ନୂଆଦିଲ୍ଲୀ: ଶୀତ ଋତୁ ଆସିବା ପୂର୍ବରୁ ଦିଲ୍ଲୀର ଅବସ୍ଥା ବେହାଲ ହେବାରେ ଲାଗିଛି । ରାଜଧାନୀ ଦିଲ୍ଲୀରେ ବାୟୁର ଗୁଣବତ୍ତା ଖରାପ ହୋଇଛି । ଏୟାର କ୍ବାଲିଟି ଇଣ୍ଡେକ୍ସ ୩୦୦ ଉପରକୁ ଯାଇଥିବା ବେଳେ ବାୟୁର ମାନ ‘ଅତି ଖରାପ’ ସ୍ତରକୁ ଚାଲିଯାଇଛି । ଶୀତ ଋତୁରେ ଦିଲ୍ଲୀରେ ବାୟୁ ପ୍ରଦୂଷଣ ଚରମରେ ପହଞ୍ଚିଯାଏ । ଏଥିପାଇଁ ଦିଲ୍ଲୀବାସୀ ପ୍ରସ୍ତୁତି କରୁଥିବା ବେଳେ ହଠାତ ଆଜି ଦିଲ୍ଲୀର ଏକ୍ୟୁଆଇ ୩୦୦ ଟପିଯିବା ପରେ ଚିନ୍ତା ପ୍ରକାଶ ପାଇଛି । 

ଏକ୍ୟୁଆଇ ୦-୫୦ ମଧ୍ୟରେ ରହିଲେ ବାୟୁର ମାନ ଭଲ ଥାଏ ବୋଲି ଧରାଯାଏ । ୫୧-୧୦୦ ରହିଲେ ବାୟୁର ମାନ ସନ୍ତୋଷଜନକ । ୩୦୧-୪୦୦ ଭିତରେ ଏକ୍ୟୁଆଇ ରହିଲେ ବାୟୁର ମାନ ଅତି ଖରାପ ସ୍ତରକୁ ଖସିଆସେ । ଦିଲ୍ଲୀର ବିଭିନ୍ନ ଅଞ୍ଚଳରେ ବାୟୁର ମାନ ଅତି ଖରାପ ସ୍ତରକୁ ଖସିଆସିଥିବା ଜଣାପଡ଼ିଛି । ଶୀତ ଋତୁରେ ଦିଲ୍ଲୀରେ ବାୟୁର ମାନ ଖରାପ ହେବା ପଛରେ ଅନେକ କାରଣ ରହିଛି । ଏହି ସମୟରେ ପଡ଼ୋଶୀ ରାଜ୍ୟରେ ନଡ଼ା ପୋଡ଼ି ଘଟଣା ମଧ୍ୟ ବୃଦ୍ଧି ପାଇଥାଏ । 

ଏହା ପୂର୍ବରୁ ଦିଲ୍ଲୀ ଏନସିଆରରେ ଗ୍ରେଡେଡ୍‌ ରେସପନ୍ସ ଆକ୍ସନ ପ୍ଲାନ (GRAP) ସଂଶୋଧନ କରାଯାଇଛି । ଏକ୍ୟୁଆଇ ୨୦୦ ଟପିବା ପରେ ଅନ୍ତରାଜ୍ୟ ବସ ଚଳାଚଳ ଉପରେ ବିଶେଷ ଧ୍ୟାନ ଦିଆଯାଉଛି । ବିଏସ-୩ ବସ୍‌ ବିଶେଷ କରି ଡିଜେଲ ଚାଳିତ ବସ୍‌ ଉପରେ ରୋକ ଲାଗିଛି । ଅନ୍ୟପଟେ, ପ୍ରଦୂଷିତ ବାୟୁ ସଂସ୍ପର୍ଶରେ ଆସିଲେ ଗୁରୁତର ସ୍ବାସ୍ଥ୍ୟ ସମସ୍ୟା ଦେଖାଦେବ । ତେଣୁ ବାହାରକୁ ଯିବା ସମୟରେ ମାସ୍କ ଲଗାଇବାକୁ ଲୋକମାନଙ୍କୁ ସ୍ବାସ୍ଥ୍ୟ ବିଶେଷଜ୍ଞ ପରାମର୍ଶ ଦେଇଛନ୍ତି ।