂର୍ବତନ ନଗରପାଳ ସୁରଙ୍କ ପୁତୁରା ସଂଗ୍ରାମ ରାଉତରାୟଙ୍କ କ୍ଷୋଭ ପ୍ରକାଶ କରିଛନ୍ତି । ସେ କହିଛନ୍ତି, ଯାହାଙ୍କୁ ଦଳ ଟିକଟ ଦେଇଛି ସେ ଆଦୌ କଂଗ୍ରେସ ପରିବାରରେ ନଥିଲେ । କେବେ ମିଶିଲେ ଓ କେମିତି ଟିକଟ ଦିଆଗଲା ତାହା କଂଗ୍ରେସ କର୍ମୀଙ୍କ ମନରେ ସନ୍ଦେହ ଆଣିଛି । ଅନିୟମିତତା ହୋଇଥିବା ସେ ଅଭିଯୋଗ ଆଣିଛନ୍ତି । ପୂର୍ବରୁ ମଧ୍ୟ ସଂଗ୍ରାମ ଓ ତାଙ୍କ ସମର୍ଥକମାନେ କଂଗ୍ରେସ ଭବନରେ ହୋହଲ୍ଲା କରିଥିଲେ । ସଂଗ୍ରାମଙ୍କୁ ଟିକଟ ନଦେଇ ଆଉ କାହାକୁ ଦେଲେ ପରିସ୍ଥିତି ଖରାପ ହେବ ବୋଲି ଖୋଲା ଚେତାବନୀ ଦେଇଥିଲେ ।
ଅପରପକ୍ଷେ ବିଧାୟକ ସୁରେଶ ରାଉତରାୟ କହିଛନ୍ତି, ମୋ ବଡ଼ ପୁଅ ସିଦ୍ଧାର୍ଥଙ୍କ ପାଇଁ ସନ୍ତୋଷଙ୍କୁ ଟିକଟ ମିଳିଛି । ସିଦ୍ଧାର୍ଥଙ୍କୁ କଂଗ୍ରେସ ପ୍ରଭାରୀ ଅଜୟ କୁମାର ବହୁତ ଭଲ ପାଆନ୍ତି । ତେଣୁ ତା’ କଥାରେ ସନ୍ତୋଷଙ୍କୁ ଟିକଟ ମିଳିଛି । ସେମାନେ ଦିଲ୍ଲୀ ଯାଇ କଂଗ୍ରେସରେ ମିଶିଛନ୍ତି ବୋଲି ସୁର କହିଛନ୍ତି ।
ଅନୁରୂପ ଭାବେ ଧର୍ମଶାଳା ଆସନରୁ ଅନ୍ୟତମ ଆଶାୟୀ ମଧୁସ୍ମିତା ଆଚାର୍ଯ୍ୟଙ୍କ ସମର୍ଥକମାନେ ମଧ୍ୟ ହୋହଲ୍ଲା କରିଥିଲେ । କିଶାନ ପଣ୍ଡାଙ୍କୁ ପ୍ରାର୍ଥୀ କରାଯାଇଥିବାରୁ ମଧୁସ୍ମିତାଙ୍କ ସମର୍ଥକମାନେ ବିରୋଧ କରିଥିଲେ । ମାତ୍ର ପରେ ପିସିସି ସଭାପତିଙ୍କ ସହ ଆଲୋଚନା ପରେ ଏହି ପ୍ରସଙ୍ଗ ଥମିଥିଲା । ମଧୁସ୍ମିତା ଆଗାମୀ ଦିନରେ କଂଗ୍ରେସ କେମିତି ଭଲ ପ୍ରଦର୍ଶନ କରିବ, ସେ ଦିଗରେ କାମ କରିବେ ବୋଲି କହିଛନ୍ତି